Hupaya ang Nagbangotan, Sama sa Gihimo ni Jesus

SI Lazaro nga taga-Betania grabeng nasakit. Ang iyang mga igsoong si Marta ug Maria nagpasugog mga tawo aron pahibaloon ang ilang suod nga higalang si Jesus. Apan si Lazaro namatay tungod sa iyang sakit. Samtang siya didto pa sa lubnganan, ang iyang mga higala ug silingan miduaw kang Marta ug Maria “aron sa paghupay kanila.” (Juan 11:19) Sa nakaabot ra gayod si Jesus sa Betania, iyang giadto ang iyang minahal nga mga higala. Kon palandongon nato ang iyang gisulti ug gibuhat, duna tay makat-onan kon unsaon paghupay ang mga nagbangotan.

Ang Imong Presensiya Hinungdanon

Aron makaabot sa Betania, si Jesus kinahanglang mopanaw ug mga duha ka adlaw, motabok sa Suba sa Jordan ug motungas sa titip ug naglikolikong dalan gikan sa Jerico. Si Marta misugat dayon kang Jesus didto sa gawas sa balangay. Sa ulahi, sa pagkadungog ni Maria nga miabot si Jesus, siya usab nagdali sa pag-adto kaniya. (Juan 10:40-42; 11:6, 17-20, 28, 29) Ang presensiya ni Jesus nakahupay gayod sa naguol pag-ayo nga magsoon.

 Karon, ang atong presensiya makapahupay usab sa mga nagbangotan. Si Scott ug Lydia, kansang sayis anyos nga anak nga si Theo namatay sa aksidente, miingon: “Gikinahanglan namo ang suporta sa pamilya ug mga higala. Sila nangadto sa ospital bisan sa tungang gabii. Nianang panahona, bisag wala silay ipamulong, ang ilang presensiya igo na aron ipakita nga sila nahingawa kanamo.”

Ang Bibliya nag-ingon nga sa dihang nakita ni Jesus ang mga tawo nga nanghilak tungod sa pagkamatay ni Lazaro, siya “naguol” ug “mihilak.” (Juan 11:33-35, 38) Wala isipa ni Jesus nga dili kinaiya sa lalaki ang paghilak atubangan sa daghan. Siya nakasabot ug misimpatiya sa ilang kasub-anan. Unsay atong makat-onan? Sa dihang moduaw sa mga nagbangotan, dili angayng ikaulaw nga ikaw usab mohilak duyog kanila. (Roma 12:15) Sa laing bahin, ayaw awhaga ang nagbangotan nga siya kinahanglang mohilak, kay mas gusto sa uban nga mohilak sa tago.

Mabinationg Magpatalinghog

Tingali may giandam na si Jesus nga mga pulong sa pagdasig alang kang Marta ug Maria, apan siya namati una kanila. (Juan 11:20, 21, 32) Sa dihang nakigsulti na siya kang Marta, siya nangutana, ug dayon siya nagpatalinghog.—Juan 11:25-27.

Ang maayong tigpatalinghog magpakitag tinuod nga kahingawa. Sa paghupay sa mga nagbangotan, kita kinahanglang magpatalinghog pag-ayo. Mahimong mosukna kitag mga pangutana aron dasigon sila nga mosultig dugang bahin sa ilang kasubo. Apan, ayaw pamugos nga makig-estorya kon gusto nila nga maghilom. Tingali sila gikapoy kaayo ug kinahanglag pahulay.

Tingali ang mga nagbangotan wala sa kaugalingon ug usahay balikbalik ang isulti. Ang uban magpahungaw sa ilang gibati. Si Marta ug Maria parehong miingon kang Jesus: “Ginoo, kon dinhi ka pa ang akong igsoon dili unta mamatay.” (Juan 11:21, 32) Unsay gihimo ni Jesus? Siya mapailobon ug mabinationg nagpatalinghog. Wala niya sila pugngi sa pagpahungaw sa ilang gibati. Dayag nga siya nakasabot kon unsa ka sakit ang ilang gibati.

Kon wala ka makatino kon unsay imong isulti sa dihang moduaw sa mga nagbangotan, tingali imong sugdan ang pakig-estorya pinaagi sa pagpangutana, “Gusto ba nimong estoryahan nato kini?” Unya patalinghogi pag-ayo ang iyang tubag. Tan-awa siya ug sabta ang iyang gibati.

Usa ka hagit ang pagsabot sa gibati sa mga nagbangotan. “Mausab ang among emosyon,” matod ni Lydia. “Usahay dili namo kapugngan nga mohilak pag-ayo atubangan sa mga bisita. Gusto lang mi makadungog ug pagdasig. Gipaningkamotan pag-ayo sa among mga higala nga masabtan ang among gibati.”

Mao gayod kini ang gihimo ni Jesus. Nasayod siya nga ang matag usa kanato adunay ‘hampak ug kasakit.’ (2 Cronicas 6:29) Managlahi ang iyang sanong sa gisulti sa duha ka magsoon. Si Marta nagpadayon sa pagsulti, busa si Jesus mitubay kaniya. Tungod kay si Maria naghilak, dili dugay ang iyang pakigsulti kaniya. (Juan 11:20-28, 32-35) Unsay atong makat-onan niini? Labing maayo nga pasagdan nato ang mga nagbangotan nga maoy manguna sa pagpakig-estorya. Makahupay gayod  kanila kon ikaw andam maminaw sa ilang mga sentimento.

Makahupay nga mga Pulong

Sa dihang si Maria ug Marta miingon kang Jesus: “Kon dinhi ka pa,” wala niya sila basola ni gihimo kadto nga isyu. Siya nagpasalig kang Marta: “Mobangon ang imong igsoon.” (Juan 11:23) Pinaagi niini, si Jesus nag-awhag kaniya nga magmapositibo ug malulutong nagpahinumdom kaniya nga duna pay paglaom.

Sa dihang makigsulti sa mga nagbangotan, hinumdomi nga bisag diyutay ra ang imong isulti, ang sinsero ug positibong mga pulong dako kaayog ikatabang. Makahatag kag paghupay pinaagi sa pagsulti o pagsulat. Sanglit ang mga sulat o card mabasa pag-usab, dako kinig ikatabang. Siyam ka bulan human mamatay si Bob nga iyang bana, gibasa pag-usab ni Kath ang tanang card nga iyang nadawat. “Gibati ko nga ilabinang nakatabang kini kanako nianang panahona,” matod niya. “Nakahupay gayod kini kanako.”

Unsay puwede nimong isulat sa condolence card? Mahimo nimong isulat ang kasinatian ninyong duha sa namatay o kaha ang iyang maayong hiyas. Si Kath miingon: “Ang maayong mga komento bahin kang Bob ug sa iyang kinaiya makapalipay ug makapalugmaw usab sa akong mga luha. Ang kataw-anan nga mga estorya bahin kaniya nakapahimuot kanako ug nakapahinumdom sa among malipayong panag-ubanay. Daghan sa mga card nga ako karong gipabilhan ang naundan ug mga teksto sa Bibliya.”

Pagtaganag Praktikal nga Tabang

Sa pagtabang ni Jesus sa pamilya ni Lazaro, duna siyay gihimo nga dili nato mahimo. Iyang gibanhaw si Lazaro. (Juan 11:43, 44) Apan dunay praktikal nga mga butang nga puwede natong himoon, sama sa pagluto, pagtaganag kasak-an sa mga bisita, paglaba, pag-atiman sa mga anak, pagpamalit, o pagtaganag transportasyon. Sa walay duhaduha, ang simpleng kapahayagan sa tiunay nga gugma pabilhan gayod sa mga nagbangotan.

May mga panahon nga tingali ang mga nagbangotan buot mag-inusara. Bisan pa niana, ikaw makahimog paagi nga maestorya sila sa nahiangayng panahon. “Walay nasayod kon kanus-a ka maulian sa imong kaguol,” matod sa usa ka nagbangotang inahan. Gihinumdoman sa pipila ang mga nagbangotan sa hinungdanong mga petsa sa ilang kinabuhi, sama sa anibersaryo sa kasal o sa kamatayon. Kon moduaw ka nianang panahona, ikaw mahimong bililhong higala panahon sa kasakit.—Proverbio 17:17.

Lakip sa paghupay nga gihatag ni Jesus mao ang paglaom nga iyang giingon sa iyang mga tinun-an: “Si Lazaro nga atong higala nagpahulay, apan moadto ako didto aron pukawon siya gikan sa pagkatulog.” (Juan 11:11) Gipasaligan ni Jesus ang iyang mga sumusunod nga dunay pagkabanhaw sa mga patay. Siya nangutana kang Marta: “Motuo ka ba niini?” Siya mitubag: “Oo, Ginoo.”—Juan 11:24-27.

Motuo ka ba nga banhawon ni Jesus ang mga patay? Kon mao, ipaambit kining bililhong paglaom ngadto sa mga nagbangotan. Hatagi silag praktikal nga tabang. Ang imong isulti ug buhaton makapahupay kanila.—1 Juan 3:18.

[Mapa sa panid 9]

(Alang sa aktuwal nga pagkahan-ay, tan-awa ang publikasyon)

PEREA

Suba sa Jordan

Jerico

Betania

Dagat sa Asin

Jerusalem

SAMARIA