Tubag sa Upat ka Pangutana Bahin sa Kataposan

SI Jesu-Kristo nagtagna nga “moabot ang kataposan.” Siya miingon: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.”—Mateo 24:14, 21.

Ang giingon ni Jesus bahin sa kataposan ug ang ubang teksto sa Bibliya nga naghisgot bahin niini nagpatunghag hinungdanong mga pangutana. Palihog kuhaa ang imong Bibliya ug basaha ang tubag sa maong mga pangutana.

1 Unsa ang Matapos?

Ang Bibliya wala magtudlo nga ang planetang yuta malaglag. “Gitukod [sa Diyos] ang yuta ibabaw sa pihong mga dapit niini,” misulat ang salmista. “Kini dili matarog hangtod sa panahong walay tino, o hangtod sa kahangtoran.” (Salmo 104:5) Ang Bibliya wala usab magtudlo nga kini pagasunogon. (Isaias 45:18) Si Jesus mismo nag-ingon nga dunay maluwas sa dihang moabot ang kataposan. (Mateo 24:21, 22) Kon mao, unsay giingon sa Bibliya nga matapos?

Ang pakyas nga gobyerno sa tawo matapos. Ang Diyos nag-inspirar kang propetang Daniel sa pagsulat: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”—Daniel 2:44.

Ang gubat ug polusyon matapos. Ang Salmo 46:9 nagbatbat kon unsay himoon sa Diyos: “Gipahunong niya ang mga gubat hangtod sa kinatumyan sa yuta. Gibali niya ang busogan ug giputolputol ang bangkaw; ang mga karomata iyang gisunog sa kalayo.” Ang Bibliya nagtudlo usab nga ‘laglagon sa Diyos ang mga nagalaglag sa yuta.’—Pinadayag 11:18.

Ang krimen ug inhustisya matapos. Ang Pulong sa Diyos nagsaad: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa  yuta; ug kon bahin sa mga maluibon, sila pagalukahon gikan niini.” a—Proverbio 2:21, 22.

2 Kanus-a Moabot ang Kataposan?

Si Jehova nga Diyos dunay “tinudlong panahon” sa pagtapos sa pagkadaotan ug sa pagtukod sa iyang Gingharian o gobyerno. (Marcos 13:33) Apan gipakita sa Bibliya nga dili nato mahibaloan ang eksaktong petsa kon kanus-a mahitabo ang kataposan. Si Jesus miingon: “Mahitungod nianang adlawa ug taknaa walay nahibalo, ni ang mga manulonda sa mga langit ni ang Anak, kondili ang Amahan lamang.” (Mateo 24:36) Bisan pa niana, si Jesus ug ang iyang mga tinun-an nagtagna kon unsay kahimtang sa yuta una ipahinabo sa Diyos ang kataposan. Mailhan nga duol na ang kataposan kon ang tanang panghitabo nga atong pagahisgotan dinhi mahitabo sa tibuok kalibotan sulod sa usa ka yugto sa panahon.

Magkagubot ang politika ug ang katilingban ug madaot ang kinaiyahan sa sukod nga wala pa mahitabo sukad. Agig tubag sa pangutana sa mga tinun-an bahin sa kataposan, si Jesus miingon: “Ang nasod motindog batok sa nasod ug ang gingharian batok sa gingharian, aduna unyay mga linog sa nagkalainlaing mga dapit, aduna unyay mga kanihit sa pagkaon. Kini maoy sinugdanan sa mga kaul-ol sa kasakit.” (Marcos 13:8) Si apostol Pablo misulat: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos.”—2 Timoteo 3:1-5.

Ang buluhatong pagsangyaw mokaylap sa tibuok kalibotan. Si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.

3 Unsay Mahitabo Human sa Kataposan?

Ang Bibliya wala magtudlo nga ang tanang maayong tawo moadto sa langit aron mopuyo didto hangtod sa hangtod. Hinunoa, si Jesus nagtudlo nga matuman ang orihinal nga katuyoan sa Diyos alang sa mga tawo. “Malipayon ang mga malumog-buot, sanglit sila magapanunod sa yuta,” matod niya. (Mateo 5:5; 6:9, 10) Alang niadtong mangamatay sa dili pa moabot ang kataposan, ang Bibliya nagsaad nga sila pagabanhawon. (Job 14:14, 15; Juan 5:28, 29) Unsay mahitabo human sa kataposan?

Sa langit, si Jesus magmando ingong Hari sa Gingharian sa Diyos. “Ako nagpadayon sa pagtan-aw sa mga panan-awon sa gabii,” misulat si propetang Daniel, “ug, ania karon! uban sa mga panganod sa kalangitan dihay sama sa anak sa tawo [ang gibanhawng si Jesus] nga nagsingabot; ug siya nakaduol sa Karaan sa mga Adlaw [Jehova nga Diyos], ug ilang gidala siya sa haduol sa atubangan mismo sa maong Usa. Ug kaniya [Jesus] dihay gihatag nga pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya. Ang iyang pagmando maoy usa ka pagmando nga mohangtod sa panahong walay tino nga dili mahanaw, ug ang iyang gingharian dili magun-ob.”—Daniel 7:13, 14; Lucas 1:31, 32; Juan 3:13-16.

Ang mga sakop sa Gingharian sa Diyos makatagamtam ug hingpit nga panglawas, dumalayong kasegurohan, ug kinabuhing walay kataposan. “Sila gayod magtukod ug mga balay ug magpuyo niini,” misulat si propetang Isaias. “Ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon.”  (Isaias 65:21-23) Si apostol Juan misulat bahin nianang panahona: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

4 Unsay Angay Nimong Himoon Aron Maluwas sa Kataposan?

Si apostol Pedro miingon nga sa kataposang mga adlaw dunay mga tawong mobiaybiay ug dili motuo nga ang Diyos manggilabot sa katawhan ug magtapos sa pagkadaotan dinhi sa yuta. (2 Pedro 3:3, 4) Bisan pa niana, si Pedro nag-awhag sa mga tawo karon sa pagbuhat sa mosunod:

Kuhaig leksiyon ang mga panghitabo kaniadto. Ang Diyos “wala magpugong sa pagsilot sa usa ka karaang kalibotan, apan nagluwas kang Noe, nga usa ka magwawali sa pagkamatarong, uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan,” misulat si Pedro. (2 Pedro 2:5) Mahitungod niadtong mga mabiaybiayon, si Pedro miingon: “Sumala sa ilang gitinguha, sila wala makamatikod niining butanga, nga dihay mga langit gikan sa kakaraanan ug usa ka yuta nga nagbarog nga lig-on gikan sa tubig ug sa taliwala sa tubig pinaagi sa pulong sa Diyos; ug pinaagi niini ang kalibotan  niadtong panahona nakaagom sa kalaglagan sa dihang kini gilunopan sa tubig. Apan pinaagi sa mao gihapon nga pulong ang mga langit ug ang yuta b nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.”—2 Pedro 3:5-7.

Pagkinabuhi subay sa moral nga mga sukdanan sa Diyos. Kadtong gustong maluwas sa kataposan angayng mohimo sa “balaang mga buhat sa panggawi ug mga buhat sa diyosnong pagkamahinalaron,” misulat si Pedro. (2 Pedro 3:11) Matikdi nga gipasiugda ni Pedro ang “balaang mga buhat sa panggawi” ug “mga buhat sa diyosnong pagkamahinalaron.” Busa dili igo nga ang usa moingon nga siya nagtuo sa Diyos o kaha maglangan-langan sa paghimog kausaban ug himoon lang kana sa ulahi kay gustong maluwas.

Unsa nga mga buhat ang giuyonan sa Diyos? Sulayi nga itandi ang imong nahibaloan sa kon unsay gitudlo sa Bibliya. Ang mga Saksi ni Jehova malipay sa pagtabang kanimo. Hangyoa sila nga ipakita ang ilang tubag diha sa imong Bibliya. Kon imo kanang buhaton, kana makatabang kanimo nga makabaton ug positibong panglantaw sa umaabot bisan pa sa makahahadlok nga mga panghitabo karon.

[Mga footnote]

[Blurb sa panid 7]

Ang yuta dili mao ang laglagon kondili kadtong nagadaot niini