Ang Bibliya Makabag-o sa Kinabuhi

UNSAY nakaaghat sa usa ka rebelde ug kawatan nga magbag-o? Nganong gibag-o sa usa ka kampeyon sa karate ang iyang mga tumong sa kinabuhi? Sa unsang paagi nagantihan ang hugot nga pagtuo sa amahan nga mabag-o ang iyang anak? Basaha ang mosunod nga mga asoy aron makaplagan ang mga tubag.

“Bisan pa sa Akong Kagahapon, Ako Karon Nagmalipayon.”—GARRY P. AMBROCIO

EDAD: 47

NASOD: PILIPINAS

KANIADTO: REBELDE

KAAGI: Ako nagdako sa gamayng lungsod sa Vintar. Ang lapad nga patag sa walog nga akong gipuy-an gilibotan sa lunhawng kabukiran, hinlong kasapaan, ug lab-as nga hangin. Bisan pa niini, lisod ang kinabuhi. Ang mga tawo mangawat sa among binuhing mga hayop ug manglungkab sa among balay.

Sa dihang tin-edyer pa ako, kusog ko moinom uban sa akong mga barkada, manigarilyo, ug mangawat aron masuportahan ang akong mga bisyo. Gikawat gani nako ang alahas sa akong lola. Gidudahan ko sa mga sundalo nga sakop kono ko sa New People’s Army (NPA) ug kanunay ko nilang kulatahon. Tungod niini, ako nakadesidir nga magrebelde. Sa lima ka tuig, nagpuyo ko sa kabukiran uban sa mga NPA. Pait ang kinabuhi. Kanunay ming magbalhinbalhin kay gipangita sa mga sundalo. Sa ulahi, ako gikapoy na sa pagtagotago sa kabukiran, maong ako misurender sa gobernador sa Ilocos Norte. Maayo ang iyang pagtratar kanako, ug gani gitabangan kong makakitag desenteng trabaho. Apan, nagpadayon gihapon ang akong daotang binuhatan, nga manglungkab ug mga balay ug manghulga ug mga tawo.

GIBAG-O SA BIBLIYA ANG AKONG KINABUHI: Duna koy kauban sa trabaho nga ginganlag Loida nga usa sa mga Saksi ni Jehova. Pinaagi kaniya, nahimamat ko si Jovencio ug iya kong gitun-an sa Bibliya. Apan lisod bag-ohon ang akong naandang paagi sa kinabuhi. Manigarilyo ko sa dili pa moabot si Jovencio alang sa among pagtuon sa Bibliya, ug nagpadayon gihapon ko sa ilegal nga mga kalihokan. Sa kataposan, nadakpan ko sa mga polis ug napriso sa 11 ka bulan. Nianang panahona, ako nag-ampo kang Jehova, nga nangamuyo sa iyang tabang. Nangayo ko sa iyang pasaylo ug sa iyang balaang espiritu aron ako giyahan ug lig-onon.

Sa ulahi, giduaw ko sa usa sa mga Saksi ni Jehova sa prisohan ug gidad-an kog Bibliya. Gibasa ko kini ug akong nasayran nga si Jehova maluluy-on, mahigugmaon, ug mapinasayloon. Naamgohan ko nga si Jehova dugay nang nagmaluluy-on kanako ug naghatag ug kahigayonan aron makakat-on ko sa iyang mga paagi. Ako naghangyo kaniya nga hatagan kog kusog aron mabuntog ang akong daotang mga binuhatan.  Dakog epekto kanako ang akong nabasa sa Proverbio 27:11. Niini nga teksto daw si Jehova direktang nakigsulti kanako. Kini nag-ingon: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.”

Human makagawas sa prisohan, ako nagpadayon sa pagtuon sa Bibliya uban sa mga Saksi, nakig-uban na usab sa ilang mga panagkatigom, ug nagsugod sa pagpadapat sa mga prinsipyo sa Bibliya. Sa kataposan, uban sa tabang ni Jehova, akong nahunong ang daotang mga binuhatan. Unya akong gipahinungod ang akong kinabuhi kang Jehova nga Diyos.

MGA KAAYOHAN NGA AKONG NABATONAN: Bisan pa sa akong kagahapon, ako karon nagmalipayon. Bisag naulipon ako sa mahugaw nga binuhatan, apan ako nabag-o na. (Colosas 3:9, 10) Karon, ako nakapribilehiyo sa pagpakig-uban sa hinlong katawhan ni Jehova ug sa pagtabang sa uban nga makakat-on bahin sa labing-gamhanang Diyos nga si Jehova.

“Buot Kong Morepresentar sa Brazil.”—JULIANA APARECIDA SANTANA ESCUDEIRO

EDAD: 31

NASOD: BRAZIL

KANIADTO: KARATISTA

KAAGI: Ako nagdako sa Londrina. Bisan ang kadaghanan sa maong dapit mga kabos, kini hinlo ug malinawon. Sa diyes anyos pa ko, gidasig ko sa akong magulang nga lalaki nga moapil ug karate nga gitawag ug tae kwon do, nga nagkahulogang “ang paagi sa mga kamot ug tiil.” Ang akong Papa wala mouyon niini apan sa kadugayan gipaundayonan ko.

Nagpraktis ko pag-ayo ug kadaghan ko mahimong kampeyon sa tae kwon do sa estado sa Parana. Sa ulahi, nakadaog kog nasodnong mga kampeyonato, ug sa 1993, ako ang giila nga kampeyon sa Brazil sa tae kwon do. Gusto kong moapil sa internasyonal nga mga kampeyonato. Apan kabos ang akong pamilya ug walay ikagasto kanako sa pag-adto sa laing nasod.

Naglaom ko nga iapil ang tae kwon do sa mga Olympic, ug nahitabo ra gyod kini. Buot kong morepresentar sa Brazil sa Olympic Games, busa nagpraktis ko pag-ayo ug may nag-esponsor kanako aron ako makaapil sa sangka sa France, Vietnam, South Korea, ug Japan, ug sa South American Games. Ang akong sunod nga tumong mao ang pag-apil sa Pan American Games, ug maayo kaayo ang akong nahimo mao nga usa ko sa tulo nga napili nga makigsangka niana sa Santo Domingo, Dominican Republic, sa 2003.

GIBAG-O SA BIBLIYA ANG AKONG KINABUHI: Niadtong 2001, kami sa akong trato nakahibalag ug mga Saksi ni Jehova, ug ila ming gitun-an sa Bibliya. Sa sinugdan, wala kaayo koy interes. Pirme kong kapoyon ug makatulog sa among pagtuon. Bisan pa niana, nasilsil sa akong kasingkasing ang akong natun-an ug nadayag kini sa dihang ako miatubang sa akong sunod nga dakong sangka.

Tungod kay napili ko alang sa tem sa Pan American Games, ang mga master sa tae kwon do nagpaapil kanako sa preliminaryong sangka. Sa dihang turno na nako nga makig-away, nagtindog lang ko nga nahiugnok, nga wala gayoy kadasig. Kalit nga misantop sa akong hunahuna  nga ang usa ka Kristohanon dili makig-away—bisan sa esport! Nahinumdom ko sa giingon sa Bibliya nga “higugmaon mo ang imong silingan.” (Mateo 19:19) Ako mitalikod na lang ug wala magpanuko sa pagbiya. Ang mga tawo nakurat nga nagtan-aw ug dili makatuo.

Sa akong pagpauli, ako namalandong kon unsay buhaton sa akong kinabuhi. Gikuha nako ang usa ka brosyur nga gipatik sa mga Saksi nga naghisgot kon unsay gikinahanglan sa Diyos kanato. Nabasa nako niini ang teksto sa Salmo 11:5 nga nag-ingon bahin kang Jehova: “Si bisan kinsa nga nahigugma sa kapintasan ginadumtan gayod sa Iyang kalag.” Kini nakapahigmata kanako, ug ako nakadesidir nga biyaan ang tae kwon do.

Ang akong mga master wala malipay. Naningkamot sila nga mabag-o ang akong hunahuna kay ako kono ang labing hawod sa nasod ug sa dili madugay makaapil na ako sa Olympic Games. Apan ako nakadesidir na.

Nianang tungora, kasal na kami sa akong trato. Siya nagsangyawan na uban sa mga Saksi. Siya mouli nga malipayon kaayo ug suginlan niya ako sa tanan nga iyang gipakigsulti sa mga tawo. Nasayod ko nga kon buot kong makigbahin sa pagsangyaw, kinahanglang mohimo kog kabag-ohan sa akong kinabuhi. Miundang ko sa akong kanhing relihiyon ug sa ulahi nahimong kuwalipikado ingong Saksi.

MGA KAAYOHAN NGA AKONG NABATONAN: Kami sa akong bana malipayon kaayo ug nahiusa tungod kay naningkamot ming ipadapat ang mga prinsipyo sa Bibliya. Gikalipay ko ang pagpaluyo kaniya samtang siya nagtabang sa pag-atiman sa among gipasakopan nga kongregasyon. Puwede unta kong makaangkon ug bulawang medalya ug mahimong bantogan. Apan, akong nakita nga walay ikatanyag kining daotang kalibotan nga molabaw pa kay sa pribilehiyo sa pag-alagad kang Jehova.

“Wala Gayod Mawad-ig Paglaom Kanako ang Akong Amahan.”—INGO ZIMMERMANN

EDAD: 44

NASOD: GERMANY

KANIADTO: GUWARDIYA SA DISKOHAN

KAAGI: Ako natawo sa usa ka panimalay nga managlahi ug relihiyon, sa lungsod sa Gelsenkirchen nga minahan ug karbon. Ang akong Papa usa sa mga Saksi ni Jehova. Supak ang akong Mama nga padak-on ko ug ang akong mga igsoon sa tinuohan sa akong Papa. Si Papa magtrabaho ug napulo ka oras o kapin pa sulod sa usa ka adlaw sa pagdrayb ug mga trak. Sagad siya mosugod na sa pagtrabaho sa alas dos o alas tres sa buntag. Apan, kanunay niyang giatiman ang among espirituwalidad. Bisan pa niana, wala ko pabilhi ang iyang mga paningkamot.

Sa nag-15 anyos na ko, gilaay na ko sa mga panagkatigom nga gipatambongan ni Papa kanako, ug ako nagrebelde. Usa ka tuig sa ulahi, miapil ko ug klab sa boksing. Sulod sa misunod nga duha ka tuig, nagbinugoy ko ug nakapalabad kini sa ulo sa akong amahan. Milayas ko sa nag-edad kog 18.

Nabuang ko sa esport ug kaunom ko magpraktis  sa usa ka semana—magboksing ug unya magbarbel. Sa mga adlawng Sabado ug Dominggo, kami sa akong mga barkada mag-adtoan sa diskohan. Kas-a, nakaaway nako ang usa ka maton nga kustomer apan napildi ko siya. Nahibal-an kini sa tag-iya sa diskohan ug dihadiha gitanyagan ko nga himoong guwardiya. Dako ang suweldo, busa gidawat ko kini.

Kada Sabado ug Dominggo, magtindog ko sa pultahan sa diskohan ug ako ang magbuot kon kinsa ang pasudlon. Moabot ug mga 1,000 ka tawo ang mosulod, maong puliki kaayo ko. Ordinaryo na lang ang mga away. Hulgaon kog pusil ug buak nga botelya. Kadtong uban nga dili nako pasudlon o kadtong akong pagawason sa diskohan mag-atang sa gawas aron manimalos. Nianang tungora 20-anyos pa ko ug nagtuo kong way makalupig nako. Sa pagkatinuod, ako daling mosinta, agresibo, hambogiro, ambisyoso, ug gahig ulo.

GIBAG-O SA BIBLIYA ANG AKONG KINABUHI: Wala gayod mawad-ig paglaom kanako ang akong amahan. Iyang gihikay nga padad-an kog mga magasing Bantayanang Torre ug Pagmata! a sa akong gipuy-an. Nagtipun-og kini sa akong kuwarto nga wala mabasa. Dayon usa ka adlaw akong gibasa ang pipila niini. Tungod sa mga artikulo nga akong nabasa kon sa unsang paagi matapos ang politikanhon, ekonomikanhon, ug relihiyosong sistema gitawgan nako ang akong igsoong babaye. Siya ug ang iyang bana mga Saksi ni Jehova. Ila akong gitanyagan ug pagtuon sa Bibliya, ug ako kining gidawat.

Ang prinsipyo sa Galacia 6:7 nakaaghat kanako nga mohimog mga kausaban. Akong nakita nga bisan unsay akong buhaton, isulti, o pilion karon makaapektar kini sa akong kaugmaon. Nadasig usab ako pag-ayo sa giawhag sa Isaias 1:18, nga nag-ingon: “‘Ari kamo karon, ug tul-iron nato ang mga butang tali kanato,’ nag-ingon si Jehova. ‘Bisan tuod ang inyong mga sala sanag-pula, kini papution sama sa niyebe.’” Kini nakatabang kanako sukad sa akong pagtuon nga dili mobating dili takos o walay paglaom.

Sulod sa unom ka bulan, ako nakigbisog sa paghimog dakong kausaban sa akong kinabuhi. Kinahanglan kong talikdan ang daotang mga kaubanan. Busa gisultihan ko ang akong mga barkada nga ako nagtuon na sa Bibliya ug gipaambit kanila ang akong nakat-onan. Sila nagsugod sa paglikay kanako ug ila kong gibansagan ug pari. Pinaagi sa akong igsoong babaye, nakakaplag kog mas haom nga trabaho.

Ako nagsugod usab sa pagtambong sa mga tigom sa Kingdom Hall diin nagtambongan ang akong igsoong babaye ug ang iyang bana, bisan pag kadto 30 ka kilometros ang gilay-on. Dihay Kingdom Hall nga mas duol sa among balay, apan nahadlok kong makita sa mga tawo nga nakaila nako sukad sa bata pa ko. Nahadlok usab ko nga mamalaybalay ug magsangyaw sa dapit nga akong gipuy-an. Unsa kaha kon mahibalag nako kadtong akong gipagawas sa diskohan o ang usa nga akong gihatagag droga? Apan, may nakat-onan akong leksiyon sa akong pagbansay sa gym—nga ang kinalisdan nga ehersisyo mao ang labing hinungdanon. Busa, sa dihang ako kuwalipikado na, ako nakig-ambit sa pagsangyaw kutob sa maarangan.

Duna pay lain nakong buntogonon—dili ko ganahang magbasa o magtuon. Apan nasayod ko nga aron makabaton kog lig-ong pagtuo, kinahanglang magmakugihon ko sa pagtuon sa mga kamatuoran sa Bibliya. Sama sa pagbarbel, kinahanglan kang maningkamot aron mahimong kusgan.

MGA KAAYOHAN NGA AKONG NABATONAN: Ako mapasalamaton nga buhi pa ko! Kinahanglan gihapon kong magmabinantayon aron dili madaog sa akong mga kahuyangan. Apan ako nagmalipayon na karon sa akong kaminyoon uban sa akong asawa, nga may maayong Kristohanong personalidad. Taliwala sa mga Saksi ni Jehova, ako adunay tinuod nga mga higala nga kasaligan gayod. Lima ka tuig nang namatay ang akong Papa, apan sa wala pa siya mamatay, malipayon niyang nasaksihan ang pagbalik sa iyang anak.

[Footnote]