Unsay Angayng Makat-onan sa mga Anak?

“Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.”—2 TIMOTEO 3:16.

ANG mga anak kinahanglang matudloan sa kamatuoran bahin sa Diyos. Asa sila makakat-on niini? Sa labing tinamod nga basahon sa tibuok kalibotan, ang Bibliya.

Ang Bibliya samag sulat gikan sa Diyos. Diha niini, ang Diyos nagbutyag sa iyang personalidad ug nagtaganag moral nga giya alang sa tanan niyang anak, bata man o tigulang. Matikdi ang pipila lang ka pagtulon-an sa Bibliya ug ang mga leksiyon nga makat-onan niini bisan sa mga bata.

Unsay gusto sa Diyos nga atong masayran bahin kaniya?

▪ Ang gitudlo sa Bibliya: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.”—Salmo 83:18.

Leksiyon: Ang Diyos usa ka tinuod nga Persona ug siya adunay personal nga ngalan.

▪ Ang gitudlo sa Bibliya: “Ang tanang kasingkasing ginasusi ni Jehova, ug ang matag kiling sa hunahuna iyang ginaila. Kon ikaw mangita kaniya, iyang itugot nga siya imong makaplagan.”—1 Cronicas 28:9.

Leksiyon: Si Jehova nga Diyos nahingawa kanatong tanan, lakip sa gagmayng bata. (Salmo 10:14; 146:9) Gusto niya nga kita makakat-on bahin kaniya.

▪ Ang gitudlo sa Bibliya: “Dili ninyo sakiton ang bisan kinsang . . . batang ilo-sa-amahan. Kon ikaw magsakit kaniya, nan kon siya motuaw kanako, sa walay pakyas akong dunggon ang iyang pagtuaw.”—Exodo 22:22-24.

Leksiyon: Si Jehova mamati sa pag-ampo bisan sa gagmayng bata. Kita kanunayng makaampo sa Diyos ug makapahungaw sa atong kinailadmang hunahuna ug pagbati.

▪ Ang gitudlo sa Bibliya: “Sublisubli nga ilang gisulayan ang Diyos, ug ilang gipasakitan bisan ang Balaang Usa sa Israel.”—Salmo 78:41.

Leksiyon: Ang atong sinultihan ug binuhatan makaapektar sa pagbati ni Jehova, busa angay tang mamalandong sa dili pa mosulti ug mobuhat.

 Unsaon nato pagtratar ang uban?

▪ Ang gitudlo sa Bibliya: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Leksiyon: Kon gidawat sa Diyos ang tanang katawhan, dili kita magpihig sa uban tungod lang kay sila lahig rasa o panagway.

▪ Ang gitudlo sa Bibliya: “[Magmaandam] kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.”—1 Pedro 3:15.

Leksiyon: Sa dihang maghisgot ug relihiyon, ipahayag nato ang atong gituohan uban ang kombiksiyon sa malumong paagi. Kita angay usab magpakitag pagtahod sa uban nga lahi kanatog pagtuo.

Unsaon nato pagtratar ang mga membro sa pamilya?

▪ Ang gitudlo sa Bibliya: “Kamong mga anak, magmasinugtanon sa inyong mga ginikanan sa tanang butang, kay kini makapahimuot pag-ayo sa Ginoo.”—Colosas 3:20.

Leksiyon: Kon masinugtanon ang mga anak, kana nagpamatuod nga sila nahigugma sa ilang mga ginikanan ug buot nilang pahimut-an ang Diyos.

▪ Ang gitudlo sa Bibliya: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.”—Colosas 3:13.

Leksiyon: May mga panahon nga ang uban, lakip ang mga membro sa pamilya, makapasilo kanato. Apan kon buot natong pasayloon ta sa Diyos, kinahanglang magpasaylo ta sa uban.—Mateo 6:14, 15.

 Nganong magmatinud-anon ug magmabination?

▪ Ang gitudlo sa Bibliya: ‘Isalikway ninyo ang kabakakan, ug magsulti sa tinuod ang matag usa kaninyo sa iyang silingan.’—Efeso 4:25.

Leksiyon: Kon magsulti tag tinuod, kita nagsundog sa Diyos ug naglipay kaniya. Kon atong batasanon ang pagpamakak, mahisama ta sa kaaway sa Diyos, ang Yawa, nga “amahan sa bakak.”—Juan 8:44; Tito 1:2.

▪ Ang gitudlo sa Bibliya: “Tratara ang uban kon unsay buot nimong pagtratar nila kanimo.”—Mateo 7:12, “Contemporary English Version.”

Leksiyon: Kinahanglang mosabot kita sa pagbati, hunahuna, ug panginahanglan sa mga membro sa pamilya ug sa uban sa atong komunidad. Kon magpakita tag “pagbati alang sa isigkaingon,” lagmit maayo usab ang pagtratar sa uban kanato.—1 Pedro 3:8; Lucas 6:38.

Sumala sa gipakita niini nga mga pananglitan, ang mga leksiyon nga anaa sa Bibliya makatabang sa mga anak nga mahimong mapabilhon, matinahoron, ug mabination. Apan kinsay angayng motudlo niini sa mga anak?