Sekreto 5

Tagan-i ang Imong Espirituwal nga Panginahanglan

UNSAY GITUDLO SA BIBLIYA? “Malipayon kadtong mahunahunaon sa ilang espirituwal nga panginahanglan.”—Mateo 5:3.

UNSA ANG HAGIT? Ang kadaghanan sa linibo ka relihiyon karon nagtudlog nagkasumpaking mga paagi kon unsaon pagtagana sa imong espirituwal nga panginahanglan. Unsaon nimo pagkasayod kon hain niini ang nagtudlo sa kamatuoran ug giuyonan sa Diyos? Ang pipila ka iladong mga awtor miingon nga ang pagtuo ug pagsimba sa Diyos dili makataronganon, gani makadaot. Ingon niini ang pagsumaryo sa magasing Maclean’s sa giingon sa usa ka prominenteng ateyista: “Kay ang Kristiyanidad nagtudlo mag butang nga dili matugkad sa siyensiya . . . ang kinabuhi nahimo na hinuong dili kaayo bililhon ug tungod niini ang mga tawo makiling sa pagbuhat ug kapintasan.”

UNSAY IMONG MAHIMO? Susiha ang ebidensiya nga ang Diyos naglungtad. (Roma 1:20; Hebreohanon 3:4) Ayaw tugoting may magpaluya kanimo sa pagkaplag sa tubag niining hinungdanong mga pangutana: Nganong kita ania dinhi? Aduna bay kinabuhi luyo sa kamatayon? Nganong dunay daghan kaayong pag-antos? Unsay gikinahanglan sa Diyos kanako? Ang pagkahibalo sa mga tubag niini hinungdanon alang sa imong dumalayong katagbawan.

Apan, ayaw dayog tuohi ang isulti sa uban kanimo. Gidasig ka sa Bibliya nga gamiton ang imong “gahom sa pagpangatarongan” aron mapamatud-an ang imong kaugalingon nga dalawaton sa Diyos. (Roma 12:1, 2) Ikaw gantihan sa imong mga paningkamot. Kon ikaw magtuon sa Bibliya ug ipadapat ang tambag niini, imong malikayan ang mga problema, mamenosan ang kabalaka, ug ikaw mas malipayon. Makasalig ka gayod niini. Minilyon sa katawhan nga gikan sa tanang rasa ang nakabenepisyo sa pagkakat-on sa kamatuoran bahin sa Diyos ug sa iyang katuyoan. Pananglitan, basaha ang tinuod nga mga asoy sa kinabuhi sa panid 18-21 niini nga magasin.

Samtang ikaw nakabenepisyo sa pagpadapat sa maalamong tambag sa Bibliya, mas molalom ang imong debosyon sa Diyos. Nganong dili dawaton ang imbitasyon nga magtuon ug Bibliya uban sa mga Saksi ni Jehova? Kon imo kanang buhaton, lagmit bation nimo nga tinuod ang giingon ni apostol Pablo, kinsa misulat: “Kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento.”—1 Timoteo 6:6.

[Hulagway sa panid 8]

Pamatud-i ang imong kaugalingon nga dalawaton sa Diyos