Pagpakigsulti sa Silingan—Unsa ang Balaang Espiritu?

ANG mga Saksi ni Jehova malipay nga ipaambit ang mensahe sa Bibliya ngadto sa ilang isigkatawo. Duna ka bay pangutana bahin sa Bibliya nga imong gikalibgan? Gusto ka bang mahibalo bahin sa pagtulon-an sa mga Saksi ni Jehova? Kon mao, ayaw pagpanuko sa pagpangutana sa mga Saksi sa sunod higayon nga sila makig-estorya kanimo. Malipay silang motubag sa imong mga pangutana.

Aniay usa ka pananglitan sa pagpakigsulti sa mga Saksi ni Jehova ngadto sa mga tawo. Konohay Sam ang ngalan sa Saksi ug nagsangyaw siya kang Bert.

Unsay Imong Pagsabot sa “Espiritu Santo”?

Bert: Matod sa uban, kamong mga Saksi ni Jehova dili mga Kristohanon kay dili kono mo motuo sa espiritu santo.

Sam: Sa pagkatinuod, mga Kristohanon mi. Nagtuo mi kang Jesu-Kristo mao ganing nagsangyaw mi. Iyang gisugo ang iyang mga tinun-an sa pagsangyaw. Apan pwede ba kong mangutana? Unsay imong pagsabot sa “espiritu santo”?

Bert: Aw kana gong balaang espiritu, ang ikatulong persona sa Trinidad, ang magtatabang nga gisaad ni Jesus nga iyang ipadala. Importante kana kanako. Gusto kong anaa kini sa akong kinabuhi.

Sam: Hinuon, mao nay pagsabot sa daghang tawo sa balaang espiritu. Duna koy natun-an sa Bibliya bahin niana. Kon tugotan ko nimo, malipay kong ipaambit kanimo ang akong natun-an.

Bert: Sige, maminaw ko kadiyot.

Sam: Sam diay ang akong ngalan. Ikaw?

Bert: Si Bert ko.

Sam: Nalipay kong nagkaila ta Bert. Kay dili man ko magdugay, tugoti ko nga hisgotan ang usa lang ka bahin niana nga topiko. Sumala sa imong giingon, ang balaang espiritu mao ang magtatabang nga gisaad ni Jesus. Husto ka. Apan sa imong pagtuo, ang balaang espiritu ba maoy usa ka persona ug katumbas sa Diyos?

Bert: Oo, mao nay akong pagsabot.

Ang Balaang Espiritu ba Usa ka Persona?

Sam: Atong susihon ang usa ka teksto sa Bibliya aron mahibalo ta kon ang balaang espiritu ba usa ka persona. Tingali nakabasa ka na niining tekstoha. Dinhi, sa Buhat 2:1-4 atong mabasa: “Karon samtang ang adlaw sa pista sa Pentekostes nagapadayon, silang tanan nagkatigom sa samang dapit, ug sa kalit may nahitabong kabanha gikan sa langit sama gayod nianang nagahuros nga makusog nga hangin, ug kini mipuno sa tibuok nga balay diin sila nanglingkod. Ug ang mga dila nga maorag kalayo mipakita kanila ug naapod-apod, ug nagtinagsaay sa pagpatong sa matag usa kanila, ug silang  tanan napuno sa balaang espiritu ug misugod sa pagsulti sa lainlaing mga pinulongan, ingon sa gitugot sa espiritu nga ilang isulti.”

Bert: Nakabasa bitaw ko ana.

Sam: Sa imong hunahuna Bert, pwede ba nga ang usa ka persona mapuno ug laing persona?

Bert: Siyempre, dili.

Sam: Ipadayon nato pagbasa sa bersikulo 17 niini gihapong kapituloha. Ang unang bahin niining bersikuloha nag-ingon: “‘Sa kataposang mga adlaw,’ nagaingon ang Diyos, ‘ibubo ko ang bahin sa akong espiritu sa tanang matang sa unod.’” Mahimo bang ang Diyos mokuhag usa ka bahin sa laing Diyos nga katumbas niyag gahom ug ibubo kini sa tanang unod?

Bert: Dili gihapon.

Sam: Si Juan Bawtista naghisgot usab sa laing paagi nga ang usa mapuno sa balaang espiritu. Ato kining mabasa sa Mateo 3:11. Mahimo bang ikay mobasa?

Bert: “Ako, sa akong bahin, nagbawtismo kaninyo sa tubig tungod sa inyong paghinulsol; apan ang usa nga moanhi sunod kanako mas kusgan kay kanako, kansang mga sandalyas ako dili angayan sa paghubo. Kana siya magbawtismo kaninyo sa balaang espiritu ug sa kalayo.”

Sam: Salamat sa pagbasa. Namatikdan ba nimo ang giingon ni Juan Bawtista bahin sa balaang espiritu?

Bert: Siya naghisgot bahin sa bawtismo sa balaang espiritu.

Sam: Husto ka. Matikdi nga naghisgot usab siya ug bawtismo sa kalayo. Klaro nga ang kalayo dili usa ka persona. Sa imong hunahuna, kini ba nga teksto nagpasabot nga ang balaang espiritu usa ka persona?

Bert: Wala.

Sam: Busa sumala sa mga teksto nga atong gibasa, ang balaang espiritu dili usa ka persona.

Bert: Tuod no.

Nganong Usa ka “Magtatabang”?

Sam: Ganina nakahisgot ka ug pulong nga “magtatabang.” Sa Juan 14:26 si Jesus naghisgot sa balaang espiritu ingong usa ka “magtatabang.” Ato kining basahon: “Ang magtatabang, ang balaang espiritu, nga ipadala sa Amahan sa akong ngalan, siya magtudlo kaninyo sa tanang butang ug magpahinumdom kaninyo sa tanang butang nga akong gisulti kaninyo.” Ang uban nagtuo nga kining tekstoha nagtudlo nga ang balaang espiritu maoy usa ka persona kay kini motabang ug motudlo.

Bert: Mao pod nay akong gituohan.

Sam: Dili kaha naggamit lang si Jesus dinhi ug simbolikong mga pulong? Itandi ang iyang giingon bahin sa kaalam, sumala sa Lucas 7:35: “Sa gihapon, ang kaalam mapamatud-ang matarong pinaagi sa tanang anak niini.” Moingon ka ba nga ang kaalam usa ka persona, nga kini dunay mga anak?

Bert: Dili. Simboliko lang kana.

Sam: Husto ka. Ang punto ni Jesus mao nga ang kaalam sa tawo makita diha sa iyang binuhatan. Ang Bibliya sagad mogamit ug mahulagwayong mga pulong, diin ang usa ka butang gihulagway ingong persona. Kita usab sagad mogamit niana. Pananglitan, sa dihang sidlak ang adlaw, ang uban moingon, “Ablihi ang bentana aron makasulod ang adlaw,” dili ba?

Bert: Bitaw, mosulti pod ko ana.

Sam: Buot bang ipasabot nga ang adlaw usa ka persona nga mosulod sa imong balay?

Bert: Dili, kay klarong simboliko lang kana.

Sam: Busa sa dihang miingon si Jesus nga ang balaang espiritu maoy magtatabang, o magtutudlo, dili kaha naggamit lang siyag simbolikong mga pulong?

Bert: Bitaw no. Mohaom kana sa mga teksto nga imong gibasa bahin sa mga tawo nga gibuboan ug gibawtismohan sa balaang espiritu. Nan, kon ang balaang espiritu dili persona, unsa diay kana?

 Unsa ang Balaang Espiritu?

Sam: Sa Buhat 1:8, gisulti ni Jesus kon unsa ang balaang espiritu. Palihog kono kog basa.

Bert: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.”

Sam: Matikdi nga ang balaang espiritu gilangkit ni Jesus sa gahom. Sumala sa mga teksto nga atong gibasa, diin gikan ang maong gahom?

Bert: Sa Diyos nga Amahan.

Sam: Husto ka. Ang balaang espiritu mao ang puwersa nga gigamit sa Diyos sa paglalang sa uniberso. Gihisgotan kana sa Genesis 1:2, nga nag-ingon: “Ang aktibong puwersa sa Diyos naglihok ngadto-nganhi ibabaw sa nawong sa mga tubig.” Ang Hebreohanong pulong nga gihubad ug “aktibong puwersa” gihubad usab nga “espiritu.” Kini maoy dili makita nga aktibong puwersa nga gigamit sa Diyos sa pagpatuman sa iyang katuyoan ug sa pagpadayag sa iyang kabubut-on. Duna koy usa na lang ka teksto nga ipabasa nimo, ang Lucas 11:13.

Bert: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”

Sam: Kon ang Amahan maoy nagkontrol sa balaang espiritu ug iya kining ihatag sa mga tawong nangayo niini, makaingon ba kita nga ang balaang espiritu katumbas sa Amahan?

Bert: Dili. Nasabtan na nako ang imong buot ipasabot.

Sam: Buweno, dili ko magdugay Bert, kay kadiyot lang ra ba tong imong giingon. Gusto lang kong mangutana agig sumaryo sa atong gihisgotan. Sumala sa mga teksto nga atong gibasa, unsa gani ang balaang espiritu?

Bert: Kana mao ang aktibong puwersa sa Diyos.

Sam: Husto. Ug sumala sa Juan 14:26, sa dihang si Jesus naghisgot sa balaang espiritu ingong magtatabang o magtutudlo, siya naggamit lang ug simbolikong mga pulong.

Bert: Karon lang baya ko nakahibalo ana.

Sam: Duna pa kitay makat-onan sa gisulti ni Jesus nga makapadasig kaayo.

Bert: Unsa kana?

Sam: Kita makapangayo sa Diyos sa iyang balaang espiritu aron tabangan kita sa malisod nga mga kahimtang. Makahangyo usab kita sa tabang sa iyang balaang espiritu aron makakat-on kita sa kamatuoran bahin kaniya.

Bert: Interesado ko ana da.

Sam: Sa dili pa ko molakaw, dunay usa ka punto nga gusto nakong ibilin nimo aron imong mapamalandong. Kay ang balaang espiritu mao man ang aktibong puwersa sa Diyos, di ba makataronganon gayod nga iya kining gamiton sa pagtuman sa tanan niyang gitinguhang buhaton?

Bert: Tinuod kana.

Sam: Kon mao, nganong wala man niya gamita ang iyang gahom aron taposon ang tanang pag-antos ug pagkadaotan nga nagakahitabo karon sa kalibotan? Kining pangutanaha misantop ba usab sa imong hunahuna? a

Bert: Oo, nakahunahuna pod ko ana.

Sam: Okey ra kaha kon mobalik ko nimo ani ra gihapong orasa sunod semana aron atong hisgotan kana?

Bert: Aw, okey kaayo. Magpaabot ko nimo.

[Footnote]