Pagkat-on Gikan sa Pulong sa Diyos

Unsa ang Gingharian sa Diyos?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Unsa ang Gingharian sa Diyos?

Ang Gingharian sa Diyos maoy usa ka langitnong kagamhanan. Pulihan niini ang tanang kagamhanan ug tumanon niini ang kabubut-on sa Diyos sa langit ug sa yuta. Busa ang Gingharian sa Diyos mao ang tubag sa atong gitinguhang maayong kagamhanan.—Basaha ang Daniel 2:44; Mateo 6:9, 10.

Ang usa ka gingharian kinahanglang dunay usa ka hari. Gitudlo ni Jehova ang iyang Anak, si Jesus, aron mahimong Hari sa Iyang Gingharian.—Basaha ang Lucas 1:30-33.

2. Nganong si Jesus ang takos nga Magmamando?

Ang Anak sa Diyos mao ang takos nga Hari kay siya maluloton, mobarog sa pagkamatarong, ug dunay gahom sa pagtabang sa katawhan. (Mateo 11:28-30) Human siya mabanhaw, si Jesus mikayab sa langit ug naghulat didto sa tuong kamot ni Jehova. (Hebreohanon 10:12, 13) Sa kataposan, gihatagan siya sa Diyos ug gahom aron magmando gikan sa langit.—Basaha ang Daniel 7:13, 14.

3. Kinsay kauban ni Jesus nga magmando?

Usa ka grupo nga gitawag ug “mga balaan” ang gipili sa Diyos aron magmando uban ni Jesus didto sa langit. (Daniel 7:27) Ang unang gipili mao ang matinumanong mga apostoles ni Jesus. Hangtod karon, si Jehova nagpilig matinumanong mga lalaki ug babaye ingong sakop niini nga mga balaan. Sama kang Jesus, sila gibanhaw ingong espirituhanon.—Basaha ang Juan 14:1-3; 1 Corinto 15:42-45.

Pila man ang moadto sa langit? Si Jesus nagtawag kanila nga “gamayng panon.” (Lucas 12:32) Ang ilang katibuk-ang gidaghanon maoy 144,000, ug sila magmando uban kang Jesus ibabaw sa yuta.—Basaha ang Pinadayag 5:9, 10; 14:1.

  4. Kanus-a nagsugod sa pagmando ang Gingharian sa Diyos?

Si Jesus nahimong hari niadtong 1914. * Wala madugay human niadto, gitambog niya si Satanas ug ang iyang mga demonyo dinhi sa yuta. (Pinadayag 12:7-10, 12) Sukad niini, misamot ang kalisdanan sa katawhan. Ang mga gubat, linog, gutom, epidemya, ug pagkamalapason nagpaila nga ang presenteng sistema sa mga butang anaa na sa kataposang mga adlaw. (2 Timoteo 3:1-5) Ang tanan nga buot makabenepisyo sa Gingharian sa Diyos kinahanglang mahimong sumusunod sa maong Hari, si Jesus.—Basaha ang Lucas 21:7, 10, 11, 31, 34, 35.

5. Unsay buhaton sa Gingharian sa Diyos?

Pinaagi sa tibuok yutang pagsangyaw, natabangan na sa Gingharian sa Diyos ang minilyon sa tanang kanasoran nga makakat-on sa mga paagi sa Diyos. (Mateo 24:14) Kini manalipod sa “usa ka dakong panon” sa maunongong mga sakop ni Jesus sa dihang laglagon na kining presenteng sistema sa mga butang.—Basaha ang Pinadayag 7:9, 10, 13-17.

Sulod sa 1,000 ka tuig, inanayng himoon sa Gingharian sa Diyos ang yuta ingong paraiso. Sa kataposan, itugyan ni Jesus ang Gingharian ngadto sa iyang Amahan. (1 Corinto 15:24-26) Kinsay gusto nimong sultihan bahin sa Gingharian sa Diyos?—Basaha ang Salmo 37:10, 11, 29.

Alang sa dugang impormasyon, tan-awa ang kapitulo 8 ug 9 niini nga basahon,Unsay Tinuod nga Gitudlo sa Bibliya?, nga gipatik sa mga Saksi ni Jehova.

[Footnote]