Unsaon Nimo Pagbuntog ang Negatibong Pagbati?

NAKASULAY ka na ba nga makigbugno sa imong negatibong pagbati? Halos kitang tanan nakasulay gayod niana. Grabe kaayo karon ang kalisod sa ekonomiya, kapintasan, ug inhustisya. Dili ikatingala nga daghan ang mibatig tumang kaguol, kahasol sa konsensiya, ug kawalay pulos.

Kana nga mga pagbati makadaot. Makawala kana sa atong pagsalig sa kaugalingon, maayong paminsar, ug sa atong kalipay. Ang Bibliya nag-ingon: “Naluya ka ba sa adlaw sa kasakit? Ang imong kusog diyutay ra.” (Proverbio 24:10) Gikinahanglan nato ang atong kusog aron makalahutay niining malisod nga kalibotan. Busa, hinungdanon nga atong makontrolar ang negatibong pagbati. a

Ang Bibliya nagtaganag epektibong tabang aron atong mabuntog kana. Si Jehova nga Diyos, ang Maglalalang ug Tigsustento sa kinabuhi, dili gusto nga madaog ka sa grabeng problema o mawad-ag paglaom. (Salmo 36:9) Busa atong hisgotan ang tulo ka paagi nga ang Bibliya makatabang kanato sa pagbuntog sa negatibong pagbati.

Hinumdomi nga ang Diyos Interesado Kanimo

Ang ubang tawo nagtuo nga ang Diyos walay pagtagad sa ilang gibati. Ingon ka ba usab niana? Ang tinuod, ang Bibliya nagpasalig kanato nga ang atong Maglalalang nasayod kaayo sa atong pagbati. Ang salmista nag-ingon: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” (Salmo 34:18) Makapahupay gayod ang pagkahibalo nga dili kita pasagdan sa labing gamhanang Diyos sa dihang kita dunay problema!

Ang Diyos dili tig-a ug kasingkasing. Sumala sa Bibliya, “ang Diyos gugma.” (1 Juan 4:8) Siya nahigugma ug nahangawa sa mga tawong nag-antos. Pananglitan, sa dihang ang mga Israelitas nabihag sa Ehipto mga 3,500 ka tuig kanhi, siya miingon: “Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos. Ug manaog ako sa pagluwas kanila.”—Exodo 3:7, 8.

Ang Diyos nahibalo sa atong pagbati tungod kay “siya mao ang nagbuhat kanato, ug dili kita sa atong kaugalingon.” (Salmo 100:3) Busa, bisan kon daw ang ubang tawo wala makasabot kanato, kita makaseguro nga ang Diyos makasabot kanato. Ang Bibliya nag-ingon: “Ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.” (1 Samuel 16:7) Makita sa Diyos bisan ang kinailadmang bahin sa atong kasingkasing.

Tinuod, si Jehova nahibalo usab sa atong mga kasaypanan ug kahuyangan. Apan mapasalamaton kita kay mapinasayloon ang atong mahigugmaong Diyos. Ang magsusulat sa Bibliya nga si David miingon: “Ingon sa usa ka amahan nga magapakitag kaluoy sa iyang mga anak, si Jehova nagpakitag kaluoy kanila nga nahadlok kaniya. Kay siya nahibalo pag-ayo sa atong pagkaumol, nga nahinumdom nga kita abog.” (Salmo 103:13, 14) Lagmit pulos negatibo ang atong makita  sa atong kaugalingon, apan dili ingon niana ang pagtan-aw sa Diyos kanato. Ang iyang gitan-aw mao ang maayo, dili ang atong kasaypanan ug kahuyangan, basta kita mahinulsolon.—Salmo 139:1-3, 23, 24.

Busa kon kita mobati nga walay pulos, kinahanglan nga suklan nato kana. Kinahanglang atong hinumdoman kon unsay panglantaw sa Diyos kanato!—1 Juan 3:20.

Ugmara ang Suod nga Relasyon sa Diyos

Unsay kaayohan kon atong lantawon ang atong kaugalingon sama sa paglantaw sa Diyos kanato? Dili kita malisdan sa paghimo niining ikaduhang paagi sa pagbuntog sa negatibong pagbati—ang pag-ugmad ug suod nga relasyon sa Diyos. Posible ba gayod kana?

Ang atong mahigugmaong Amahan, si Jehova nga Diyos, malipay sa pagtabang kanato nga masuod kaniya. Ang Bibliya nag-awhag kanato: “Duol sa Diyos, ug siya moduol kaninyo.” (Santiago 4:8) Busa makapadasig kaayo ang pagkahibalo nga bisan tuod kita makasasala ug may mga kahuyangan, kita mahimong masuod sa Diyos.

Sa Bibliya, gipaila sa Diyos kon unsa siya nga pagka-Diyos. Pinaagi sa regular nga pagbasa niini, atong makat-onan ang iyang mga hiyas. b Kon atong palandongon ang atong makat-onan, mas masuod kita kang Jehova. Mas mailhan nato siya ingong mahigugmaon ug maluluy-ong Amahan.

Aduna pay laing kaayohan kon atong palandongon ang atong mabasa sa Bibliya. Mas masuod kita sa atong langitnong Amahan kon atong isilsil diha sa atong hunahuna ug kasingkasing ang iyang pulong, ug tugotan kining magtul-id, maghupay, ug maggiya kanato. Kinahanglan nato kining buhaton ilabina sa dihang kita natugaw tungod sa negatibong pagbati ug panghunahuna. Ang salmista nag-ingon: “Sa dihang ako naguol pag-ayo, ikaw naghupay ug naghatag kanakog kalinaw.” (Salmo 94:19, Contemporary English Version) Ang Pulong sa Diyos makapahupay gayod. Kon mapaubsanon natong dawaton ang iyang mensahe, ang atong negatibong pagbati anam-anam nga mapulihan ug kalinaw ug kahupayan gikan sa Diyos. Si Jehova maghupay kanato sama sa usa ka mahigugmaong ginikanan nga nag-alam-alam sa iyang anak.

Ang laing paagi aron mahimong suod sa Diyos mao ang regular nga pagpakigsulti kaniya. Ang Bibliya nagpasalig kanato nga “bisan unsay atong pangayoon sumala sa iyang kabubut-on, [ang Diyos] magpatalinghog kanato.” (1 Juan 5:14) Bisan unsang problema nga atong masinati, kita makaampo sa Diyos ug makahangyo sa iyang tabang. Kon atong ipahungaw ang atong kaguol ngadto kaniya pinaagi sa pag-ampo, kita makabaton ug kalinaw sa hunahuna. Si apostol Pablo misulat: “Sa tanang butang pinaagi sa pag-ampo  ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.

Kon ikaw regular nga magbasa sa Bibliya, mamalandong, ug mag-ampo, segurado nga masuod ka sa imong langitnong Amahan. Ug ang imong relasyon sa Diyos makatabang gayod kanimo sa pagbuntog sa negatibong pagbati. Unsa pay laing makatabang?

Hupti sa Hunahuna ang Seguradong Paglaom sa Umaabot

Bisan kon anaa kita sa malisod kaayong kahimtang, posible gihapon ang paghupot ug positibong panghunahuna. Sa unsang paagi? Ang Diyos naghatag kanatog seguradong paglaom sa umaabot. Kining kahibulongang paglaom gihubit ni apostol Pedro: ‘Adunay bag-ong mga langit ug usa ka bag-ong yuta nga atong ginapaabot sumala sa saad sa Diyos, ug niini magpuyo ang pagkamatarong.’ (2 Pedro 3:13) Unsay ipasabot niana?

Ang pamulong nga “bag-ong mga langit” sa pagkatinuod maoy usa ka gobyerno—ang langitnong Gingharian sa Diyos ubos sa pagmando ni Jesu-Kristo. Ang “bag-ong yuta” mao ang matarong nga mga tawo nga magpuyo unya dinhi sa yuta. Ubos sa pagmando sa “bag-ong mga langit,” ang katawhan dili na makasinatig negatibong pagbati. Ang Bibliya nagpasalig nga “pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.”—Pinadayag 21:4.

Seguradong mouyon ka nga makapalipay ug makapadasig gayod kanang mga pulonga. Kana nga palaaboton nga gitagana sa Diyos alang sa matuod nga mga Kristohanon gihubit sa Bibliya  ingong “makalilipay nga paglaom.” (Tito 2:13) Kon atong isentro ang atong hunahuna sa mga saad sa Diyos alang sa katawhan ug sa mga katarongan kon nganong makasalig kita sa maong mga saad, atong mahiklin ang negatibong pagbati.—Filipos 4:8.

Sa Bibliya, ang atong paglaom sa kaluwasan gipakasama sa usa ka helmet. (1 Tesalonica 5:8) Sa karaang panahon, ang usa ka sundalo dili mangahas sa pag-adto sa panggubatan nga walay helmet. Nahibalo siya nga kini manalipod kaniya sa dihang moatake ang kaaway. Sama nga ang helmet manalipod sa ulo, ang paglaom manalipod usab sa hunahuna. Kon kanunay natong hunahunaon ang atong paglaom, atong malikayan ang negatibong panghunahuna.

Oo, makahimo ka sa pagbuntog sa negatibong pagbati. Palandonga kon unsa ang panglantaw sa Diyos kanimo, ug hupti sa hunahuna ang imong paglaom sa umaabot. Makaseguro ka nga sa dili madugay ang negatibong pagbati mawala na hangtod sa hangtod!—Salmo 37:29.

[Mga footnote]

[Blurb sa panid 19]

“Ako nahibalo pag-ayo sa mga kasakit nga ilang giantos.”—EXODO 3:7, 8

[Blurb sa panid 20]

“Sa dihang ako naguol pag-ayo, ikaw naghupay ug naghatag kanakog kalinaw.”—SALMO 94:19, CONTEMPORARY ENGLISH VERSION

[Blurb sa panid 21]

“Ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.”—FILIPOS 4:7

[Kahon/Hulagway sa panid 20, 21]

Makahupayng mga Teksto Bahin Kang Jehova nga Diyos

“Si Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.”—EXODO 34:6.

“Ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”—2 CRONICAS 16:9.

“Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—SALMO 34:18.

“Ikaw, Oh Jehova, maayo ug andam sa pagpasaylo.”—SALMO 86:5.

“Si Jehova maayo sa tanan, ug ang iyang mga kaluoy anaa sa ibabaw sa tanan niyang mga buhat.”—SALMO 145:9.

“Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—ISAIAS 41:13.

“Dalayegon . . . ang Amahan sa malumong mga kaluoy ug ang Diyos sa tanang paghupay.”—2 CORINTO 1:3.

“Makapasalig kita sa atong mga kasingkasing sa iyang atubangan bahin sa bisan unsa nga ihukom kanato sa atong mga kasingkasing, tungod kay ang Diyos mas labaw kay sa atong mga kasingkasing ug nahibalo sa tanang butang.”—1 JUAN 3:19, 20.

[Kahon/Mga hulagway sa panid 22]

Ilang Nabuntog ang Negatibong Pagbati

“Palahubog ang akong amahan ug grabe ang akong pag-antos tungod niya. Sulod sa taas nga panahon, mibati kong walay pulos. Apan sa dihang nagsugod ko sa pagtuon sa Bibliya uban sa mga Saksi ni Jehova, akong nakat-onan ang saad bahin sa kinabuhing walay kataposan dinhi sa yuta. Tungod niini, mibati kog kalipay. Ang pagbasa sa Bibliya nahimong regular nga bahin sa akong kinabuhi. Magdaladala ko kanunay ug Bibliya. Sa dihang mopatigbabaw kanako ang negatibong pagbati, paklion nako kini ug magbasag makahupayng mga teksto. Ang pagbasa bahin sa makapadaning mga hiyas sa Diyos nagpasalig kanako nga bililhon ko sa iyang panan-aw.”—Kátia, 33 anyos. c

“Naadik ko sa alkoholikong ilimnon, marijuana, cocaine, crack cocaine, ug nagsigeg simhot ug glue. Halos wala na koy kabtangan, ug nahimo kong makililimos. Apan sa dihang nagtuon ko sa Bibliya uban sa mga Saksi ni Jehova, nausab ang akong kinabuhi. Ako nasuod sa Diyos. Bisan tuod usahay hasolon ko sa akong konsensiya ug mobating walay pulos, ako nakakat-on nga mosalig sa kaluoy ug gugma sa Diyos. Nakaseguro ko nga ang Diyos padayong maghatag kanakog kusog aron akong mabuntog ang negatibong pagbati. Nagpasalamat gayod ko nga nakakat-on ko sa kamatuoran sa Bibliya.—Renato, 37 anyos.

“Sukad sa akong pagkabata, kanunay nakong itandi ang akong kaugalingon sa akong magulang nga lalaki. Mobati ko nga mas maayo siya kay kanako. Hangtod karon wala gihapon koy salig sa akong kaugalingon. Apan determinado ko nga dili magpadaog niini. Kanunay kong nag-ampo kang Jehova, ug iya kong gitabangan sa pagbuntog sa akong negatibong pagbati. Makapadasig kaayo ang pagkahibalo nga ang Diyos tinuod nga nahigugma ug nahangawa kanako!”—Roberta, 45 anyos.

[Footnote]