Kon Unsay Atong Makat-onan Kang Jesus

Unsay Mahimo sa Espiritung mga Linalang Kanato?

Si Jesus nagpuyo sa langit uban sa iyang amahan “sa wala pa ang kalibotan.” (Juan 17:5) Busa, takos gayod siya sa pagtubag sa mosunod nga mga pangutana.

Ang mga manulonda interesado ba kanato?

▪ Atong nasayran kang Jesus nga ang mga manulonda interesado kaayo sa mga tawo. Siya miingon: “May kalipay taliwala sa mga manulonda sa Diyos tungod sa usa ka makasasala nga maghinulsol.”—Lucas 15:10.

Gibutyag ni Jesus nga ang mga manulonda gihatagag responsibilidad sa pagtabang sa espirituwalidad sa mga alagad sa Diyos. Busa, sa dihang gipasidan-an ni Jesus ang iyang mga tinun-an aron dili makapandol sa uban, siya miingon: “Tinoa nga dili ninyo tamayon ang usa niining mga gagmay; kay sultihan ko kamo nga ang ilang mga manulonda sa langit kanunayng makakita sa nawong sa akong Amahan nga anaa sa langit.” (Mateo 18:10) Wala ipasabot ni Jesus nga ang iyang mga sumusunod adunay tagsatagsa ka manulondang magbalantay. Apan iyang gipakita nga ang mga manulondang nag-alagad sa Diyos interesado gayod sa mga membro sa Kristohanong kongregasyon.

 Sa unsang paagi ang Yawa makadaot kanato?

▪ Nagpasidaan si Jesus sa iyang mga sumusunod nga naningkamot ang Yawa sa pagpugong sa mga tawo nga makakat-on sa kamatuoran bahin sa Diyos. Siya miingon: “Sa dihang may bisan kinsa nga magapamati sa pulong sa gingharian apan dili makasabot sa diwa niini, ang usa nga daotan moabot ug mosakmit sa napugas diha sa iyang kasingkasing.”—Mateo 13:19.

Giyagyag ni Jesus ang usa ka paagi sa paglimbong ni Satanas sa mga tawo. Gigamit niya ang ilustrasyon bahin sa tawong nagpugas ug binhi sa trigo sa iyang uma. Ang tawo nagrepresentar kang Jesus, ug ang trigo, sa tinuod nga mga Kristohanon nga magmando uban kang Jesus didto sa langit. Apan, ang usa ka kaaway miabot ug “gisapawan pagpugas ug mga bunglayon ang mga trigo.” Ang mga bunglayon mao ang mini nga mga Kristohanon. “Ang kaaway nga nagpugas kanila mao ang Yawa.” (Mateo 13:25, 39) Maingon nga ang mga bunglayon daw mga uhay sa trigo tan-awon, ang mini nga mga Kristohanon daw tinuod usab nga mga magsisimba. Ang mga relihiyon nga nagtudlog bakak nga mga doktrina naglimbong sa mga tawo aron mosupak sa Diyos. Gigamit kini ni Satanas aron ang mga tawo dili mahimong higala ni Jehova.

Unsay atong proteksiyon batok kang Satanas?

▪ Si Jesus nagtawag kang Satanas nga “ang magmamando niining kalibotana.” (Juan 14:30) Gibutyag ni Jesus sa pag-ampo kon unsaon nato pagbatog proteksiyon batok kang Satanas. Labot sa iyang mga tinun-an, si Jesus miampo sa iyang langitnong Amahan: ‘Bantayi sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan. Balaana sila pinaagi sa kamatuoran; ang imong pulong maoy kamatuoran.’ (Juan 17:15-17) Ang kahibalo bahin sa Bibliya makapanalipod kanato nga dili maimpluwensiyahan sa kalibotan nga gimandoan sa Yawa.

Sa unsang paagi ang mga manulonda makatabang kanato karon?

▪ “Sa kataposan sa sistema sa mga butang,” matod ni Jesus, “ang mga manulonda manggula ug magalain sa mga daotan gikan sa mga matarong.” (Mateo 13:49) Kita nagkinabuhi na sa “kataposan sa sistema sa mga butang,” ug minilyon ang misanong sa maayong balita sa Gingharian sa Diyos.—Mateo 24:3, 14.

Apan dili tanang nagtuon sa Bibliya ang makabaton sa iyang pag-uyon. Gigiyahan sa mga manulonda ang buluhaton sa mga alagad ni Jehova, ug ang mga tawong tinuod nga nahigugma sa Diyos gilain gikan niadtong dili gustong magpadapat sa ilang nakat-onan. Bahin niadtong giuyonan sa Diyos, si Jesus miingon: “Mao kini sila nga, human makadungog sa pulong uban ang maputli ug maayong kasingkasing, magpadayon sa paghupot niini ug magapamunga uban ang paglahutay.”—Lucas 8:15.

Alang sa dugang impormasyon, tan-awa ang kapitulo 10 niini nga libro, Unsay Tinuod nga Gitudlo sa Bibliya? nga gipatik sa mga Saksi ni Jehova.

[Hulagway sa panid 16]

Ang mga manulonda nagtabang sa pagpanigom sa sinserong mga tawo aron makasulod sa Kristohanong kongregasyon