Sekreto 4

Pilia Pag-ayo ang Imong mga Higala

UNSAY GITUDLO SA BIBLIYA? “Siya nga nagalakaw uban sa mga tawong maalamon mahimong maalamon.”—Proverbio 13:20.

UNSA ANG HAGIT? Ang atong mga higala adunay positibo o negatibong epekto sa atong pagkakontento. Ang ilang mga tinamdan ug sinultihan makaapektar gayod sa atong panglantaw sa kinabuhi.—1 Corinto 15:33.

Tagda pananglitan ang asoy sa Bibliya bahin sa 12 ka tawo nga mibalik gikan sa ilang misyon sa Canaan. Ang kadaghanan kanila ‘nagpadayon sa pagdalag daotang taho ngadto sa mga anak sa Israel mahitungod sa yuta nga ilang giespiyahan.’ Bisan pa niana, duha kanila ang nagdalag maayong taho bahin sa Canaan, nga gani nagtawag niini nga “maayo gayod kaayo nga yuta.” Apan ang negatibong taho nakaapektar sa katawhan. Ang asoy nag-ingon nga ‘ang tibuok katigoman mipatugbaw sa ilang tingog ug ang tanang anak sa Israel nagbagulbol.’—Numeros 13:30–14:9.

Daghan usab karon ang “mga bagulbolan, mga reklamador bahin sa ilang kahimtang sa kinabuhi.” (Judas 16) Kon ingon niini ang imong mga higala, lisod nga magpabiling kontento.

UNSAY IMONG MAHIMO? Panid-i ang pag-estoryahay ninyo sa imong mga higala. Kanunay bang manghambog ang imong mga higala sa mga butang nga ilang nabatonan, o kanunay ba silang magreklamo bahin sa mga butang nga wala nila mabatoni? Unsa kang matanga sa higala kanila? Pasinahon ba nimo sila o dasigon nga magmakontento kon unsay anaa kanila?

Tagda ang pananglitan ni David ug sa anak ni Haring Saul nga si Jonatan. Si David nahimong kagiw sa kamingawan. Si Haring Saul nasina kang David ug gusto niya kining patyon. Apan si Jonatan, nga mao unta ang mahimong sunod nga hari, nahimong usa sa mga suod nga higala ni David. Giila ni Jonatan nga si David mao ang gitudlo sa Diyos ingong sunod nga hari ug siya nalipay sa pagsuportar sa iyang higala.—1 Samuel 19:1, 2; 20:30-33; 23:14-18.

Gusto nimong makabaton ug ingon niana nga mga higala, nga buot magmakontento ug nagtinguha sa imong kaayohan. (Proverbio 17:17) Siyempre, aron makabaton sa maong matang sa mga higala, kinahanglang ipasundayag usab nimo kana nga mga hiyas.—Filipos 2:3, 4.

[Hulagway sa panid 7]

Ang imo bang mga higala adunay positibo o negatibong epekto sa imong pagkakontento?