Sila Wala na Mahadlok sa Kataposan

SA ULAHING bahin sa katuigan sa 1970, si Gary ug si Karen kombinsido gayod nga duol na ang kataposan sa kalibotan. Busa namalhin sila gikan sa siyudad ngadto sa baryo ug naningkamot nga matagan-an ang tanan nilang panginahanglan. Gusto nilang maluwas.

Aron makakat-on sila sa pagtagana sa ilang panginahanglan, namalit silag libro, mitambong ug mga seminar, ug mikonsulta usab sila sa daghang tawo. Nananom silag mga utanon ug 50 ka bungang kahoy. Nagpondo silag mga binhi ug kasangkapan sa pagpanguma. Nakakat-on sila sa pag-atiman sa ilang mga pananom ug pagpreserbar niana ingong pagkaon. Gitudloan sila sa ilang higala kon unsaon pag-ihaw ug kon unsaon pagpreserbar ug karne. Nakat-onan ni Karen kon unsang mga tanom sa lasang ang pwedeng kaonon engkasog mahutdan silag pagkaon. Si Gary nakakat-on usab sa paggamag fuel gikan sa mais, paghimog lutoanang metal nga kahoy ang sugnod, ug pagtukod ug balay nga kompleto sa tanang panginahanglan.

“Abi nakog hapit nang matapos ang kalibotan tungod sa grabeng mga panghitabo niadtong panahona,” matod pa ni Karen. Si Gary miingon: “Sama sa ubang batan-on, aktibo kong nangampanya batok sa pagpihig sa rasa, Gubat sa Vietnam, ug korapsiyon. Apan nahigawad ko. Sa tan-aw nako, mangamatay ang tanang tawo kon magpadayon sila sa ilang ginahimo.”

 “Usa ka gabii niana,” si Gary miingon, “nakahigayon ko pagpakli sa Bibliya ug akong gibasa ang Mateo hangtod sa Pinadayag. Sa misunod nga upat ka gabii, gisubli nako kana pagbasa. Dayon, pagkasunod buntag, akong gisultihan si Karen: ‘Nagkinabuhi na kita sa kataposang mga adlaw. Sa dili madugay hinloan na sa Diyos ang yuta. Kinahanglang pangitaon nato ang mga tawo nga gustong maluwas.’” Midangop si Gary ug Karen sa lainlaing relihiyon sa tinguha nga makit-an ang mga tawong nangandam alang sa kataposan.

Wala madugay, dihay Saksi ni Jehova nga miduaw kanila, ug nagsugod sila sa pagtuon sa Bibliya. Si Karen nahinumdom: “Nalipay kaayo ko kay iyang gipatin-aw kanako ang Bibliya. Dugay na kong nangandoy nga masabtan ang kamatuoran bahin sa kataposan ug natin-awan na gyod ko niini. Aduna diay paglaom sa umaabot. Labaw sa tanan, akong naugmad ang suod nga relasyon uban sa akong langitnong Amahan, ang Diyos ug Maglalalang sa uniberso.”

Si Gary miingon: “Duna nay tinuod nga katuyoan ang akong kinabuhi. Sa dihang gisugdan nako pagtuon ang Bibliya, nainteres kaayo ko nga mokat-on pag dugang. Akong gibasa ang mga tagna sa Bibliya, gisusi ang pamatuod nga kini matuman gayod, ug nakombinsir ko nga ang Diyos molihok sa dili madugay. Naghunahuna ko nga kinahanglang mangandam ang mga tawo, dili alang sa katalagman kondili alang sa kinabuhi nga giandam sa Diyos alang kanato.” Nahimo nang positibo ang panglantaw ni Gary ug Karen bahin sa umaabot. Inay mabalaka sa kataposan sa kalibotan, sila masaligon nga wagtangon sa Diyos ang mga problema nga naghatag ug kalisdanan sa mga tawo ug himoon niyang paraiso ang yuta.

Komosta na si Gary ug Karen karon human sa 25 ka tuig? Si Karen miingon: “Padayon nakong gipalig-on ang akong gugma ug pagtuo kang Jehova nga Diyos, ug naningkamot ko sa pagtabang sa uban nga mohimo usab niana. Nagtinabangay mi ni Gary aron ang among pamilya magpabiling lig-on ug nahiusa sa pagsimba sa Diyos. Naningkamot mi nga kanunayng organisado ug simple ang among kinabuhi aron mahatagan namog pagtagad ang uban ug ang ilang panginahanglan.”

Si Gary midugang: “Kanunay kong mag-ampo nga moabot na unta ang Gingharian sa Diyos aron mahupayan ang milyon-milyong tawo. Matag higayon nga mosangyaw ko sa maayong balita sa Gingharian sa Diyos, mag-ampo ko nga naa untay bisag usa lang ka tawo nga maminaw sa mensahe sa Bibliya. Sulod sa mga 25 ka tuig, mahigugmaong gitubag ni Jehova ang maong pag-ampo. Kami ni Karen nagtuo nga sa dili madugay si Jehova maghimog dagkong mga kausaban sa yuta, apan kami wala na mahadlok sa kataposan.”—Mateo 6:9, 10; 2 Pedro 3:11, 12.

[Hulagway sa panid 9]

Si Gary ug Karen malipayon karon sa pagtabang sa uban nga makabatog paglaom pinaagi sa mensahe sa Bibliya