NAHIBALO ka ba kon unsa kini nga Gingharian?— a Kini mao ang gitudlo ni Jesus nga atong iampo. Gitudloan kita niya nga mohangyo sa Diyos: “Paanhia ang imong gingharian.” (Mateo 6:9, 10) Halos 2,000 na ka tuig nga ang mga sumusunod ni Jesus nag-ampo sa Diyos nga moabot ang Iyang Gingharian. Nag-ampo ka ba usab niana?—

Aron masabtan nimo kon unsa ang gingharian, kinahanglang mahibalo ka kon unsa ang hari. Ang hari maoy usa ka tawong magmamando. Ang mga lugar nga iyang gimandoan mao ang iyang teritoryo. Ang teritoryo sa Gingharian sa Diyos naglakip sa tibuok yuta. Sa dihang magmando na ang Gingharian sa Diyos, ang tanang tawo sa yuta makatagamtam sa iyang mga panalangin.

Ang Gingharian sa Diyos maoy usa ka langitnong gobyerno. Ang Bibliya diha sa Isaias 9:6 naghisgot bahin sa Magmamando niini nga gobyerno. Matikdi kon unsay giingon niining tekstoha bahin kaniya: “Adunay usa ka bata nga natawo alang kanato, . . . ug ang prinsipenhong pagmando mahipatong sa iyang abaga. Ug ang iyang ngalan pagatawgon nga . . . Prinsipe sa Pakigdait.”

Nahibalo ka ba kon unsa ang prinsipe?— Siya maoy anak sa hari. Kinsa ang kinalabwang Hari sa langit?— Husto ka kon ang imong tubag mao si Jehova. Ang Bibliya nagtawag kaniya ingong “ang Labing Hataas ibabaw sa tibuok nga yuta.” (Salmo 83:18) Diha sa Bibliya, si Jesus sagad nga gitawag nga “Anak sa Diyos.” Ang usa ka rason mao nga si Jehova ang naghatag sa kinabuhi ni Jesus. Si Jehova mao ang tinuod nga Amahan ni Jesus.—Lucas 1:34, 35; Juan 1:34, 49; 3:17; 11:27; 20:31; Buhat 9:20.

Ang Gingharian sa Diyos nga gitudlo ni Jesus nga atong iampo maoy usa ka espesyal nga gobyerno. Kini usa ka “prinsipenhong pagmando” tungod kay si Jehova maghimo sa iyang Anak nga si Jesus ingong Magmamando, o Hari, sa Gingharian. Apan nahibalo ka ba nga dunay ubang mga tawong pilion nga magmando ingong mga hari kauban ni Jesus diha sa Gingharian sa iyang Amahan?— Hisgotan nato sila.

Sa wala pa mamatay si Jesus, iyang giingnan ang iyang matinumanong mga apostoles nga siya moadto sa “balay” sa iyang Amahan sa langit. “Ako moadto aron sa pag-andam ug dapit alang kaninyo,” siya miingon, “aron nga kon asa ako kamo atua usab.” (Juan 14:1-3) Nahibalo ka ba kon unsay buhaton sa mga apostoles ug sa uban  pa didto sa langit kauban ni Jesus?— Sila “magamando ingong mga hari uban kaniya.” Ang Bibliya nagbutyag kanato kon pilay magmando kauban ni Jesus ingong hari. Ang ilang gidaghanon maoy 144,000.—Pinadayag 14:1, 3; 20:6.

Unsa kahay kahimtang sa yuta sa dihang magmando na ang Prinsipe sa Pakigdait ug ang iyang kaubang 144,000?— Nindot gayod kaayo! Wala na unyay gubat. Ang mga mananap dili na bangis. Wala nay masakit ug mamatay. Ang buta makakita na, ang mga bungol makadungog na, ang mga bakol makadagan na ug makaambak samag osa. Abunda na unya ang pagkaon para sa tanan. Ug ang tanang tawo maghigugmaay sa usag usa ingon sa gitudlo ni Jesus nga buhaton sa iyang mga tinun-an. (Juan 13:34, 35) Atong buksan ang Bibliya diha sa Isaias ug atong basahon ang nindot kaayong mga saad nga matuman unya.—Isaias 2:4; 11:6-11; 25:8; 33:24; 35:5, 6; 65:21-24.

Sukad nga gitudloan ni Jesus ang mga tawo nga mag-ampo nga “paanhia ang imong gingharian,” milyon-milyon na ang nakakat-on bahin niana nga Gingharian. Ang pagkahibalo niana nakapausab sa ilang kinabuhi. Sa dili madugay, sa dihang ang Gingharian moabot na ug pulihan na ang mga gobyerno sa yuta, ang tanang nag-alagad kang Jehova nga Diyos ug sa iyang piniling Magmamando, si Jesu-Kristo, makatagamtam ug kalinaw, hingpit nga panglawas, ug kalipay.—Juan 17:3.