Unsay Gikahadlokan sa Daghang Tawo?

“Bisag dili ka relihiyoso, makatuo gyod ka nga dunay dakong katalagman nga modangat niining kalibotana.”—STEPHEN O’LEARY, ASSOCIATE PROFESSOR SA UNIVERSITY OF SOUTHERN CALIFORNIA. a

UYON ka ba niana? Kini ug ang mosunod nga mga artikulo maghisgot sa pipila ka katarongan kon nganong ang mga tawo nahadlok sa umaabot. Apan kini usab maghisgot kon nganong makasalig ka nga dili gayod matapos ang kinabuhi dinhi sa yuta. Dunay katarongan nga magmapositibo bisan pa niining mosunod nga makapasubong mga impormasyon.

Dako gihapon ang kapeligrohan nga mahitabo ang nukleyar nga gubat. Niadtong 2007, ang Bulletin of the Atomic Scientists nag-ingon: “Sukad nga gihulog ang unang bomba atomika sa Hiroshima ug Nagasaki, karon pa nag-atubang ang kalibotan ug grabeng kapeligrohan ug ang mga tawo wala mahibalo kon unsay buhaton.” Nganong nakaingon niana ang maong basahon? Ang Bulletin nagreport nga sa 2007 aduna pay nabiling mga 27,000 ka nukleyar nga mga armas ug bomba ug 2,000 niana “pwedeng pabuthon sulod lang sa pipila ka minutos.” Bisag pipila lang niana ang pabuthon, kana moresulta nag grabeng kalaglagan!

Sukad nianang tuiga, namenosan ba ang kapeligrohan nga mahitabo ang nukleyar nga gubat? Ang lima ka nasod nga kinadaghanag nukleyar nga bomba—China, France, Russia, United Kingdom, ug United States—“naglansad ug mas modernong sistema sa nukleyar nga armas o may plano sa paghimo niana,” miingon ang SIPRI Yearbook 2009. b c Apan matod pa sa maong libro, dili lang kining mga nasora ang dunay nukleyar nga mga armas. Sumala pa sa mga tigdukiduki, ang India dunay mga 60 ngadto sa 80 ka nukleyar nga mga armas, maingon man ang Pakistan ug Israel. Miingon usab sila nga dunay 8,392 ka nukleyar nga bomba sa tibuok kalibotan ug kini pwedeng pabuthon bisan unsang orasa!

Ang pagkausab sa klima mahimong mopahinabog katalagman. “Ang kadaot nga ipahinabo  sa pagkausab sa klima halos sama ka grabe sa kadaot nga ipahinabo sa nukleyar nga bomba,” matod pa sa Bulletin of the Atomic Scientists. Ingon usab niini ang pasidaan sa tinahod nga mga siyentista, sama ni Stephen Hawking, retiradong propesor sa University of Cambridge, ug si Sir Martin Rees, propesor sa Trinity College sa University of Cambridge. Sila nagtuo nga ang dili-hustong paggamit sa teknolohiya ug ang pagkadaot sa kinaiyahan tungod sa kalihokan sa tawo mahimong magpahinabog permanenteng kadaot sa yuta o makapuo pa gani sa mga tawo.

Milyon-milyon ang nabalaka tungod sa mga panagna bahin sa kataposan sa kalibotan. Kon imong itayp ang mga pulong nga “end of the world” ug ang tuig nga “2012” diha sa Internet, daghan kaayo kag mabasa nga moabot ang kataposan nianang tuiga. Ngano? Ang karaang kalendaryo sa tribong Maya, nga gitawag ug “Long Count,” gibanabana nga matapos sa tuig 2012. Daghan ang nahadlok nga basig timailhan na kini sa kataposan sa kalibotan.

Daghang relihiyosong tawo nagtuo nga ang Bibliya nagtudlo nga ang atong planetang yuta malaglag. Sila nagtuo nga ang tanang maayong tawo moadto sa langit, samtang ang uban mag-antos dinhi sa yuta o kaha itambog sa impiyerno.

Apan ang Bibliya ba nag-ingon nga malaglag ang yuta? “Ayaw ninyo tuohi ang matag inspiradong pahayag,” nagpasidaan si apostol Juan, “hinunoa sulayi ang inspiradong mga pahayag aron masuta kon kini nagagikan ba gayod sa Diyos.” (1 Juan 4:1) Imbes motuo dayon sa isulti sa uban, nganong dili nimo susihon kon unsay giingon sa Bibliya bahin sa kataposan sa kalibotan? Ang gitudlo niini mahimong lahi kay sa imong gituohan.

[Mga footnote]

[Picture Credit Lines sa panid 4]

Mushroom cloud: U.S. National Archives photo; hurricane photos: WHO/League of Red Cross and U.S. National Archives photo