2 Kang Kinsa Kita Angayng Moampo?

USA ra bay padulngan sa tanang pag-ampo bisag lainlaing diyos ang sangpiton? Mao kanay pagtuo sa daghang tawo karon, ilabina niadtong miuyon nga mag-ipon sa pagsimba ang bisan unsang relihiyon (interfaith) kay kini dalawaton ra, bisan pag lainlain silag pagtulon-an. Husto kaha ang ilang hunahuna?

Gipakita sa Bibliya nga daghang tawo ang wala mag-ampo sa matuod nga Diyos. Sa kapanahonan sa Bibliya, ang mga tawo nag-ampo sa kinulit nga mga imahen. Apan, ang Diyos balikbalik nga nagpasidaan batok niana. Pananglitan, bahin sa mga imahen, ang Salmo 115:4-6 nag-ingon: “Sila adunay mga igdulungog, apan sila dili makadungog.” Tin-aw ang punto. Ngano man tuod nga moampo sa usa ka diyos nga dili makadungog?

Gipatin-aw pa gayod kini diha sa usa ka asoy sa Bibliya. Ang tinuod nga propetang si Elias naghagit sa mga propeta ni Baal nga moampo sa ilang diyos, samtang si Elias moampo sa iyang Diyos. Si Elias miingon nga ang matuod nga Diyos motubag samtang ang bakak dili. Gidawat sa mga propeta ni Baal ang maong hagit. Pwerte nilang ampo, nga nagminatay pa gani, apan kana wala dungga! Ang Bibliya nag-ingon: “Walay usang mitubag, ug walay nagtagad.” (1 Hari 18:29) Komosta si Elias?

Gitubag dayon sa Diyos ang iyang pag-ampo kay gilamoy sa kalayo gikan sa langit ang iyang halad. Nganong gitubag ang pag-ampo ni Elias? Matikdi ang iyang pag-ampo nga mabasa sa 1 Hari 18:36, 37. Kini mubo kaayo, nga mga 30 ra ka pulong sa orihinal nga Hebreo. Apan, sa maong pag-ampo, tulo ka beses niyang gisangpit ang matuod nga Diyos, si Jehova.

Si Baal, kansang ngalan nagkahulogang “tag-iya” o “agalon,” mao ang diyos sa mga Canaanhon, ug lainlain ang ngalan niini nga diyos depende sa lugar. Sa kasukwahi, ang ngalang Jehova maoy talagsaon ug siya lamang nga persona ang gitawag nianang ngalana sa tibuok uniberso. Giingnan niya ang iyang katawhan: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya.”—Isaias 42:8.

Pareho bang gidungog ang pag-ampo ni Elias ug sa mga propeta ni Baal? Ang mga tawo nahimong daotan tungod kay ang pagsimba kang Baal naglangkit ug mga rituwal sa prostitusyon ug paghalad ug mga tawo. Sa kasukwahi, ang pagsimba kang Jehova nagtuboy sa iyang katawhan, ang mga Israelitas, nga nagpahigawas kanila gikan sa maong daotang mga buhat. Hunahunaa ra: Kon magsulat ka sa tinahod kaayo nimong higala, mosugot ka ba nga mahiadto kini sa laing tawo nga daotag reputasyon? Dili gayod!

 Kon mag-ampo ka kang Jehova, ikaw nag-ampo sa Maglalalang, ang Amahan sa tanang katawhan. a Si propetang Isaias miampo: “Ikaw, Oh Jehova, ang among Amahan.” (Isaias 63:16) Si Jehova mao ang gipasabot ni Jesus sa dihang siya miingon sa iyang mga tinun-an: “Ako mosaka ngadto sa akong Amahan ug inyong Amahan ug ngadto sa akong Diyos ug inyong Diyos.” (Juan 20:17) Si Jehova mao ang Amahan ni Jesus. Siya mao ang Diyos nga giampoan ni Jesus ug ang gitudlo ni Jesus nga ampoan sa iyang mga tinun-an.—Mateo 6:9.

Ang Bibliya ba nagtudlo nga moampo ta kang Jesus, kang Maria, sa mga santos, o sa mga anghel? Wala—kondili kang Jehova lamang. Tagda ang duha ka hinungdan. Una, ang pag-ampo maoy usa ka paagi sa pagsimba, ug ang Bibliya nag-ingon nga si Jehova lamang ang angayng simbahon. (Exodo 20:5) Ikaduha, ang Bibliya nag-ingon nga siya mao ang “Tigpatalinghog sa pag-ampo.” (Salmo 65:2) Bisan tuod may mga butang nga idelegar ni Jehova sa uban, ang pagpatalinghog sa pag-ampo wala gayod niya idelegar. Siya mismo maoy mopatalinghog sa atong mga pag-ampo.

Busa kon gusto nimo nga dunggon sa Diyos ang imong mga pag-ampo, hinumdomi kining tambag sa Bibliya: “Ang matag usa nga magatawag sa ngalan ni Jehova maluwas.” (Buhat 2:21) Apan mao ra ba kanay gikinahanglan aron dunggon ni Jehova ang atong mga pag-ampo, o duna pay ubang butang nga angay natong mahibaloan?

[Footnote]

[Hulagway sa panid 5]

Sa dihang gihagit ni Elias ang mga propeta ni Baal, napamatud-an nga dili dunggon ang tanang pag-ampo