Panan-awon Bahin sa Dominyo sa mga Espiritu

TUTOKI pag-ayo ang langit—makakita ka bag espiritung persona? Paminaw pag-ayo—makadungog ka ba kanila? Dili gayod. Apan, tingali nakaseguro ka nga ang mga espiritu naglungtad. Sila intelihente ug gamhanan kaayo, ug may kaugalingong mga ngalan ug mga personalidad. Ang uban motabang, apan ang uban buot modaot kanato. Silang tanan interesado kanato.

Ang matuod nga Diyos mismo maoy usa ka Espiritu. (Juan 4:24) Siya adunay talagsaong ngalan nga nagpalahi kaniya sa daghang bakak nga mga diyos. Ang iyang ngalan maoy Jehova. (Salmo 83:18) Ang salmista misulat: “Si Jehova dako ug dalayegon uyamot. Siya makalilisang labaw pa sa tanang ubang mga diyos. Kay ang tanang diyos sa mga katawhan maoy walay-bili nga mga diyos; apan si Jehova, siya nagbuhat sa mga langit. Ang dignidad ug kahalangdon anaa sa atubangan niya; ang kusog ug katahom anaa sa iyang sangtuwaryo.”—Salmo 96:4-6.

Mga Panan-awon Bahin sa Matuod nga Diyos

Ang Bibliya nag-ingon: “Walay tawo nga nakakita sa Diyos sa bisan unsang panahon.” (Juan 1:18) Dili nato matukib ang Iyang panagway ug kahalangdon, samang ang kolor dili ikahubit ngadto sa usa nga natawong buta. Apan sama nga ang usa ka maayong magtutudlo nagpatin-aw ug komplikadong mga butang sa mga estudyante sa paaging masabtan, gipatin-aw usab sa Diyos kanato diha sa Bibliya ang dili makitang mga butang pinaagi sa mga butang nga atong makita. Pinaagi sa mga panan-awon nga gipakita ngadto sa matinumanong mga alagad kaniadto, gitabangan ta ni Jehova nga mahanduraw kon unsay anaa sa langit ug masabtan kon sa unsang paagi kita nalangkit sa nagpuyo niana.

Pananglitan, sa panan-awon nga nakita ni Ezequiel, ang himaya ni Jehova gihubit ingong kalayo, kahayag, batong sapiro, ug balangaw. Sa laing panan-awon, nakita ni apostol Juan nga si Jehova naglingkod sa trono ug “may panagway nga sama sa usa ka batong haspe ug sa usa ka bililhong pulag-bulok nga bato,” dugang pa niana “ang trono gilibotan sa usa ka balangaw nga sama ug esmeralda tan-awon.” Kini naghubit kanato nga ang presensiya ni Jehova talagsaon ug nagasidlak sa katahom, maanindot, ug malinawon.—Pinadayag 4:2, 3; Ezequiel 1:26-28.

Ang propetang si Daniel usab adunay panan-awon bahin kang Jehova, diin iyang nakita ang “napulo ka libo ka napulo ka libo [ka manulonda] nga nagbarog diha sa atubangan [ni Jehova].” (Daniel 7:10) Pagkakahibulongan nga talan-awon! Kon mahingangha ka man ugaling nga makakitag usa ka manulonda bisan sa panan-awon, unsa pa kaha kon imong makita  ang tinagpulo ka libong hingpit nga mga manulonda!

Sa Bibliya duolag 400 ka beses gihisgotan ang mga manulonda, ug ang ilang mga ranggo naglakip sa mga serapin ug kerubin. Ang Grego ug Hebreohanong pulong nga gihubad ug “manulonda” diha sa Bibliya parehong nagkahulogang “mensahero.” Busa ang mga manulonda makakomunikar sa usag-usa, ug kaniadto sila nakigkomunikar sa mga tawo. Ang mga manulonda dili mga tawo kanhi nga nagpuyo sa yuta. Dugay nang gilalang ni Jehova kining espirituhanong mga persona sa wala pa lalanga ang tawo.—Job 38:4-7.

Sa panan-awon ni Daniel, ang daghang panon sa mga manulonda nagkatigom aron mosaksi sa usa ka hinungdanong panghitabo. Unya nakita ni Daniel ang “sama sa anak sa tawo” nga miduol sa trono ni Jehova ug gihatagag “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:13, 14) Ang “anak sa tawo,” nga dakog ranggo sa dominyo sa mga espiritu, mao ang nabanhawng si Jesu-Kristo, nga gihatagag katungod sa pagmando sa tibuok yuta. Ang iyang pagmando maoy mopuli sa tanang gobyerno sa tawo ug magtapos sa sakit, kasub-anan, pagdaogdaog, kakabos, ug bisan sa kamatayon.—Daniel 2:44.

Ang pagkahari ni Jesus tinong nakapalipay kaayo sa matinumanong mga manulonda nga nagtinguha sa kaayohan sa katawhan. Apan, ikasubo, dili tanang espirituhanong mga linalang ang mibati niana.

Mga Kaaway sa Diyos ug sa Tawo

Sukad sa pagkalalang sa tawo, usa sa mga manulonda nga nahupngan sa tinguhang  pagasimbahon ang mitalikod kang Jehova ug naghimo sa iyang kaugalingon nga Satanas, nga nagkahulogang “Magsusukol.” Si Satanas, ang bug-os nga larawan sa pagkadaotan, nakigbatok kang Jehova, ang labing mahigugmaong persona. Ang ubang mga manulonda nakig-abin kaniya. Ang Bibliya nagtawag kanila ug mga demonyo. Sama kang Satanas, ang mga demonyo nahimong mabangis nga mga kaaway sa tawo. Ug silay hinungdan sa daghang pag-antos dinhi sa yuta—ang inhustisya, sakit, kakabos, ug mga gubat.

Bisag si Satanas wala na hisgoti karon sa daghang simbahan sa Kakristiyanohan, ang basahon sa Job diha sa Bibliya nagpatin-aw kanato kon kinsa siya ug unsay motibo niining rebeldeng manulonda. Kini nag-ingon: “Karon miabot ang adlaw sa dihang ang mga anak sa matuod nga Diyos misulod aron sa pag-atubang kang Jehova, ug si Satanas misulod usab uban kanila.” Sa ilang pagsultihanay, si Satanas mapangahasong nag-akusar nga si Job nag-alagad sa Diyos tungod lamang sa iyang nadawat nga mga kaayohan. Aron pamatud-an kini, gipaantos pag-ayo ni Satanas si Job ug gipatay ang iyang binuhing mga hayop ug ang tanan niyang napulo ka anak. Unya, iyang gihampak si Job ug grabeng mga hubag sa tibuok niyang lawas. Bisan pa niining tanan, si Satanas napakyas.—Job 1:6-19; 2:7.

May maayong mga rason si Jehova kon nganong iyang gitugotan si Satanas nga maglungtad sa taas nga panahon, apan dili kini hangtod sa hangtod. Sa dili madugay hanawon ra si Satanas. Gihimo na ang pasiunang mga lakang ug tin-aw kining gihubit diha sa basahon sa Pinadayag diin gibutyag ang laing hinungdanong panghitabo nga wala gayod nato makita. Atong mabasa: “Ug miulbo ang gubat sa langit: Si Miguel [ang nabanhawng si Jesu-Kristo] ug ang iyang mga manulonda nakiggubat sa dragon [si Satanas], ug ang dragon ug ang mga manulonda niini nakiggubat apan kini wala makadaog, ni may dapit pa alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.

Matikdi nga si Satanas giingong “nagpahisalaag sa tibuok gipuy-ang yuta.” Siya nagpahisalaag sa mga tawo pinaagig relihiyosong mga kabakakan aron ilang talikdan si Jehova ug ang iyang Pulong. Ang usa ka bakak nga iyang giduso mao nga sa kamatayon ang tanan mopanaw ngadto sa dominyo sa mga espiritu. Nagkadaiya ang pagtuo niini. Pananglitan, sa Aprika ug Asia, daghan ang nagtuo nga inigkamatay ang mga tawo mopanaw sa kalibotan sa mga espiritu nga gipuy-an sa ilang mga katigulangan. Ang mga pagtulon-an bahin sa purgatoryo ug impiyerno gipasukad usab sa ideya nga ang tawo padayong mabuhi human sa kamatayon.

Human Mamatay—Moadto ba sa Langit?

Apan komosta ang gituohan sa minilyong tawo sa tibuok kalibotan nga ang tanang maayong tawo moadto sa langit? Tinuod nga ang pipila ka maayong tawo moadto didto, apan diyutay ra sila kon itandi sa bilyon-bilyong nangamatay. Gibutyag sa Bibliya nga 144,000 ka tawo ang ‘paliton gikan sa yuta’ ug mag-alagad ingong “mga saserdote” ug “mga hari ibabaw sa yuta.” (Pinadayag 5:9, 10; 14:1, 3) Sila ug ang Anak sa tawo, si Jesu-Kristo, ang maglangkob sa langitnong gobyerno, ang Gingharian sa Diyos. Kana nga gobyerno ang maglaglag kang Satanas ug sa iyang mga demonyo ug maghimo sa yuta nga usa ka paraiso. Ang kadaghanan sa mga nangamatay banhawon sa umaabot uban ang paglaom nga mabuhing walay kataposan sa Paraiso sa yuta.—Lucas 23:43.

Busa, daghan ang nagpuyo sa dominyo sa mga espiritu. Ang labing gamhanan kanila mao si Jehova nga Diyos, ang Maglalalang sa kinabuhi. May tinagpulo ka libong manulonda nga matinumanong nag-alagad kaniya. May mga demonyo usab nga gipangulohan ni Satanas nga mirebelde kang Jehova ug nagpahisalaag sa mga tawo. Dugang pa, may pipila ka tawo nga “gipalit” o gipili gikan sa yuta aron hatagag linaing mga responsibilidad didto sa langit. Hinumdoman nato kini samtang atong tagdon karon kon kinsa ang mahimong sangpiton diha sa dominyo sa mga espiritu ug kon angay ba kitang makigkomunikar kanila.