1 Nganong Kinahanglang Mag-ampo?

PAG-AMPO. Ang mga tawo interesado kaayong mahibalo kon unsay giingon sa Bibliya bahin niini. Tagda ang pito ka pangutana nga sagad isukna sa mga tawo bahin sa pag-ampo, dayon hisgotan nato kon unsay tubag sa Bibliya niana. Kini ug ang mosunod nga mga artikulo magdasig kanimo nga moampo sa Diyos o magtudlo kanimo kon unsaon pag-ampo aron dunggon niya.

SA TIBUOK kalibotan, ang mga tawo mag-ampo bisan unsay ilang relihiyon ug kultura. Himoon nila kana nga mag-inusara o kaha ingong grupo. Sila mag-ampo diha sa simbahan, sa templo, sa sinagoga, sa moske, ug sa mga shrine. Ang uban moyukbo diha sa carpet, ug ang uban usab mogamit ug rosaryohan, prayer wheel, imahen, nobenahan, ug uban pa.

Kitang mga tawo lahi sa ubang mga linalang kay kita moampo man sa Diyos. Tinuod, kita parehas sa mga mananap sa daghang paagi. Sama kanila kita nagkinahanglag pagkaon, hangin, ug tubig. Kita usab ipanganak, mabuhi, ug mamatay. (Ecclesiastes 3:19) Apan tawo lamang ang moampo. Ngano man?

Lagmit ang kinasimplehang tubag mao nga gikinahanglan nato kana. Alang sa kadaghanan, ang pag-ampo maoy paagi sa tawo sa pagpakigkomunikar sa usa ka espiritung persona, nga giisip niyang balaan. Gipakita sa Bibliya nga kita gilalang nga may tinguha niana. (Ecclesiastes 3:11) Si Jesus miingon: “Malipayon kadtong mahunahunaon sa ilang espirituwal nga panginahanglan.”—Mateo 5:3.

“Espirituwal nga panginahanglan”—dili ba kini ang rason nga dunay mga simbahan ug daghang oras ang gigugol sa mga tawo sa pag-ampo? Ang ubang tawo nagsalig sa ilang kaugalingon o sa ubang tawo aron matagan-an ang ilang espirituwal nga panginahanglan. Apan namatikdan ba nimo nga limitado ra kaayo ang ikatabang sa tawo? Tungod kana kay kita huyang, mubog kinabuhi, ug limitadog kahibalo. Gikinahanglan nato ang usa nga labaw pa gayong maalamon ug gamhanan, ug mas makalahutay pa gayod kay kanato sa pagtagana sa atong espirituwal nga panginahanglan. Unsa kining espirituwal nga mga panginahanglan nga maoy nagpalihok kanato sa pag-ampo?

Tagda kini: Diha bay higayon nga nagkinahanglan kag giya, kaalam, o tubag sa mga pangutana nga daw dili matugkad sa tawo? Diha pod bay higayon nga nagkinahanglan kag paghupay kay namatyan kag minahal, o kaha giya tungod kay kinahanglan kang mohimog bug-at nga desisyon, o kaha nagkinahanglan kag kapasayloan kay gitulisok ka sa imong konsensiya?

Sumala sa Bibliya, kini maoy pipila sa mga katarongan nga kita moampo. Ang Bibliya mao ang labing kasaligang basahon nga nagtudlo bahin sa pag-ampo, ug gisulat dinhi ang pag-ampo sa matinumanong mga alagad sa Diyos. Sila nag-ampo aron mahupayan, magiyahan, mapasaylo, ug aron matubag ang lisod kaayong mga pangutana.—Salmo 23:3; 71:21; Daniel 9:4, 5, 19; Habacuc 1:3.

Tinuod, lainlain ang maong mga pag-ampo, apan dunay butang nga kini managsama. Ang mga tawo nga nagtanyag niini nahibalo kon sa unsang paagi dunggon ang pag-ampo, butang nga wala mahibaloi o gibalewala sa daghang tawo karon. Sila nahibalo kon kang kinsa angayng moampo.