Pakigsuod sa Diyos

Pagtuman sa Atong Obligasyon sa Diyos

NAKAPANGUTANA ka na ba, ‘Unsay katuyoan sa kinabuhi?’ Si Jehova naghatag kanato dili lang sa katakos nga mangutana niana kondili sa tinguha usab nga masayran ang tubag niana. Mapasalamaton kita nga gitugotan sa atong mahigugmaong Diyos nga mahibaloan nato ang tubag. Ato kanang makaplagan sa iyang Pulong, ang Bibliya. Tagda ang giingon ni Haring Solomon sa Ecclesiastes 12:⁠13.

Talagsaon ang kahimtang ni Solomon. May awtoridad siyang mosulti kon sa unsang paagi makaplagan ang kalipay ug kahulogan sa kinabuhi. Kay gihatagag talagsaong kaalam, dakong bahandi, ug harianong awtoridad, siya nakasusi pag-ayo sa mga kalihokan sa tawo, lakip na sa pangagpas nga mabahandianon ug mainila. (Ecclesiastes 2:​4-9; 4:⁠4) Ilalom sa pag-inspirar sa Diyos, ingon niini ang iyang pagsumaryo: “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” Kini naghubit sa labing magantihon ug mapuslanong paningkamot sa tawo.

“Kahadloki ang matuod nga Diyos.” Daw duna kini negatibong kahulogan. Apan kini nga kahadlok nagpaila nga maayog kahimtang ang atong kasingkasing. Dili kita maghunahuna sa usa ka ulipon nga malisang nga basig masuko ang iyang isog nga agalon kondili sa usa ka anak nga gustong pahimut-an ang iyang mahigugmaong amahan. Ang usa ka reperensiya nag-ingon nga ang pagkahadlok sa Diyos mao ang “pagtahod ug kataha nga gipakita sa Iyang katawhan Kaniya tungod kay sila nahigugma Kaniya ug nagtahod sa Iyang gahom ug kahalangdon.” Ang maong tinamdan mopalihok kanato sa pagpasakop sa iyang kabubut-on tungod kay kita nahigugma kaniya ug nasayod nga siya nahigugma kanato. Kining maayong matang sa kahadlok dili lamang usa ka pagbati; kini gipakita sa mga buhat. Sa unsang paagi?

“Tumana ang iyang mga sugo.” Ang pagkahadlok sa Diyos mopalihok kanato sa pagsugot kaniya. Makataronganon lamang nga atong sugton si Jehova. Ingong atong Magbubuhat, siya nahibalo kon unsa ang labing maayong paagi sa pagkinabuhi, sama ra nga ang usa ka tiggamag produkto nahibalo kon unsaon kini paggamit sa labing maayong paagi. Lain pa, si Jehova nagtinguha sa atong kaayohan. Buot niyang magmalipayon ta, ug ang iyang mga balaod maoy alang sa atong kaayohan. (Isaias 48:17) Bahin niini si apostol Juan miingon: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:⁠3) Ang atong pagkamasinugtanon nagpasundayag sa atong gugma sa Diyos, ug ang iyang mga sugo nagbanaag sa iyang gugma kanato.

“Kini mao ang tibuok nga obligasyon sa tawo.” Gipasiugda niini ang hinungdanong rason kon nganong mahadlok ug mosugot sa Diyos. Kini maoy atong obligasyon, atong katungdanan. Si Jehova mao ang atong Maglalalang, busa utang nato kaniya ang atong kinabuhi. (Salmo 36:⁠9) Utang sab nato kaniya ang atong pagkamasinugtanon. Kon magkinabuhi kita sumala sa iyang kabubut-on, atong gituman ang atong obligasyon.

Nan, unsay katuyoan sa kinabuhi? Sa yanong pagkasulti: Ania ta dinhi aron buhaton ang kabubut-on sa Diyos. Wala nay lain pang makahatag ug kahulogan sa imong kinabuhi. Nganong dili mokat-og dugang bahin sa kabubut-on ni Jehova ug kon sa unsang paagi imong mapahiuyon ang imong kinabuhi niana? Ang mga Saksi ni Jehova malipay sa pagtabang nimo.

Sugyot nga pagbasa sa Bibliya sa Nobyembre:

▪ Proverbio 22-31; Ecclesiastes 1-12–Awit ni Solomon 1-8