Sekreto 1

Higugmaa ang mga Tawo, Dili ang Salapi ug Kabtangan

UNSAY GITUDLO SA BIBLIYA? “Ang gugma sa salapi maoy gamot sa tanang matang sa makadaot nga mga butang.”—1Timoteo 6:10.

UNSA ANG HAGIT? Ang mga tig-anunsiyo magpit-os kanato aron dili kita makontento sa atong nabatonan. Buot nilang magsige tag trabaho aron dunay ikapalit ug mas bag-o, dekalidad, ug mahalon nga mga butang. Ang salapi madanihon, ug dali ra kitang mahigugma niini. Apan ang Bibliya nagpasidaan nga ang nahigugma sa bahandi walay pagkakontento. “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi,” nag-ingon si Haring Solomon.—Ecclesiastes 5:10.

UNSAY IMONG MAHIMO? Sundoga si Jesus, ug higugmaa ang mga tawo labaw kay sa mga butang. Gisakripisyo ni Jesus ang tanan, bisan ang iyang kinabuhi, tungod sa iyang gugma sa mga tawo. (Juan 15:13) Siya miingon: “Adunay labaw nga kalipay sa paghatag kay sa pagdawat.” (Buhat 20:35) Kon batasanon nato ang paghatag sa atong panahon ug kahinguhaan, mao usab kanay isukli sa mga tawo kanato. “Batasana ang paghatag” matod ni Jesus, “ug pagahatagan kamo sa mga tawo.” (Lucas 6:38) Kadtong mangagpas ug salapi ug kabtangan mahitumpawak sa kasakitan ug pag-antos. (1 Timoteo 6:9, 10) Sa laing bahin, bation nato ang tinuod nga pagkakontento kon gihigugma nato ang mga tawo ug kita usab ilang higugmaon.

Mahimo ba nimong pasimplehon ang imong estilo sa kinabuhi? Makunhoran ba nimo ang imong mga kabtangan o mga palaliton? Kon imo kanang buhaton, imong makita nga ikaw aduna diay panahon ug kusog alang sa mas hinungdanong mga butang—ang pagtabang sa mga tawo ug pag-alagad sa Diyos nga maoy tag-iya sa tanan nimong nabatonan.—Mateo 6:24; Buhat 17:28.

[Hulagway sa panid 4]

“Batasana ang paghatag, ug pagahatagan kamo sa mga tawo”