Pagkat-on Gikan sa Pulong sa Diyos

Nganong Gitugotan sa Diyos ang Pagkadaotan ug Pag-antos?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Sa unsang paagi nagsugod ang pagkadaotan?

Ang pagkadaotan nagsugod sa dihang gipamulong ni Satanas ang unang bakak. Si Satanas dili daotan sa dihang siya gilalang. Siya hingpit nga manulonda, apan siya “wala mobarog nga lig-on diha sa kamatuoran.” (Juan 8:44) Iyang gitinguha ang pagsimba nga alang lamang sa Diyos. Si Satanas namakak sa unang babaye, si Eva, ug giaghat siya sa pagsupak sa Diyos. Si Adan miduyog usab kang Eva sa pagsupak sa Diyos. Kini miresulta sa pag-antos ug kamatayon.—Basaha ang Genesis 3:1-6, 17-19.

Sa dihang gitental ni Satanas si Eva sa pagsupak sa Diyos, iyang giatake ang pagkasoberano sa Diyos. Ang kadaghanan sa katawhan miduyog kang Satanas sa pagsalikway sa Diyos ingong Magmamando. Busa si Satanas nahimong “magmamando niining kalibotana.”—Basaha ang Juan 14:30; Pinadayag 12:9.

2. May depekto ba ang kalalangan sa Diyos?

Ang mga tawo ug manulonda nga gilalang sa Diyos dunay hingpit nga katakos sa pagsunod sa mga sugo sa Diyos. (Deuteronomio 32:5) Gilalang ta sa Diyos nga may kagawasan sa pagbuhat tali sa maayo ug daotan. Ang maong kagawasan naghatag kanatog kahigayonan sa pagpakitag gugma sa Diyos.—Basaha ang Santiago 1:13-15; 1 Juan 5:3.

3. Nganong gitugotan sa Diyos ang pag-antos?

Sa taudtaod nga panahon, gitugotan ni Jehova nga supakon ang iyang pagkasoberano. Ngano? Aron ipakita nga walay kaayohang ikahatag sa tawo ang pagmando nga bulag kaniya. (Jeremias 10:23) Human sa 6,000 ka tuig nga pagmando sa tawo, nahusay ang isyu. Napakyas kini nga mga magmamando sa pagwagtang sa gubat, krimen, inhustisya, ug sakit.—Basaha ang Ecclesiastes 7:29; 8:9; Roma 9:17.

Apan, kadtong midawat sa Diyos ingong ilang Magmamando nakabatog kaayohan. (Isaias 48:17, 18) Sa dili madugay, taposon ni Jehova ang tanang tawhanong kagamhanan. Kadto lamang mipili sa pagmando sa Diyos ang makapuyo sa yuta.—Isaias 2:3, 4; 11:9; basaha ang Daniel 2:44.

  4. Unsa nga kahigayonan ang gihatag kanato sa pailob sa Diyos?

Gipangangkon ni Satanas nga walay usa nga magmaunongon kang Jehova. Ang pailob sa Diyos naghatag kanatog kahigayonan sa pagpili kon kita ba modapig sa pagmando sa Diyos o sa tawo. Madayag kon unsa ang atong gipili pinaagi sa atong pagkinabuhi.—Basaha ang Job 1:8-11; Proverbio 27:11.

5. Unsaon nato pagpakitang gipili nato ang Diyos ingong Magmamando?

Atong gipili ang Diyos ingong magmamando kon atong gisusi ug gipadapat ang matuod nga pagsimba pinasukad sa iyang Pulong, ang Bibliya. (Juan 4:23) Kita usab dili makigbahin sa politika ug gubat, sama sa gihimo ni Jesus.—Basaha ang Juan 17:14.

Gigamit ni Satanas ang iyang gahom sa pagpasiugdag imoral ug makadaot nga binuhatan. Kon atong isalikway kini, ang uban natong mga higala ug paryente tingali magbiaybiay o mosupak kanato. (1 Pedro 4:3, 4) Busa usa kini ka hagit. Makig-uban ba ta sa katawhan nga nahigugma sa Diyos? Mosunod ba ta sa iyang maalamon ug mahigugmaong mga balaod? Kon ato ning buhaton, mapamatud-an natong si Satanas bakakon sa iyang pag-ingon nga walay usang motuman sa Diyos.—Basaha ang 1 Corinto 6:9, 10; 15:33.

Alang sa dugang impormasyon, tan-awa ang kapitulo 11 niini nga basahon,Unsay Tinuod nga Gitudlo sa Bibliya? nga gipatik sa mga Saksi ni Jehova.

[Hulagway sa panid 16]

Gipili ni Adan ang daotan

[Hulagway sa panid 17]

Madayag sa atong gipili kon buot ba nato ang Diyos ingong atong Magmamando