Sa Dihang ang Tigulang Mabatan-on Pag-usab
Pakigsuod sa Diyos
Sa Dihang ang Tigulang Mabatan-on Pag-usab
KINSA ba kanato ang gustong matigulang—mangunot ang panit, mohanap ang panan-aw, mawad-ag pandungog, ug mokurog ang mga tuhod? Tingali ikaw mangutana, ‘Nganong gilalang man ta sa Diyos nga may kahimsog sa pagkabatan-on unya mag-antos ra diay sa pagkatigulang?’ Ang tinuod, dili kini ang katuyoan sa Diyos. Hinunoa, iyang mahigugmaong katuyoan nga kita mahigawas niini! Matikdi ang gipamulong ngadto sa patriarkang si Job, nga mabasa sa Job 33:24, 25.
Tagda si Job, usa ka maunongong tawo nga nahigugma kang Jehova. Walay kalibotan si Job nga gikuwestiyon ni Satanas ang iyang integridad, nga nag-ingong siya nag-alagad sa Diyos tungod lamang sa kahakog. Si Jehova misalig kang Job ug kay Siya makasulbad man sa bisan unsang kadaot, Iyang gitugotang sulayan ni Satanas si Job. Unya “gihampak [ni Satanas] si Job pinaagig grabeng mga hubag gikan sa lapalapa sa iyang tiil hangtod sa iyang alimpulo.” (Job 2:7) Ang unod ni Job napuno sa mga ulod, ug ang iyang panit nagkugankugan, nangitom, ug nangapaksit. (Job 7:5; 30:17, 30) Mahanduraw mo ba ang iyang pag-antos? Bisan pa niana, si Job nagpabiling matinumanon, nga nag-ingon: “Hangtod nga ako mamatay dili ko wad-on ang akong integridad gikan kanako!”—Job 27:5.
Apan si Job nakahimog dakong sayop. Sa dihang iyang gituohan nga siya himalatyon na, nagpatigbabaw kaniya ang pagbayaw sa iyang kaugalingon, pinaagi sa “pagpahayag sa iyang kalag nga matarong inay sa Diyos.” (Job 32:2) Ang tigpamaba sa Diyos nga si Elihu nagbadlong kang Job. Apan gipahayag usab niya kining makapadasig nga mensahe gikan sa Diyos: “Luwasa siya [Job] gikan sa pagkahulog sa gahong [komon nga lubnganan]! Ako nakakaplag ug usa ka lukat! Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.” (Job 33:24, 25) Nadasig gayod si Job niini kay siya dili diay mag-antos hangtod sa kamatayon. Kon si Job maghinulsol, malipay ang Diyos sa pagdawat ug lukat gikan kaniya ug sa pagluwas kaniya gikan sa iyang mga katalagman. *
Si Job mapainubsanong midawat sa pagtul-id, ug siya naghinulsol. (Job 42:6) Dayag nga si Jehova midawat ug lukat alang kang Job, aron matabonan ang iyang sala ug ang Diyos makapasig-uli ug makaganti kaniya. “Gipanalanginan [ni Jehova] ang kaulahian ni Job labaw pa kay sa iyang sinugdan.” (Job 42:12-17) Handurawa ang kalipay ni Job sa naayo na ang iyang makaluod nga sakit ug ang iyang unod, ingnon ta, ‘nabag-o labi pa kay sa pagkabatan-on’!
Limitado ang bili sa lukat nga gidawat sa Diyos alang kang Job, kay siya dili gihapon hingpit ug sa ulahi namatay. May gitagana kanato nga mas maayong lukat. Si Jehova mahigugmaong naghatag sa iyang Anak, si Jesus, ingong lukat alang kanato. (Mateo 20:28; Juan 3:16) Ang tanan nga motuo sa maong lukat may paglaom nga mabuhing walay kataposan sa paraisong yuta. Sa umaabot nga bag-ong kalibotan, ipahinabo sa Diyos nga ang matinumanong mga tawo dili na matigulang. Nganong dili mokat-on ug dugang kon unsay buhaton aron masaksihan ang kahimtang diin ang ‘unod sa mga tigulang mabag-o labi pa kay sa pagkabatan-on’?
Sugyot nga pagbasa sa Bibliya sa Abril:
[Footnote]
^ par. 3 Ang terminong “lukat” nga gigamit dinhi nagkahulogang “pagtabon.” (Job 33:24) Sa bahin ni Job, ang lukat lagmit mao ang halad nga hayop, nga dawaton sa Diyos aron makatabon, o makapasaylo sa sala ni Job.—Job 1:5.
