Ang Bibliya Makabag-o sa Kinabuhi

NGANONG gitalikdan sa usa ka popular nga mag-aawit ang iyang karera aron mahimong bug-os panahong magsasangyaw? Nganong ang usa ka kriminal nga giingon sa usa ka huwes nga dili na mabag-o nahimong maayong lungsoranon? Palihog basaha ang ilang mga kasinatian.

“Walay usa nga Mahimong Ulipon sa Duha ka Agalon.”—ANTOLINA ORDEN CASTILLO

NATAWO: 1962

NASOD: ESPANYA

KANIADTO: ARTISTA UG MAG-AAWIT

KAAGI: Natawo ko sa usa ka gamayng baryo sa Tresjuncos, sa dapit nga gitawag ug La Mancha. Nabuhi mi sa pagpanguma. Katoliko akong Mama ug Protestante akong Papa. Gitudloan ko ni Papa sa pagtahod sa Bibliya ug kanunay kong makakita kaniya nga magbasa niini. Apan gimatuto ko ni Mama ingong Katoliko ug dad-on ko niya sa Misa matag Dominggo.

Pag-edad nakog 15, mibiya ko sa baryo ug miipon pagpuyo sa akong magulang nga babaye didto sa Madrid. Gimingaw ko pag-ayo sa akong mga ginikanan apan sa kadugayan naanad ra ko sa kinabuhi sa siyudad. Pagka-17 anyos nako, pipila ka bulan kong nahimong membro sa zarzuela, usa ka tradisyonal nga light opera sa Espanya. Giganahan kaayo ko niadto ug buot kong mag-artista. Miundang ko sa akong kurso sa pagkasekretarya ug nahimong mag-aawit sa lainlaing mga kompaniya sa zarzuela. Niining panahona, natrato nako ang igsoon sa usa sa akong mga amiga. Gibati nakong bulahan kaayo ko nga duna koy maayong trabaho, kuwarta, ug hinigugma.

Kanunay kong magbiyahe uban sa lainlaing kompaniya sa zarzuela sa tibuok Espanya ug sa ubang mga nasod, sama sa Colombia, Costa Rica, Ecuador, ug Venezuela. Miawit usab ko kauban sa lainlaing grupo nga sakop sa sikat nga asosasyon sa mga musikero sa Madrid nga nailhang “La movida madrileña.” Misikat kaayo ang usa sa mga grupo diin ako nahimong pangunang bokalista.

Giganahan ko sa trabaho apan wala ko makagusto sa imoral nga palibot. Lain pa, nahimo kong mabalak-on kaayo sa akong panagway ug sa akong popularidad. Estrikto kaayo ko sa akong diyeta maong nasakit ko ug anorexia ug bulimia.

Gusto gihapon kong mag-artista. Sa ulahi, nadawat ko sa Madrid School of Dramatic Arts. Gitudloan mi nga sa pag-arte kinahanglang madayag sa among kaugalingon ang tinuod nga pagbati sa karakter nga among gidala. Sa dihang ako kining gipadapat, akong nakita nga dili na  sensitibo ang akong emosyon. Ako nahimong salingkapaw ug makikaugalingon.

GIBAG-O SA BIBLIYA ANG AKONG KINABUHI: Nasayod ko nga kinahanglag paningkamot ang pag-ugmad sa maayong mga hiyas. Apan nalibog ko unsaon. Busa miadto ko sa usa ka simbahan sa Madrid nga kas-a giadto namo sa akong mga ginikanan. Nag-ampo ko sa Diyos, ginamit ang iyang ngalang Jehova.

Sa wala madugay human niadto, duha ka Saksi ang miadto sa amoa. Maikagon kong nakighisgot kanila bahin sa Bibliya, apan daghan usab kog gikalibgan sa ilang pagtulon-an. Si Esther, ang Saksi nga nagdumalag regular nga pagtuon kanako, mapailobon kaayo. Siya ug ang iyang pamilya nagpakitag dakong gugma ug kaayo kanako. Nagtambongan ko sa mga tigom sa mga Saksi ug sa wala madugay ako nakombinsir nga nakaplagan ko ang kamatuoran.

Sa dihang nahuman kog eskuyla sa pagkaartista, daghang trabaho ang naggukod kanako. Gihatagan kog papel sa usa ka produksiyon nga ipasundayag sa usa ka iladong teatro sa Madrid. Apan nakita ko usab nga aron magmalamposon sa pagkaartista, kinahanglang bug-os kong dedikado niini. Sa kataposan nakadesidir ko nga mangitag laing trabaho nga makaalagad ko sa Diyos. Nahinumdom ko sa mga pulong ni Jesus: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain. Dili kamo mahimong ulipon sa Diyos ug sa Bahandi.” (Mateo 6:24) Ang akong walo na ka tuig nga trato supak sa akong pagtuo, busa nakahukom kong putlon ang among relasyon. Kining tanan dili sayon.

MGA KAAYOHAN NGA AKONG NABATONAN: Sa pagkakaron, nagtrabaho kog partaym, nga naghatag ug kalingawan sa mga tigulang. Pinaagi niini, daghan kog panahon sa pagtudlo ug Bibliya sa mga tawong nagsultig Arabe nga nagpuyo sa among lugar. Kinahanglang magtuon kog maayo niining bag-o nga pinulongan, apan malipay ko kaayo sa pagpaambit sa mga maayong balita nga akong nakat-onan sa mga tawong maabiabihon ug interesado.

Ang kahaw-ang nga akong gibati sa nagtuon pa ko sa pagkaartista nahulipan na karon ug tinuod nga katuyoan sa kinabuhi. Gibati nako nga gitabangan ko ni Jehova nga mahimong mas maayong tawo ug mas malipayon.

“Akong Napamatud-an nga Sayop ang Huwes.”—PAUL KEVIN RUBERY

NATAWO: 1954

NASOD: INGLATERRA

KANIADTO: BAYOLENTENG KRIMINAL

KAAGI: Natawo ko sa Dudley, usa ka dakong lungsod sa industriya sa West Midlands. Sukad sa pagkabata, giingnan ko ni Papa nga maayo gayong magbasa. Giawhag sab ko niya sa pagpabili sa katingalahang mga butang sa kinaiyahan, bisan tuod nga siya nagtuong kini mitungha tungod sa ebolusyon. Siya nagtudlo kanako nga walay Diyos. Bisan pa niana, paapilon ko sa akong mga ginikanan sa Sunday school sa mga Methodist.

 Pagka-otso anyos nako, nakita kong gisunog sa mga batang lalaki sa among dapit ang usa ka sakayan. Miabot ang mga polis, apan tungod sa akong kahadlok wala ko motug-an kanila. Gibaharan ko sa mga bata. Gipasanginlan ko sa nahitabo ug naglagot kaayo ko. Tungod niini, nangdaot kog mga butang sa mga eskuylahan, simbahan, ug mga pabrika, nga ang tanan mikabat ug linibo ka dolyar. Pagka-diyes anyos nako, nanglungkab ko sa mga balay ug nangawat sa mga tindahan. Ganahan kog kalayo ug nalangkit ko sa mga kaso sa pagpanunog. Sa eskuylahan, ang akong mga magtutudlo nagtawag kanakog salbahis nga dako.

Sa pagka-12 anyos nako, nakakita kog libro sa okultismo ug naghimo kog kaugalingong Ouija board. Kay ang akong mga ginikanan dili man motuog Diyos, gihunahuna nilang wala ray daotan sa espiritismo ug kini makapalikay kanako sa kagubot. Sa dihang miundang na kog eskuyla, kadaghan ko husaya sa korte sa mga menor-de-edad. Miapil ko sa bayolenteng grupo nga gitawag ug skinheads. Magdaladala kog labaha ug kadena sa bisikleta ingong mga hinagiban. Nakakita kog trabaho apan nawala ra pod kay napriso ko sa mubong panahon. Human ko buhii, nangdaot na pod kog mga propiedad ug gidakop ug giprisog duha ka tuig. Gitawag ko sa huwes nga dili na mabag-o ug hulga sa katilingban.

Human pagawasa sa prisohan, nakigkita ko sa akong kanhing trato nga si Anita. Nagminyo mi, ug sulod sa mubong panahon wala ko mangawat o malangkit sa kagubot. Apan human sa pipila ka tuig, mibalik ko sa akong kanhing kinabuhi. Nanglungkab na pod kog mga tindahan ug nangawat sa ilang mga kaha-de-yero. Nagdroga ko, naghuboghubog, ug nagdaladalag pusil. Gidakop na pod ko ug gipriso.

Tungod sa akong estilo sa kinabuhi, nakonsumisyon pag-ayo si Anita. Giresetahan siya sa iyang doktor ug tranquilizer apan giingnan siya nga kinahanglang makigdiborsiyo kanako. Maayo gani nga wala niya tumana ang tambag.

GIBAG-O SA BIBLIYA ANG AKONG KINABUHI: Sa bag-o pa ming minyo, si Anita nagtuon ug Bibliya uban sa mga Saksi ni Jehova sa mubong panahon. Unya, samtang giserbisyohan ko ang kataposan kong sentensiya, nakontak na pod siya sa mga Saksi. Nianang adlawa nag-ampo pod ko sa Diyos, nga nag-ingon, “Kon tinuod kang naglungtad, pamatud-i kini kanako.”

Sa dihang gipagawas ko sa prisohan pipila ka bulan sa ulahi, akong gikontak ang pari sa among dapit ug mihangyo kaniya nga tun-an mig Bibliya ni Anita. Siya miingon nga motudlo lamang siya kanamog mga kredo ug usa ka pag-ampo.

Sa kataposan, gibasa ra gyod nako ang Bibliya. Nahingangha ko sa pagkasayod nga gikondenar diay sa Bibliya ang espiritismo. (Deuteronomio 18:10-12) Sa ulahi, akong nakita ang usa ka kopya sa Ang Bantayanang Torre nga gibilin sa mga Saksi kang Anita sa adlaw nga ako nag-ampo sa Diyos alang sa tabang. Tungod sa akong nabasa naaghat ko sa pagkontak sa mga Saksi.

Ang among mga pamilya, higala, ug ang akong kanhing kaubanan wala malipay nga nagtuon mig Bibliya uban sa mga Saksi ni Jehova. Ang uban miingon nga na-brainwash ko. Sa tinuoray, ang akong utok kinahanglang hinloan. Daghan kog kabuang, nakubalan ang akong tanlag, ug gawas pa sa uban pang mga bisyo, 60 ka sigarilyo ang akong mahurot sa usa ka adlaw. Ang mga Saksing nagtuon kanamo sa Bibliya ug ang mga kaubanan namo sa kongregasyon mapailobon ug maluloton kaayo kanamo. Sa kataposan, nakalingkawas ra gyod ko sa daotang mga binuhatan.—2 Corinto 7:1.

MGA KAAYOHAN NGA AKONG NABATONAN: Kami ni Anita 35 ka tuig nang minyo. Usa sa among mga anak ug duha ka apo miduyog namo sa pag-alagad kang Jehova. Sa dili pa dugay, gigugol namo ni Anita ang kadaghanan sa among panahon sa pagtabang sa uban sa pagkat-on sa Bibliya.

Ang pag-alagad kang Jehova nga Diyos nakahatag ug tinuod nga kahulogan ug katuyoan sa among kinabuhi. Niadtong 1970, miingon ang huwes nga dili na gyod ko mabag-o. Apan tungod sa tabang sa Diyos ug paggiya sa Bibliya, akong napamatud-an nga sayop ang huwes.