Nganong ang Eden Hinungdanon Kanimo?

USA sa labing katingalahang pagtutol nga gipatungha sa pipila ka eskolar sa asoy bahin sa Eden mao nga kini kono wala paluyohi sa ubang bahin sa Bibliya. Pananglitan, si Paul Morris, nga propesor sa Religious Studies, misulat: “Sa ulahi wala na direktang hisgoti sa Biblikanhong mga reperensiya ang asoy bahin sa Eden.” Tingali daghang “eksperto” ang mouyon kaniya, bisag sukwahi kaayo kini sa kamatuoran.

Sa pagkatinuod daghan kitag mabasa sa Bibliya bahin sa tanaman sa Eden, kang Adan, Eva, ug sa halas. * Apan ang sayop sa pipila ka eskolar dili ra kaayo dako kon itandi sa pagsalikway mismo sa asoy sa Genesis bahin sa tanaman sa Eden. Pinaagi sa pagsalikway niini nga asoy, ang relihiyosong mga lider ug mga kritiko sa Bibliya nagpasipala gayod sa tibuok Bibliya. Sa unsang paagi?

Aron masabtan ang ubang bahin sa Bibliya, hinungdanon nga atong masabtan ang panghitabo didto sa Eden. Pananglitan, ang Pulong sa Diyos gidisenyo aron atong matubag ang labing makahuloganon ug hinungdanon nga mga pangutana nga gisukna sa tawo. Sublisubling gitubag sa Bibliya ang mga pangutana nga nalangkit sa mga panghitabo didto sa tanaman sa Eden. Tagda ang pipila ka pananglitan.

● Nganong kita matigulang ug mamatay? Si Adan ug Eva mabuhi unta sa walay kataposan kon sila pabiling nagpasakop kang Jehova. Kon sila morebelde, sila mamatay. Busa, sa adlaw nga sila mirebelde, sila namatay. (Genesis 2:16, 17; 3:19) Nawala kanila ang kahingpitan ug gipasa nila ang sala ug pagkadili-hingpit ngadto sa ilang mga anak. Ang Bibliya dugang nagpatin-aw: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

● Nganong gitugotan sa Diyos ang pagkadaotan? Sa Eden, si Satanas nag-akusar sa Diyos  ingong bakakon nga naghikaw ug butang nga maayo sa Iyang mga linalang. (Genesis 3:3-5) Sa ingon, iyang gihagit ang katungod ni Jehova sa pagmando. Si Adan ug Eva misunod kang Satanas, busa sila usab nagsalikway sa pagmando ni Jehova ug sa diwa, miinsistir nga ang tawo makapili sa iyang kaugalingon kon unsay maayo ug daotan. Kay hingpit ang iyang hustisya ug kaalam, si Jehova nahibalo nga may usa lang ka paagi aron tukmang matubag ang hagit—palabyon ang panahon, aron tugotan ang tawo nga magmando sa ilang kaugalingon. Ang miresultang kadaotan, nga sa bahin maoy tungod sa impluwensiya ni Satanas, inanayng nagpadayag sa dakong kamatuoran: Ang tawo dili gayod makamando sa iyang kaugalingon kon wala ang Diyos.—Jeremias 10:23.

● Unsa ang katuyoan sa Diyos alang sa yuta? Sa tanaman sa Eden, gihatag ni Jehova ang sukdanan kon unsaon pagpatahom sa yuta. Iyang gisugo si Adan ug Eva nga pun-on ang yuta sa ilang mga anak ug ‘gamhan kini,’ aron magpabilin ang samang katahom niini hangtod malukop ang tibuok planeta. (Genesis 1:28) Busa katuyoan sa Diyos nga ang yuta mahimong paraiso nga puy-an sa hingpit, nahiusang banay sa mga kaliwat ni Adan ug Eva. Ang dakong bahin sa Bibliya naghisgot sa paagi sa Diyos sa pagtuman sa iyang orihinal nga katuyoan.

● Nganong si Jesu-Kristo mianhi sa yuta? Tungod sa rebelyon sa Eden, si Adan ug Eva ug ang ilang mga kaliwat gisilotag kamatayon, apan ang Diyos mahigugmaong nagtaganag paglaom. Iyang gipadala ang iyang Anak sa yuta aron itagana ang lukat. (Mateo 20:28) Unsay ipasabot niana? Buweno, si Jesus ang “kataposang Adan.” Iyang nahimo ang wala mahimo ni Adan. Padayong nahuptan ni Jesus ang iyang hingpit tawhanong kinabuhi tungod sa pagpabiling masinugtanon kang Jehova. Dayon iyang gihatag ang iyang kinabuhi ingong halad, o lukat, aron ang tanang matinumanong katawhan mapasaylo sa ilang mga sala ug sa ngadtongadto makabaton sa kinabuhi nga napahimuslan ni Adan ug Eva sa wala pa sila makasala. (1 Corinto 15:22, 45; Juan 3:16) Busa gipamatud-an ni Jesus nga matuman gayod ang katuyoan ni Jehova sa paghimo niining yutaa ingong paraiso nga sama sa Eden. *

Ang katuyoan sa Diyos dili makapalibog ni usa ka teolohiya nga dili masabtan. Tinuod gayod kini. Sama nga ang tanaman sa Eden maoy usa ka tinuod nga dapit, nga may tinuod nga mga mananap ug mga tawo, tinuod usab gayod ang saad sa Diyos sa umaabot. Makapahimulos ka ba niana nga kaugmaon? Kini nagdepende gayod kanimo. Buot sa Diyos nga daghan unta ang makapahimulos niana nga kaugmaon, bisan pa kadtong mga makasasala.—1 Timoteo 2:3, 4.

Sa himalatyon na si Jesus, siya nakigsulti sa usa ka tawong mahinulsolon. Kini nga tawo kriminal ug takos sa kamatayon. Apan siya mituo ug misalig kang Jesus. Unsay sanong ni Jesus? “Ikaw makauban nako sa Paraiso.” (Lucas 23:43) Kon buot makita ni Jesus ang kanhing kriminal, nga mabanhaw ug panalanginan ug kinabuhing walay kataposan sa samag Eden nga paraiso, dili ba usab diay niya gustong mabatonan nimo ang samang panalangin? Mao gayod kana ang gusto ni Jesus ug sa iyang Amahan! Kon buot nimo ang maong kaugmaon, paningkamot pag-ayo nga makakat-on bahin sa Diyos nga maoy naghimo sa tanaman sa Eden.

[Mga footnote]

 [Kahon/Mga hulagway sa panid 10]

USA KA TAGNA NGA NAGBUGKOS SA BIBLIYA

“Ibutang ko ang panag-away tali kanimo [ang halas] ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.”—Gen. 3:15.

Kini ang unang tagna sa Bibliya nga gibungat sa Diyos didto sa Eden. Kinsa kining upat ka karakter: ang babaye, ang iyang binhi, ang halas, ug ang binhi niini? Nganong adunay “panag-away” tali kanila?

ANG HALAS

Si Satanas nga Yawa.—Pinadayag 12:9.

ANG BABAYE

Ang organisasyon ni Jehova nga gilangkoban sa langitnong mga linalang. (Galacia 4:26, 27) Gitagna ni Isaias nga ang “babaye” magpahimugsog usa ka espirituwal nga nasod sa umaabot.—Isaias 54:1; 66:8.

ANG BINHI SA HALAS

Kadtong mipalabi sa pagbuhat sa kabubut-on ni Satanas.—Juan 8:44.

ANG BINHI SA BABAYE

Kini pangunang nagtumong kang Jesus nga naggikan sa langitnong bahin sa organisasyon ni Jehova. Lakip usab sa “binhi” ang espirituwal nga mga igsoon ni Kristo, nga magmando sa langit uban kaniya. Kining dinihogang mga Kristohanon mao ang maglangkob sa usa ka espirituwal nga nasod, ang “Israel sa Diyos.”—Galacia 3:16, 29; 6:16; Genesis 22:18.

ANG SAMAD SA TIKOD

Usa ka masakit nga hampak nga nasinatian sa Mesiyas apan temporaryo lamang ang epekto niini. Milampos si Satanas sa pagpatay kang Jesus dinhi sa yuta, apan siya gibanhaw ra.

ANG SAMAD SA ULO

Usa ka makamatayng hampak kang Satanas. Si Jesus bug-os maghanaw kang Satanas. Gani, sa dili pa kana mahitabo, taposon ni Jesus ang pagkadaotan nga gimugna ni Satanas sukad pa sa Eden.—1 Juan 3:8; Pinadayag 20:10.

Alang sa mubong sumaryo sa pangunang tema sa Bibliya, tan-awa ang brosyur nga Ang Bibliya—Unsay Mensahe Niini? nga gipatik sa mga Saksi ni Jehova.

[Hulagway sa panid 11]

Giani ni Adan ug Eva ang mapait nga bunga sa ilang sala