Mga Panalangin sa Distritong mga Kombensiyon sa Russia Niadtong Ting-init

SA MATAG ting-init, ang mga Ruso nga mahigugmaon sa kinaiyahan mobiya sa ilang mga apartment sa siyudad ug moadto sa kabanikahan aron magpalabay sa ting-init didto sa mga payag nga gitawag ug dacha. Alang kanila, panahon kini nga mahilayo sa kapuliki sa siyudad. Sa milabayng mga ting-init, daghan sa mga Saksi ni Jehova sa Russia ang nangadto usab sa kabanikahan—apan lahi ang katuyoan.

Bisan gidili ang pagsangyaw diha sa pipila ka siyudad, ang mga Saksi ni Jehova sa Russia nagpadayon sa paghimog publikong panagkatigom, nga naggamit sa ilang katungod sa pagsimba subay sa gilagda sa konstitusyon. Apan sa pipila ka kahimtang, tungod sa pagsupak ug pagpit-os sa gisugniban nga mga awtoridad o sa Ortodoksong mga klerigo sila nalisdan sa pagkuhag mga pasilidad alang sa ilang tinuig nga distritong mga kombensiyon sa ting-init. Busa gihikay sa mga Saksi nga himoon ang ilang mga kombensiyon diha sa “kakahoyan” o sa “kabanikahan.” Gikan sa 2007 hangtod sa 2009, ang maong espirituwal nga “mga piknik” gihimo sa mga 40 ka higayon diha sa 25 ka dapit sa tibuok Russia.

Ang usa ka Saksi nga nakatambong sa mga kombensiyon sa Russia sa daghang katuigan miingon: “Sa milabayng mga tuig nga kami nag-abang ug mga estadyum ug mga bilding sa dagkong mga siyudad, daghang sinserong tawo  ug lokal nga mga awtoridad ang nakadayeg sa atong organisasyon tungod sa kahinlo ug kahapsay nga ilang nakita. Apan karon kami napugos sa paghimo sa tigom didto sa lasang diin ang ihalas lang nga mga mananap ang makakita. Makapaguol nga dili na makita sa publiko kining maanindot nga mga panagkatigom nga gitambongan sa katawhan nga lainlaig kagikan, rasa, ug relihiyon.”

Bisan tuod malipayon kini nga mga panagkatigom, ang usa ka Saksi miingon: “Makapalipay ang pagtan-aw sa pagsakripisyo ug pagkamaunongon sa isigka-Saksi nga nagpasibo sa lainlaing mga kahimtang. Apan sa tinuoray lang, kon dili ta hatagag permiso sa mga awtoridad sa paghimo sa atong mga kombensiyon, hago kaayo kini sa pisikal ug emosyonal. Nalimitahan niini ang atong kagawasan sa pagsimba sa labing gamhanang Diyos sa dungganong paagi.” Giunsa pagsagubang sa mga Saksi ni Jehova sa Russia kini nga hagit?

Mga Kombensiyon sa Tibuok Nasod nga Gihimo sa Kakahoyan

Kasagaran, kon ayha pa kanselahon ang pagpaabang sa mga pasilidad sa hapit na kaayo ang kombensiyon, ang mga nag-organisar sa mga kombensiyon malisdan sa pagpangitag laing kaabangan alang sa linibo ka delegado. Pananglitan, niadtong 2008, kinahanglang himoon sa mga Saksi sa Cheboksary, Chuvash Republic, ang ilang distritong kombensiyon didto sa usa ka dakong kampohanan nga gipalibotan ug mga kahoyng birch ug malantaw ang Volga River. Dako kaayo kini nga trabaho. Sa mga 1,930 ka gidahom nga mga delegado, 1,700 ang kinahanglang ipahiluna sa kampohanan. Nagkinahanglan silag mga kaligoanan ug mga lababo nga may init ug bugnawng tubig, mga kasilyas, ug elektrisidad. Ug kinahanglang pakan-on ang tanan.

Nasulbad ra nila kadto. Nakakita silag mga panday, elektrisyan, ug mga tubero. Dihay grupo sa 350 ka Saksi nga miboluntaryo sa pagtrabaho, ug 14 kanila ang nagpuyo didto sa kampohanan sulod sa 10 ka adlaw. Sila nanggabas ug mga tabla, nanghakot ug mga dagami, ug nagtukod ug mga tolda, kaligoanan, ug mga kasilyas. May laing grupo sa mga igsoon nga mag-adtoan sa lungsod aron mopalit ug mga suplay. Sanglit wala may freezer nga kapondohan sa ilang pagkaon, gihikay sa mga igsoon nga ikatagana sa tanan ang tulo ka kan-anan matag adlaw nga didto ra lutoon. Ang administrasyon sa kampohanan mitabang pinaagi sa pagsuhol ug mga trabahante sa pag-andam ug pagkaon alang sa mga delegado. Sa kataposan, 500 ka delegado ang nagdala sa ilang kaugalingong mga tolda, 150 ang nag-abang ug balay duol sa kampohanan, 15 ang malipayong nanghigda sa dagami diha sa kuwadra, ug ang uban nanghigda sa mga tolda nga gitukod sa mga igsoon.

Sa dihang nangabot ang mga delegado, ilang nakita ang daghan kaayong dekolor nga plastik nga mga lingkoranan nga maayong pagkalumbay. Sa atubangan mao ang duha ka simpleng entablado nga giadornohan ug mga bulak, ang usa alang sa mga Ruso ug ang lain alang sa pinulongang Chuvash. Ang tanan nalipay sa programa ug nagpabili sa kahago sa mga boluntaryo. Ang usa sa mitabang sa pag-andam ug pagkaon miingon: “Kon wala ko kini mismo makita, dili gyod ko makatuo nga duna diay organisasyon nga organisado ug disiplinado kaayo sama sa inyoha!” Gitandi sa pipila ang mga kahikayan sa kombensiyon niadtong Pista sa mga Balongbalong nga gihimo sa nasod sa Israel sa unang panahon.

Sa ubang mga siyudad, sagad usa na lang ka adlaw ang nahibilin alang sa mga Saksi  aron mangitag laing tigomanan sa distritong kombensiyon. Mao kini ang nahitabo sa Nizhniy Novgorod, diin ang mga boluntaryo nagtrabaho adlaw ug gabii sa usa ka pribadong luna sa yuta. Kinahanglang pamutlon pa nila ang mga kahoy ug bugang, lampasan ang mga sagbot, ug hinloan ang dapit aron walay mga parasito ug mga olmigas. Pag-abot sa mga delegado sa Biyernes sa buntag, ang mga boluntaryo nakaandam nag 2,000 ka plastik nga lingkoranan ug napulo ka portable nga kasilyas, mga lababo sa tubig, entablado, generator ug sound system. Miingon ang usa ka brader: “Ang nakanindot sa mga igsoon nga nagtrabaho sa adlaw ug gabii mao nga wala sila magpasigarbo. Mapainubsanon silang nagpadayon sa pagserbisyo sa uban panahon sa kombensiyon. Nagbudlay sila pag-ayo aron ang ilang mga igsoon mahimong kombenyente ug makapahimulos sa programa.”

Ang laing brader misulat: “Duna gayoy pagtinabangay. Bisan tuod mao kadto ang unang higayon nga ang mga igsoon nag-organisar ug kombensiyon sa kakahoyan ug apiki kaayo sa oras ang pagpangandam, giplano nila ang tanan aron nga panahon sa programa wala kaayoy kabaldahan. Human niana, wala mi kapoya. Daw si Jehova naghatag kanamog mga pako!”

Naglihok ang Espiritu sa Diyos

Sa daghang paagi, ang pagsagubang sa mga problema maylabot sa mga kombensiyon mas nakapasuod sa mga Saksi sa usag usa, ug nadayag nga naglihok ang espiritu sa Diyos. Sa Smolensk, daghan sa mga sak-anan nga gireserba ang gikanselar sa pagkagabii una pa ang kombensiyon. Ang usa ka ansiyano miingon: “Sa dihang nangabot ang daghang bus sa mga delegado sa ala-una sa kaadlawon, walay ilang masak-an. Mihilak ko tungod kay wala koy mahimo alang kanila. Nag-ampo ko kang Jehova ug nangayog tabang. Nalipay kaayo ko kay usa ka oras sa ulahi may nakita mi nga laing kasak-an sa tanan! Makapahibulong kaayo kini ug tinuod gayod nga dili biyaan ni Jehova sa bug-os ang mga matarong!” Sa laing kombensiyon sa kakahoyan, ang mga igsoon nangitag mga kasak-an didto sa usa ka balangay, ug kay maayo man ug reputasyon ang mga Saksi sa maong dapit, ang mga tawo andam nga nagpasaka sa 2,000 ka delegado sa ilang mga balay panahon sa kombensiyon.

“Ang kalamposan mismo sa kombensiyon maoy usa ka lig-ong pamatuod nga hinungdanon gayong mosalig kang Jehova sa tanang panahon,” matod sa usa ka Saksi. Tinuod gayod kini sa dihang mibutho ang mga estranyo aron sa pagsamok sa kombensiyon. Sa Novoshakhtinsk, ang Rusong Ortodoksong mga klerigo ug mga nagwelga nanungha ug nag-awit ug mga himno ug nagyawyaw ginamit ang mga mikropono aron dili na madunggan ang mamumulong sa kombensiyon. Apan, gipugngan sila sa kapolisan. Sa dihang ang usa sa mga nagwelga, usa ka babayeng Ortodokso, nakuyapan tungod sa kainit, gidala siya sa mga brader ngadto sa First Aid Department ug gitambalan. Dako ang iyang kahibulong nga siya gitambalan.

Nahibulong Sila sa Ilang Nakita

Tungod kay gipabantay pag-ayo ang publiko sa terorismo, ang dagkong panagkatigom sa Russia sagad mamatikdan dayon sa mga awtoridad  ug sa mausisahong mga tawo. Pananglitan, ang usa ka kombensiyon didto sa Volzhskiy gimonitor sa grupo sa kapolisan nga naniid sa kalihokan sa mga aktibista. Usa kanila nawad-ag cellphone panahon sa programa, ug ang mga igsoon mitabang kaniya sa pagpangita niini didto sa Lost and Found Department. Wala madugay, siya gitawgan sa iyang superyor nga nagpakisayod kon duna bay timailhan sa kagubot o kalihokan sa mga aktibista sa kombensiyon. Ang polis mitubag: “Unsa goy mga aktibista? Malinawon ra man diri; may mga 5,000 ka tawo dinhi ug wala may kagubot. Tiaw mo na, nawad-an kog cellphone, ug sa dihang ila kining nakita, ila kining giuli kanako!”

Usa ka guwardiya ang nakadayeg sa kahinlo sa palibot ug natingala nga bisan pa sa kadaghan sa mga bata nga nanambong, wala siya makakitag bisag usa ka putos sa kendi. Ang tag-iya sa kampohanan diin gihimo ang laing kombensiyon misugat sa polis nga gibalitaan bahin sa usa ka dakong relihiyosong panagkatigom. Iyang gidala ang tenyente sa polis didto sa balkon sa ikatulong andana sa bilding nga nag-umbaw sa kampohanan ug miingon: “Tan-awa ra god sila! Ikaw mismo makasaksi kon unsa sila ka hapsay!” Nahingangha ang tag-iya nga ang mga Saksi dili moinom o manigarilyo, ug gibiyaan nila ang dapit nga hinlo kaayo, gani gidala nila ang ilang mga basura sa ilang pagpamauli. Siya miingon: “Sama kinig paraiso!”

Dayag ang Panaghiusa sa Katawhan sa Diyos

Human sa usa ka kombensiyon sa kakahoyan, ang kapitan sa kasikbit nga balangay nakaingon: “Nakita ko nga kamo yano nga mga tawo, apan kamo gamhanag impluwensiya. Samtang kami nag-iyahay ra, kamo nakapahiusa sa mga tawo!” Gikan sa Kaliningrad hangtod sa Kamchatka, ang mga molupyo niining dapita padayong nakadayeg sa panaghiusa sa katawhan sa Diyos panahon sa ilang mga kombensiyon. Bisan pa tingalig may dinaliang kausaban sa ilang mga plano tungod sa wala damhang mga kakulian, may usa ka butang nga wala mabag-o, ang ilang pagtahod sa mga sekular nga awtoridad ug sa ilang isigkatawo.

Bisan unsa pa man ang kahimtang, ang mga Saksi ni Jehova sa Russia malipayon gihapong magtigom alang sa espirituwal nga instruksiyon. Sila nag-ampo “labot sa mga hari ug kanilang tanan nga anaa sa hataas nga katungdanan; aron [sila] magpadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang.”—1 Timoteo 2:2.

[Blurb sa panid 27]

Usa ka Saksi nga nagboluntaryo sa buluhaton sa kombensiyon

[Blurb sa panid 29]

Ang mga Saksi ni Jehova sa Russia padayong nagkinabuhi nga “mahusay ug malinawon uban ang bug-os nga diyosnong pagkamahinalaron”

[Mga hulagway sa panid 28]

Ang mga boluntaryo nagtinabangay sa paghinlo sa nataran sa wala pa ang kombensiyon ug sa pagtaganag pagkaon sa linibo ka delegado sa kombensiyon

[Mga hulagway sa panid 29]

Ang matag usa nagpahimulos sa espirituwal nga programa ug nagpabili sa kahago sa mga boluntaryo