Sulat Gikan sa Madagascar

Daw Sama Kadtog Nindot nga Musika

KAMI sa akong bana nagpadulong sa among bag-ong asaynment ingong misyonaryo sa isla sa Madagascar. Kami nakapanamilit na ug gilig-on ang among kaugalingon, nga masaligong si Jehova magpalampos sa iyang gihatag kanamo nga bag-ong asaynment.

Dili gyod namo malimtan ang una namong pagtambong sa kongregasyon sa among bag-ong asaynment. Para namo, ang brader nga nagdumala sa Pagtuon sa Bantayanang Torre daw samag nagdumalag symphony orchestra. Gamay ra kaayo ang among nasabtan sa ilang pinulongan nga kon paminawon daw sama kadtog nindot nga musika. Taudtaod pang panahon ang milabay una namo masabti ang ilang sinultihan.

Sa dihang nasabtan nako ang usa ka pangutana, wala nako tuyoang makatubag kog kusog. Kadtong duol nako nakadungog niini, ug nagpugong ko sa pagkatawa. Naulaw ko apan nalipay nga nakasabot ra gyod sa gihisgotan!

Inay nga ako ang sulondan sa uban diha sa ministeryo, gibati nako nga ako na hinuon ang gitabangan. Ang mga igsoon mahigugmaong nagtabang kanako kon unsaon pagsangyaw, nga nagtudlo kanako kon unsay akong isulti ug kon unsang tekstoha ang gamiton.

Usa ka adlaw samtang nagsangyaw mi, may batang misinggit, “Vazaha! Vazaha!” Sa Malagasy, mao niy tawag sa mga “langyaw.” Nagdali mi paglakaw kay basig tawgon nila ang ubang mga bata ug maninggit usab sa ingon. Unya gibadlong sa laing batang lalaki ang misinggit. “Dili man na siya langyaw,” siya miingon, “siya makamao sa atong pinulongan!” Ang sister nga kuyog nako maoy nag-interpretar kon unsay ilang gipanulti kay dili ko kasabot tungod sa kapaspas. Bisan pa niana, nalipay ko nga miuswag ko. Sa kadugayan gibati nako nga ang Madagascar morag ako nang lugar.

Bisan sa akong mga kamingaw, ako nadasig sa pahiyom sa gagmayng mga bata nga migunit kanako nga daw nalipay kaayo sa pagtan-aw kanako, bisan tuod dili ko kaayo makakomunikar  kanila. Panalangin gayod gikan kang Jehova ang mga batan-on sa kongregasyon. Ang batan-ong sister nga si Hasina nahimo nakong tig-interpretar. Kon walay laing makasabot kanako, mopatim-awng iya kong masabtan. Ug kanunay siyang nakatabang kanako kon makigsulti ko sa akong mga higala sa kongregasyon, ug iyang ipatin-aw kanila kon unsay buot nakong ipasabot.

Naasayn mi sa akong bana sa usa ka kongregasyon nga hapit nang bahinon aron makatukod ug bag-o. Busa kinahanglang ipadumala sa uban ang pipila ka gitun-an sa Bibliya kay kini sila nagpuyo sa teritoryo nga sakop sa bag-ong kongregasyon. Gitugyan kanako sa usa ka sister ang usa sa iyang mga estudyante. Nahadlok ko, ug giingnan ko siya nga dili pa ko andam, apan siya pursigido. Iya kong giingnan nga tabangan ko ni Jehova. Ginamit ang labing sayon nga mga pulong, siya malulotong nagsulti kanako nga sa kadugayan ako makatudlo ra sa uban. Nadasig kaayo ko niadto.

Sukad niadto, ang maong estudyante miuswag pag-ayo. Usa ka adlaw sa dihang diha ko sa gawas, gitawag ko niya. Magpakasal na sila sa iyang bana. Ang iyang bana nagsugod na sa pagtuon, ug duna silay espirituwal nga mga tumong nga buot makab-ot, lakip ang pagpabawtismo. Kadto nakapalipay kanako, bisan tuod nahibalo ko nga dili kami, kondili si Jehova mao ang nagkabig sa mga tawo.

Daghan mig nakat-onan niining bag-o namong asaynment. Bisan tuod mingawon mi sa among mga higala ug sa among pamilya, gibati namo nga morag kauban namo sila diri. Kanunay namo silang hisgotan sa mga kaigsoonan dinhi, ug sila diri mangomosta pod nila. Kami nagpaabot sa panahon nga ang among “mga pamilya” mahiusa ug magkitaay pag-usab.

Daw makadungog gihapon kog “musika” kon mosulti ang mga tawo diri. Apan karon ako makasabot na. Naglaom ko nga makaamot sa nagkaharmonyang honi sa musika, ingnon ta, inay nga panagsang magpabudyong ug paspas nga tunog sama sa trompeta. Si Jesus miingon: “Ayaw gayod kamo kabalaka bahin sa sunod nga adlaw, kay ang sunod nga adlaw adunay iyang kaugalingong mga kabalaka.” (Mateo 6:34) Busa, hinayhinay lang namong gitun-an ang matag “nota,” o pulong. Sa pagkakaron, sa mahulagwayong paagi padayon nakong ipatono ang akong mga igdulungog, hunahuna, ug kasingkasing aron makigtambayayong sa atong mapailobon ug mahigugmaong mga igsoon dinhi sa Madagascar.

[Hulagway sa panid 25]

Nagsangyaw uban ni Hasina