Mga Magbabasa Nangutana . . .

Makalahutay ba ang Yuta sa 2012?

▪ “Daghang tawo ang nagganayan sa usa ka balangay sa France . . . Nagtuo sila nga ang kalibotan matapos sa Disyembre 21, 2012, ang kataposan sa 5,125 ka tuig nga siklo sa karaang kalendaryo sa Maya.”—BBC News.

Bisan pa sa panagna sa mga lider sa relihiyon, sa nangangkong siyentipiko, ug sa uban pang mananagna niining ika-21ng siglo nga ang kalibotan matapos, ang yuta magpabilin gayod. Oo, ang yuta makalahutay sa 2012. Sa pagkatinuod, ang Yuta makalahutay dili lang nianang tuiga kondili hangtod pa sa mosunod nga katuigan.

Ang Bibliya nag-ingon: “Ang mga kaliwatan moabot ug laing mga kaliwatan moagi, apan ang yuta magapabilin sa walay kataposan.” (Ecclesiastes 1:4, Ang Biblia Bag-ong Hubad Nga Binisaya) Lain pa, tagda ang gipasabot sa Isaias 45:18: “Kini ang giingon ni Jehova . . . ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an: ‘Ako si Jehova, ug wala nay lain.’”

Sa imong hunahuna, gahinan kahag panahon sa usa ka mahigugmaong amahan ang pagdisenyo ug paghimog dulaan alang sa kalipay sa iyang anak ug gub-on lang niya kini pagkahumag hatag? Siyempre, dili gayod! Sa susama, gilalang sa Diyos ang yuta sa panguna aron malipay ang tawo. Ang Diyos miingon sa unang magtiayon, si Adan ug Eva: “Magmabungahon ug magdaghan kamo ug pun-a ang yuta ug gamhi kini.” Human niana, “nakita sa Diyos ang tanan nga iyang gibuhat ug, tan-awa! kadto maayo kaayo.” (Genesis 1:27, 28, 31) Wala kalimti sa Diyos ang iyang katuyoan alang sa yuta; dili niya tugotang malaglag ang yuta. Mahitungod sa tanan niyang saad, si Jehova miingon: “Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:11.

Hinunoa, kabubut-on sa Diyos nga ‘laglagon ang mga nagalaglag sa yuta.’ (Pinadayag 11:18) Sa iyang Pulong, siya nagsaad: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”—Proverbio 2:21, 22.

Kanus-a kini mahitabo? Walay nasayod. Si Jesus miingon: “Mahitungod nianang adlawa o taknaa walay nahibalo, ni ang mga manulonda sa langit ni ang Anak, kondili ang Amahan lamang.” (Marcos 13:32) Ang mga Saksi ni Jehova dili managna kon kanus-a laglagon sa Diyos ang mga daotan. Bisag nahibalo sila sa “ilhanan” sa kataposan ug nagtuo nga ang katawhan nagkinabuhi na sa giingon sa Bibliya nga “kataposang mga adlaw,” wala sila masayod kon kanus-a gayod moabot “ang kataposan.” (Marcos 13:4-8, 33; 2 Timoteo 3:1) Nahibalo silang ang ilang langitnong Amahan ug ang iyang Anak mao ray nasayod niana.

Sa kasamtangan, ang mga Saksi ni Jehova puliki sa pagsangyaw sa maayong balita sa Gingharian sa Diyos, ang langitnong kagamhanan nga magmando ug maghimo sa Yuta nga usa ka malinawong paraiso, nga mapanag-iya ug puy-an sa mga matarong hangtod sa hangtod.—Salmo 37:29.

[Picture Credit Line sa panid 10]

Image Science and Analysis Laboratory, NASA-Johnson Space Center