Kanunayng Magmapasalamaton
Sekreto 3
Kanunayng Magmapasalamaton
UNSAY GITUDLO SA BIBLIYA? “Pagpasalamat sa tanang butang.”—1 Tesalonica 5:18.
UNSA ANG HAGIT? Gilibotan kita ug mga tawong mapahitas-on ug dili mapasalamaton, mga tinamdan nga makaimpluwensiya kanato. (2 Timoteo 3:1, 2) Dugang pa, tingali pun-an pa gayod nato ug mga kalihokan ang atong puliki nang daan nga kinabuhi. Mahimong mabug-atan na ta kaayo sa mga problema o malinga sa atong kaugalingong mga pangagpas nga tungod niana dili na nato mapabilhan kon unsay anaa na nato o mapasalamatan ang gihimo sa uban kanato.
UNSAY IMONG MAHIMO? Palandonga ang maayong mga butang nga imong napahimuslan karon. Oo, tingali nabug-atan ka sa mga problema. Apan tagda ang kahimtang ni Haring David. Usahay siya nahugno ug naluya pag-ayo sa mga pagsulay. Bisan pa niana, siya miampo sa Diyos: “Ako nagpalandong sa tanan mong kalihokan; Kinabubut-on kong gihunahuna kanunay ang mga buhat sa imong mga kamot.” (Salmo 143:3-5) Taliwala sa mga pagsulay, si David kanunayng mapasalamaton ug nagmakontento.
Hinumdomi ang natabang sa uban kanimo, ug pabilhi kini. Si Jesus nagpakitag talagsaong panig-ingnan niini. Pananglitan, sa dihang gibuboan sa iyang higalang si Maria ug mahalong lana ang iyang ulo ug tiil, ang uban nangutana: “Nganong nahitabo man kining pag-usik sa pinahumotan nga lana?” a Ilang gihunahuna nga ikabaligya unta ang lana ug ang halin niini ikahatag sa mga kabos. Si Jesus miingon: “Pasagdi lang siya. Nganong samokon ninyo siya?” Unya siya mipadayon: “Gibuhat niya ang iyang maarangan.” (Marcos 14:3-8; Juan 12:3) Inay tagdon kon unsay wala himoa ni Maria, gipabilhan ni Jesus kon unsa ang iyang nahimo.
Ayha pa mapabilhan sa uban ang ilang mga pamilya, higala, o ubang mga panalangin kon kini mawala na. Dili mo kini masinatian kon palandongon nimo ang maayong mga butang nga imong napahimuslan karon! Nganong dili nimo hunahunaon o ilista ang mga butang nga ikaw mapasalamaton?
Sanglit ang “matag maayong gasa” naggikan man sa Diyos, maayong magpasalamat ta kaniya diha sa pag-ampo. (Santiago 1:17) Kon pirme nato kining buhaton, madasig usab kita nga kanunayng magmapasalamaton ug magmakontento.—Filipos 4:6, 7.
[Footnote]
a Sa unang siglo, timaan sa pagkamaabiabihon ang pagbubog lana sa ulo sa bisita; ang pagbubog lana sa tiil maoy pagpakitag pagkamapainubsanon.
[Hulagway sa panid 6]
Ikaw ba mapasalamaton sa gihimo sa uban alang kanimo?
Basin Ganahan Pod Ka
PAGMATA!
Ang Tinamdan Dako ug Epekto!
Ang mga prinsipyo ba sa Bibliya makatabang kanimo nga mahimong mas malipayon?
ANG BANTAYANANG TORRE—TUN-ANANG EDISYON
“Pagkadaghan sa Imong mga Buhat, Oh Jehova!”
PAGMATA!
Kon Unsaon Pagpakitag Apresasyon
Kon ang magtiayon maningkamot sa pagmatikod sa mga hiyas sa usag usa, ang ilang relasyon molig-on. Unsay makatabang nimo sa pag-ugmad ug apresasyon?