Kasulbaran sa Komon nga mga Reklamo

ANG Bibliya wala mag-ingon nga ang kaminyoon walay suliran. Si apostol Pablo giinspirar sa Diyos sa pagsulat nga ang mga magtiayon makaatubang gayod ug “matag adlaw nga mga kasamok.” (1 Corinto 7:28, Maayong Balita Biblia) Apan dakog mahimo ang magtiayon aron makunhoran ang mga problema ug mapauswag ang ilang kalipay. Tagda kining unom ka komon nga mga reklamo sa mga bana ug asawa, ug tan-awa kon sa unsang paagi makatabang ang pagpadapat sa mga prinsipyo sa Bibliya.

1

REKLAMO:

“Mitab-ang na ang among relasyon.”

PRINSIPYO SA BIBLIYA:

‘Tinoa ang mas hinungdanong mga butang.’—FILIPOS 1:10.

Ang imong kaminyoon maoy usa sa labing hinungdanong butang sa imong kinabuhi. Angay kining hatagag prayoridad. Busa sutaa kon ang imong mga eskedyul nakaamot ba sa pagtab-ang sa inyong relasyon. Ayaw tugoting tungod sa inyong inadlawng rutina mag-iyahay na lang mo sa inyong kinabuhi. Oo, may panahon nga dili mo magkauban tungod sa trabaho o sa dili malikayang mga kahimtang. Apan kinahanglan nimong limitahan ang panahon nga imong gigugol sa imong mga hilig ug mga higala.

 Ang uban mangita na hinuog dugang trabaho o mga hilig aron dili makauban ang ilang kapikas. Kini sila wala magkabulag sa ilang kapikas apan sila miikyas sa mga suliran. Kon ingon niini ang inyong kahimtang, kinahanglang makita nimo kon unsay gamot niini nga mga suliran ug sulbaron kini. Kon suod mo sa usag usa, nan molig-on ang inyong relasyon ug kamo “mahimong usa ka unod.”—Genesis 2:24.

Kon giunsa pagpadapat sa uban kini nga tambag: Si Andrew * ug Tanji, usa ka Australianong magtiayon, napulo ka tuig nang minyo. Matod ni Andrew: “Akong nakita nga peligroso sa kaminyoon ang sobrang pagtrabaho ug pakigbarkada. Busa kami sa akong asawa maggahin ug panahon nga mag-estorya ug magdayganay sa among mga pagbati.”

Si Dave ug Jane, nga nagpuyo sa United States ug 22 ka tuig nang minyo, maggahin ug tunga sa oras sa matag gabii aron magbayloay sa ilang mga kasinatian ug hunahuna. Matod ni Jane: “Dili namo tugotang may makabalda niini.”

2

REKLAMO:

“Dili na ko kontento sa among relasyon.”

PRINSIPYO SA BIBLIYA:

“Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”—1 CORINTO 10:24.

Ang usa ka tawo nga naghunahuna lang kon unsay iyang makuha gikan sa kaminyoon dili gayod magmalipayon, bisan pag kapila siya magminyo. Magmalamposon ang kaminyoon kon palabihon sa matag usa ang paghatag kay sa pagdawat. Gihatag ni Jesus ang rason: “Adunay labaw nga kalipay sa paghatag kay sa pagdawat.”—Buhat 20:35.

Kon giunsa pagpadapat sa uban kini nga tambag: Si Maria ug Martin, nga nagpuyo sa Mexico, 39 ka tuig nang minyo. Apan sila nakasinati  gihapon ug mga problema. Dihay higayon nga grabe ang ilang away. “Sa dihang nahitabo kadto,” matod ni Maria, “Nakasulti kog sakit kang Martin. Siya nasuko pag-ayo. Ako siyang giingnan nga wala nako to tuyoa, nga tungod lang to sa akong kalagot. Apan dili siya maminaw.” Si Martin miingon: “Nianang higayona, nakaingon ko nga dili na mosaler ang among relasyon ug kinahanglang magbulag na mi.”

Gikinahanglan ni Martin ang pagtahod, ug buot ni Maria nga siya usab sabton. Apan pareho silang napakyas niini.

Giunsa nila kini pagsulbad? “Nagpabugnaw una ko sa akong kasuko,” matod ni Martin, “ug nagsabot mi nga among ipadapat ang maalamong tambag sa Bibliya sa pagpakitag pagtahod ug konsiderasyon. Latas sa katuigan, nakita namo nga bisag kapila pa motungha ang mga problema, masulbad kini kon mangayo mig tabang sa Diyos ug ipadapat ang tambag sa Bibliya.”—Isaias 48:17, 18; Efeso 4:31, 32.

3

REKLAMO:

“Wala niya tumana ang iyang papel.”

PRINSIPYO SA BIBLIYA:

“Ang matag usa kanato manubag alang sa iyang kaugalingon ngadto sa Diyos.”—ROMA 14:12.

Dili gayod magmalamposon ang kaminyoon kon usa ray maningkamot sa pagtuman sa iyang papel. Ilabina gayod kon silang duha ang magpasagad ug magbinasolay.

Kon mao ray imong hunahunaon ang butang nga angayng buhaton sa imong kapikas, dili ka magmalipayon. Ilabina gayod kon imong himoong pasangil ang iyang kahuyangon aron dili usab nimo tumanon ang imong responsibilidad. Sa laing bahin, kon ikaw maningkamot nga mahimong maayong bana o asawa, ang inyong kaminyoon lagmit mouswag gayod. (1 Pedro 3:1-3) Labaw sa tanan, imong ikapakita sa Diyos nga imong gitahod ang iyang kahikayan sa kaminyoon, ug ang imong gibuhat makapalipay kaayo kaniya.—1 Pedro 2:19.

Kon giunsa pagpadapat sa uban kini nga tambag: Si Kim ug ang iyang bana, nga nagpuyo sa Korea, 38 ka tuig nang minyo. Matod ni Kim: “Usahay ang akong bana masuko nako ug dili na magtingog, ug wa ko mahibalo kon ngano. Akong gibati nga tab-ang na siya kanako. Usahay maghunahuna ko, ‘Nganong gusto man niya nga sabton nako siya samtang siya dili man mosabot kanako?’”

Mahimong hunahunaon ni Kim ang pagkadili-makataronganon niini ug ang kahuyangon sa iyang bana. Apan, lahi ang iyang gihimo. “Inay nga pirmeng mapikal,” matod ni Kim, “akong nakat-onan nga labing maayo nga ikaw ang unang motagad. Ingong resulta, kami nagkasinabot ug nagmalinawon.”—Santiago 3:18.

 4

REKLAMO:

“Ang akong asawa dili mapinasakopon.”

PRINSIPYO SA BIBLIYA:

“Ang ulo sa matag lalaki mao si Kristo.”—1 CORINTO 11:3.

Ang bana nga nagtuong ang iyang asawa dili mapinasakopon kinahanglang mamalandong una kon siya ba mismo buot magpasakop sa iyang Ulo, si Jesu-Kristo. Ikapakita sa bana ang iyang pagpasakop pinaagi sa pagsunod sa panig-ingnan ni Jesus.

Si apostol Pablo misulat: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini.” (Efeso 5:25) Si Jesus dili “mahariharion” sa iyang mga tinun-an. (Marcos 10:42-44) Siya naghatag ug tin-awng instruksiyon ug nagtul-id kanila kon gikinahanglan. Apan dili siya mapig-oton. Siya maluloton ug may konsiderasyon kanila. (Mateo 11:29, 30; Marcos 6:30, 31; 14:37, 38) Kanunay niyang giuna ang ilang kaayohan kay sa iyaha.—Mateo 20:25-28.

Angayng suknaon sa bana ang iyang kaugalingon, ‘Ang ako bang panglantaw bahin sa pagkaulo ug sa mga babaye mas naimpluwensiyahan sa lokal nga mga kostumbre kay sa tambag ug mga panig-ingnan sa Bibliya?’ Pananglitan, unsay imong ikaingon sa usa ka asawang wala mouyon sa hunahuna sa iyang bana apan matinahorong nagpahayag sa iyang opinyon? Sa Bibliya, ang asawa ni Abraham nga si Sara gidayeg ingong sulondan sa pagkamapinasakopon. (1 Pedro 3:1, 6) Apan, iyang isulti kon unsay anaa sa iyang hunahuna kon gikinahanglan, sama niadtong higayon nga wala makita ni Abraham ang kapeligrohan nga mahimong maagoman sa pamilya.—Genesis 16:5; 21:9-12.

Dayag, wala hurawa ni Abraham si Sara aron kini maghilom na lang. Siya dili diktador. Sa susama, ang bana nga nagsunod sa tambag sa Bibliya dili dominante, nga mag-insistir sa iyang asawa nga sundon ang tanan niyang gusto. Iyang maangkon ang pagtahod sa iyang asawa kon gamiton niya ang iyang pagkaulo sa malulotong paagi.

Kon giunsa pagpadapat sa uban kini nga tambag: Si James nga nagpuyo sa England ug walo ka tuig nang minyo, miingon: “Dili ko mohimog hinungdanong desisyon nga dili konsultahon ang akong asawa. Dili ra akong kaugalingon ang akong gihunahuna. Hinuon, palabihon nako ang iyang panginahanglan.”

Si George nagpuyo sa United States ug 59 ka tuig nang minyo. Siya miingon: “Wala nako isipa ang akong asawa ingong segunda-klase o ubos nga lungsoranon, apan ingong maalamon ug takos nga kauban.—Proverbio 31:10.

 5

REKLAMO:

“Ang akong bana walay inisyatibo.”

PRINSIPYO SA BIBLIYA:

“Ang babayeng tinuod nga maalamon nagtukod sa iyang balay, apan ang buangbuang naglumpag niana pinaagi sa iyang mga kamot.”—PROVERBIO 14:1.

Kon ang imong bana magpanuko sa paghimog mga desisyon o sa pagpanguna sa pagdumala sa panimalay, duna kay tulo ka opsiyon. (1) Mahimong pirme nimo siyang basolon sa iyang mga kahuyangon o (2) mahimong sapawan nimo ang iyang papel ingong ulo sa pamilya o (3) mahimong sinsero nimo siyang dayegon sa mga paningkamot nga iyang gihimo. Kon pilion nimo ang bisan hain sa unang duha ka opsiyon, ikaw ra mismo ang maghugno sa imong panimalay. Kon pilion nimo ang ikatulo, imong mapalig-on ang inyong kaminyoon.

Mas labawng gipabilhan sa daghang lalaki ang pagtahod kay sa gugma. Kon imong ipabati sa imong bana nga siya imong gitahod, nga magdayeg kaniya tungod sa iyang maayong pagdumala sa pamilya, lagmit mapauswag niya ang iyang papel. Siyempre, may panahon nga dili mo magkauyon sa imong bana bahin sa usa ka butang. Kinahanglan ninyo kining hisgotan. (Proverbio 18:13) Apan ang mga pulong nga imong gamiton ug ang tono sa imong tingog makapahugno o makapalig-on sa inyong kaminyoon. (Proverbio 21:9; 27:15) Matinahorong ipahayag ang imong opinyon, ug posible gayod nga imong makab-ot ang imong gusto—nga ang imong bana dili magpanuko sa pagpanguna.

Kon giunsa pagpadapat sa uban kini nga tambag: Si Michele, nga nagpuyo sa United States ug 30 ka tuig nang minyo, miingon: “Kay nag-inusara ra man si Mama sa pagpadako namong mga magsoon, siya isogon ug independente nga babaye. Nakasundog ko sa iyang batasan. Busa kinahanglang ugmaron nako ang pagpasakop. Pananglitan, nakakat-on ko sa pagkonsulta sa akong bana inay sa paghimog kaugalingong mga desisyon.”

Si Rachel, nga nagpuyo sa Australia ug 21 ka tuig nang naminyo kang Mark, naimpluwensiyahan usab sa iyang kagikan. “Si Mama dili gayod mapinasakopon sa akong Papa,” matod niya. “Kanunay silang mag-away. Sa bag-o pa kong naminyo, nakasundog ko kang Mama. Apan sa kadugayan, akong nakita nga mapuslanon ang pagpadapat sa tambag sa Bibliya bahin sa pagpakitag pagtahod. Karon kami ni Mark mas malipayon sa among panagtiayon.”

6

REKLAMO:

“Dili na nako maantos ang iyang batasan.”

PRINSIPYO SA BIBLIYA:

“Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.”—COLOSAS 3:13.

Sa bag-o pa mong nagdeyt, tingali ang maayong mga hiyas lang ang imong nakita sa imong kapikas ug halos wala nimo makita ang iyang mga kahuyangon. Ingon ana ka ba gihapon karon? Dayag nga may makataronganon  kang reklamo bahin sa imong kapikas. Apan, pangutan-a ang imong kaugalingon, ‘Asay mas hatagan nakog pagtagad—ang iyang maayong hiyas o ang iyang dili maayong hiyas?’

Si Jesus naggamit ug puwersadong ilustrasyon aron ipakita nga dili angayng hatagag pagtagad ang kahuyangon nga atong makita sa uban. “Nganong tan-awon nimo ang uhot nga anaa sa mata sa imong igsoon, apan wala magtagad sa salagunting nga anaa sa imong kaugalingong mata?” (Mateo 7:3) Ang uhot maoy usa ka gamayng piraso sa dagami. Sa laing bahin, ang salagunting maoy dakong tabla nga gamiton sa pagsangga sa atop sa balay. Unsay iyang gipasabot? “Kuhaa una ang salagunting gikan sa imong kaugalingong mata, ug unya makakita ka nga tin-aw kon unsaon sa pagkuha sa uhot gikan sa mata sa imong igsoon.”—Mateo 7:5.

Gihatag ni Jesus kini nga ilustrasyon uban ang ugdang nga pasidaan. “Hunong na sa pagpanghukom,” siya miingon, “aron dili kamo pagahukman; kay sa hukom nga inyong ginahukom, kamo pagahukman.” (Mateo 7:1, 2) Kon buot nimong ang Diyos dili magtagad sa imong mga kahuyangon, ang salagunting sa imong mata, nan ayaw usab tagda ang mga kahuyangon sa imong kapikas.—Mateo 6:14, 15.

Kon giunsa pagpadapat sa uban kini nga tambag: Si Jenny, nga nagpuyo sa England ug siyam ka tuig nang minyo kang Simon, miingon: “Ang kanunay nakong kalagotan sa akong bana mao ang iyang dili pagplano nga abante, ug ayha pa niya atimanon ang mga butang sa kataposang gutlo. Daw kini balit-ad, kay sa nagdeyt pa mi, bilib ko kaayo niya kay siya andam kanunay. Apan, akong naamgohan karon nga ako usab may mga sayop, kay gusto ko nga ako ang pirmeng masunod. Kami ni Simon nakakat-on na karon sa pagpalabay sa ginagmayng mga sayop.”

Si Curt, nga bana ni Michele, nga gihisgotan ganina, nagpahayag: “Kon imong hatagag pagtagad ang makalagot nga mga batasan sa imong kapikas, kini mosamot kadako. Mas gihatagan kog pagtagad ang mga hiyas nga nakabihag sa akong kasingkasing kang Michele.”

Ang Sekreto sa Kalamposan

Kining pipila ka pananglitan nagpakita nga ang mga hagit sa kaminyoon dili kalikayan apan kini mabuntog ra. Unsa ang sekreto sa kalamposan? Ugmara ang imong gugma sa Diyos ug ipadapat kanunay ang tambag sa Bibliya.

Si Alex ug Itohan, nga nagpuyo sa Nigeria ug kapin na sa 20 ka tuig nga minyo, nakakat-on sa maong sekreto. Si Alex miingon: “Akong nakita nga halos tanang problema sa kaminyoon masulbad ra kon ang magtiayon magpadapat sa mga prinsipyo sa Bibliya.” Ang iyang asawa miingon: “Among nakita nga hinungdanon kanunay nga duyog nga mag-ampo ug ipadapat ang tambag sa Bibliya nga sinserong mahigugma ug mapailobon sa usag usa. Mas diyutay na lang ang mga problema kay sa niadtong bag-o pa ming minyo.”

Buot ba nimong makakat-on ug dugang kon sa unsang paagi ang praktikal nga mga tambag sa Bibliya makatabang sa imong pamilya? Kon mao, hangyoa ang mga Saksi ni Jehova nga hisgotan uban nimo ang kapitulo 14 sa librong Unsay Tinuod nga Gitudlo sa Bibliya? *

[Mga footnote]

[Hulagway sa panid 4]

Naggahin ba kamig panahon alang sa usag-usa?

[Hulagway sa panid 5]

Mas gipalabi ko ba ang paghatag kay sa pagdawat?

[Hulagway sa panid 6]

Nagpakita ba kog inisyatibo aron mahusay ang mga panagbangi?

[Hulagway sa panid 7]

Gitagad ko ba ang opinyon sa akong asawa sa dili pa mohimog desisyon?

[Hulagway sa panid 9]

Mas gihatagan ko bag pagtagad ang maayong mga hiyas sa akong kapikas?