Mga Magbabasa Nangutana . . .

Kinahanglan ba Kong Magpasakop ug Usa ka Relihiyon?

▪ Nagduhaduha ka ba sa pagpasakop ug usa ka relihiyon kay gingil-aran ka sa pagkasalingkapaw ug dili-pagsinabtanay sa mga magsisimba ug klerigo niini? Kon mao, ang imong gibati tingali susama sa giingon sa usa ka Pranses nga panultihon, “Kadtong duol sa simbahan sagad layo sa Diyos.”

Tingali imong gitahod ang Bibliya ug gibating ang gobyerno ug ang mga tawo angayng magtahod sa katungod sa usa nga magpasakop ug relihiyon. Apan tingali mangutana ka, ‘Giingon ba gayod sa Diyos nga kadtong gustong mosimba kaniya sa dalawatong paagi kinahanglang magpasakop ug usa ka relihiyon?

Ang tubag maoy oo. Nganong kita makatino niana? Dalawaton ba ang bisan unsang relihiyon?

Tagda ang pananglitan ni Jesus. May gipasakopan ba siyang relihiyon? Sa bata pa si Jesus, siya mikuyog sa iyang pamilyang Hudiyo ug sa uban kinsa mag-adtoan sa templo sa Jerusalem aron mosimba. (Lucas 2:41-43) Sa dako na siya, nakig-uban siya sa iyang isigka-Hudiyo sa pagsimba sa Diyos diha sa lokal nga sinagoga. (Lucas 4:14-16) Sa nakigsulti siya sa usa ka babaye nga lahig relihiyon, si Jesus miingon: “Kami nagasimba sa among nailhan.” (Juan 4:22) Dinhi, tin-awng gipaila ni Jesus nga siya sakop sa relihiyon sa mga Hudiyo.

Sa ulahi, si Jesus miingon nga sanglit ang kadaghanang Hudiyo nagsalikway kaniya, isalikway sa Diyos ang ilang hiwi nga paagi sa pagsimba. (Mateo 23:33–24:2) Apan, iyang gipakita nga kadtong buot mosimba sa Diyos sa dalawatong paagi kinahanglang magpasakop ug usa ka relihiyon. Siya miingon sa iyang mga sumusunod: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ang usa ka tinun-an dili gayod makapakita ug gugma sa iyang mga isigkamagtutuo kon siya wala makig-uban kanila. Gani, tin-awng giingon ni Jesus nga duna lamay duha ka matang sa relihiyon. Ang usa iyang gihubit ingong “halapad ug haluag” nga dalan nga “padulong sa kalaglagan.” Sa kasukwahi, siya miingon: “Sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.”—Mateo 7:13, 14.

Busa, dili kay bisan unsa lang nga relihiyon ang dalawaton. Ang Bibliya nagpasidaan batok sa pagpakig-uban kanilang “nagabaton sa dagway sa tinuohan apan nagapanghimakak sa gahom niini.” Kini dugang miingon: “likayi kining maong mga tawhana.” (2 Timoteo 3:5, Ang Biblia, Philippine Bible Society) Sa laing bahin, dako ang atong benepisyo kon makig-uban ta niadtong anaa sa dalan padulong sa kinabuhi. Kita makadawat ug pagdasig ug tabang karon ug usa ka masanag nga paglaom sa umaabot.—Hebreohanon 10:24, 25.

Unsaon nimo pagtino kon unsa nga relihiyon ang nagsubay sa sigpit nga dalan? Palihog susiha ang Biblikal nga tubag niini sa kapitulo 15 sa librong Unsay Tinuod nga Gitudlo sa Bibliya? a Kining libroha motabang kanimo sa paghimog maalamong desisyon kon unsang relihiyona ang imong pasakopan.

[Footnote]