May Nagpaluyo ba sa Pagkadaotan?

“NAKIGLAMANO ko sa yawa.” Mao kini ang giingon sa komander sa kasundalohan sa United Nations sa Rwanda, samtang naghinumdom siya sa ilang kapakyasan nga pugngan ang pagpinuohay sa kaliwat sa maong dapit niadtong 1994. Bahin sa maong mangilngig nga kapintasan, ang lain pang tawo miingon: “Kon duna pa gihapoy dili motuo kang Satanas, mangadto ta sa Rwanda diin tingob nga gipanglubong ang daghang gipamatay.” Ang Yawa bay nagpaluyo niining linuog nga buhat?

Wala isipa sa daghang tawo ang grabeng kapintasan ug kabangis ingong buhat sa dili makitang espiritung linalang. Daghan ang nagtuo nga tungod kini sa pagkadaotan nga anaa kanato. Gihunahuna sa uban nga dunay internasyonal nga grupo sa adunahan ug gamhanang mga tawo nga sekretong nagmaniobra sa katawhan sulod sa daghan nang katuigan aron sa pagmando sa kalibotan. Gibasol usab sa uban ang mga gobyerno ug mga lider sa nasod tungod sa inhustisya ug pag-antos nga ilang nakita.

Sa imong hunahuna, ngano kahang ang pagkadaotan, linuog nga mga buhat, ug pag-antos kaylap kaayo sa kalibotan karon bisan pa sa mga paningkamot sa pagsumpo niini? Nganong ang tawo padayong nagbuhat ug daotan bisag nasayod sila sa sangpotanan niana? Duna bay nagpaluyo niining tanan? Kinsa gayoy nagmando sa kalibotan? Lagmit matingala ka sa tubag.