“Panahon sa Paghigugma ug Panahon sa Pagdumot”

“ANG Diyos gugma.” Sa ubang lugar ikuwadro sa mga tawo kining mga pulonga ug ibitay sa bungbong sa balay. Sa pagkatinuod, nindot kini nga ekspresyon nga naghubit sa Diyos—ang personipikasyon sa gugma.

Apan daghan ang wala masayod nga anaa kana sa Bibliya. Si apostol Juan misulat: “Siya nga wala mahigugma wala makaila sa Diyos, tungod kay ang Diyos gugma.” (1 Juan 4:8) Si Juan misulat usab bahin sa gugma sa Diyos alang sa kalibotan sa malukat nga katawhan: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.

Tungod niana, ang uban maghunahuna nga pasayloon lang ta kanunay sa Diyos bisag unsay atong himoon. Ang pagkinabuhi sa kadaghanan nagpakita nga sila naghunahuna nga bisag unsay ilang buhaton, dili sila manubag sa Diyos. Apan tinuod ba kana? Gihigugma ba sa Diyos ang tanan, ang maayo ug ang daotan? May panahon bang magdumot ang Diyos?

Ang Gugma sa Diyos ug ang Iyang Pagdumot

Ang maalamong Haring Solomon miingon: “Adunay tinudlong panahon alang sa tanang butang, bisan usa ka panahon alang sa matag kalihokan ilalom sa mga langit . . . panahon sa paghigugma ug panahon sa pagdumot.” (Ecclesiastes 3:1, 8) Base niining prinsipyoha, atong makita nga bisag ang Diyos mahigugmaon ug maluloton kaayo, may mga panahon nga siya magdumot.

Una, unsay kahulogan sa “pagdumot” sumala sa pagkagamit sa Bibliya? Usa ka reperensiya nag-ingon: “Sa Kasulatan ang pulong nga ‘pagdumot’ adunay lainlaing mga kahulogan. Kini mahimong magtumong sa hilabihang pagkamabatokon, padayong kayugot nga sagad inubanan sa tinguha sa pagdaot. Ang maong pagdumot lagmit mahimong usa ka nangibabawng emosyon nga magtinguha sa paghimog kadaot sa gidumtan.” Mao kini ang kahulogan nga sagad natong nahibaloan, ug atong nakita ang epekto niining matanga sa pagdumot sa tibuok kalibotan. Apan ang maong reperensiya nagpadayon: “Ang ‘pagdumot’ mahimong magpasabot usab sa usa ka kusganong pag-ayad apan walay bisan unsang tuyo sa pagdaot sa gidumtan.”

Ang ikaduhang kahulogan maoy atong tagdon. Kana maoy grabeng pag-ayad, bug-os nga kasilag—walay tinguha sa pagdaot sa gidumtan. Posible bang bation sa Diyos kining matanga sa pagdumot? Matikdi ang giingon sa Proverbio 6:16-19: “Adunay unom ka butang nga ginadumtan ni Jehova; oo, pito ka butang ang dulumtanan sa iyang kalag: mapahitas-ong mga mata, bakakon nga dila, ug mga kamot nga nagaula ug inosenteng dugo, usa ka kasingkasing nga nagamugnag madaotong mga laraw, mga tiil nga nagadali sa pagdalagan ngadto sa pagkadaotan, usa  ka bakakong saksi nga nagasabwag ug kabakakan, ug ang nagapahinabog panaglalis sa taliwala sa mga kaigsoonan.”

Atong nakita nga dunay mga buhat nga gidumtan sa Diyos. Apan, wala kana magpasabot nga iyang gidumtan ang tawong naghimo niana. Iyang konsiderahon ang mga hinungdan, sama sa kahuyangan, palibot, pagpadako, ug kawalay alamag. (Genesis 8:21; Roma 5:12) Ang magsusulat sa Proverbio nagpatin-aw niini pinaagig maayong pananglitan: “Ang gihigugma ni Jehova iyang ginabadlong, ingon sa ginabuhat sa usa ka amahan sa anak nga iyang gikahimut-an.” (Proverbio 3:12) Ang pagkamasinupakon sa usa ka bata mahimong dumtan, apan ang ginikanan mahigugma gihapon kaniya ug maghimo sa tanan aron siya matabangang mag-usab pinaagi sa pagdisiplina kaniya. Sa iyang gugma, si Jehova mohimo usab niana kon may paglaom nga maluwas ang makasasala.

Sa Dihang Makataronganon ang Pagdumot

Apan komosta kon ang usa nahibalo sa kabubut-on sa Diyos apan modumili sa pagbuhat niana? Siya dili makaangkon sa gugma sa Diyos kondili sa iyang kasuko. Kon tinuyo siyang mobuhat sa gidumtan ni Jehova, siya pagadumtan Niya. Pananglitan, ang Bibliya nag-ingon: “Si Jehova magausisa sa matarong ug sa daotan, ug si bisan kinsa nga nahigugma sa kapintasan ginadumtan gayod sa Iyang kalag.” (Salmo 11:5) Walay kapasayloan alang sa dili mahinulsolon, ingon sa gipatin-aw ni apostol Pablo sa iyang sulat sa mga Hebreohanon: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala, apan may usa ka makahahadlok nga pagpaabot sa paghukom ug nagdilaab nga pangabugho nga magaut-ot niadtong mga nagasupak.” (Hebreohanon 10:26, 27) Nganong himoon man kana sa usa ka Diyos sa gugma?

Kon ang usa tinuyong magpadayon sa pagbuhat ug grabeng sala, ang pagkadaotan makagamot na kaniya ug dili na gayod siya mausab. Ang Bibliya nagtandi kaniya sa usa ka leopardo nga dili makausab sa mga kabang niini. (Jeremias 13:23) Kay wala maghinulsol, ang maong tawo nakahimo sa giingon sa Bibliya nga “walay kataposang sala,” nga wala nay kapasayloan.—Marcos 3:29.

Kini ang kahimtang ni Adan ug Eva ug ni Judas Iscariote. Sanglit si Adan ug Eva gilalang nga hingpit ug ang sugo sa Diyos kanila maoy tin-aw ug nasabtan nila, dayag nga tinuyo ang ilang pagpakasala ug busa dili mapasaylo. Ang giingon sa Diyos kanila sa ulahi wala mag-aghat kanila sa paghinulsol. (Genesis 3:16-24) Si Judas, bisag dili hingpit, maoy suod nga kauban sa Anak sa Diyos apan siya nagmaluibon. Si Jesus nagtawag kaniya nga “anak sa kalaglagan.” (Juan 17:12) Ang Bibliya nagpakita usab nga ang Yawa tinuyong nagpakasala sukad pa sa sinugdan, ug angay lamang  laglagon. (1 Juan 3:8; Pinadayag 12:12) Kini nga mga indibiduwal gidumtan sa Diyos.

Apan makapadasig ang pagkahibalo nga dili tanang nakasala ang wala nay paglaom. Si Jehova mapailobon kaayo ug dili malipay sa pagsilot niadtong nakasala tungod sa kawalay alamag. (Ezequiel 33:11) Siya nag-awhag kanila nga maghinulsol aron mapasaylo. Atong mabasa: “Pabiyaa ang tawong daotan sa iyang dalan, ug ang tawong madaoton sa iyang mga hunahuna; ug pabalika siya kang Jehova, nga maluoy kaniya, ug ngadto sa atong Diyos, kay siya magpasaylo sa madagayaon gayod.”—Isaias 55:7.

Timbang nga Panglantaw sa Gugma ug Pagdumot

Tin-aw, ingong mga tigsundog sa Diyos, ang matuod nga mga Kristohanon kinahanglang makasabot kon kanus-a ang “panahon sa paghigugma” ug ang “panahon sa pagdumot.” Kon ang usa sobra ka emosyonal, mahimong dili timbang ang iyang panglantaw sa gugma ug kaluoy. Apan ang giingon sa tinun-ang si Judas makatabang nato nga mahuptan ang hustong pagkatimbang tali sa pagpakitag kaluoy ug sa pagdumot sa sala: “Magpadayon sa pagpakitag kaluoy ngadto sa uban, nga magabuhat niana nga may kahadlok, samtang kamo nagadumot bisan sa pang-ilalom nga besti nga nahugawan sa unod.” (Judas 22, 23) Busa, angay natong dumtan ang pagkadaotan apan dili ang tawong naghimo niana.

Ang mga Kristohanon gisugo usab sa paghigugma sa ilang mga kaaway pinaagi sa pagbuhat ug maayo kanila. Si Jesus miingon: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.” (Mateo 5:44) Kanay hinungdan nga ang mga Saksi ni Jehova dili mohunong sa pagsangyaw sa maayong balita sa Gingharian sa Diyos ngadto sa ilang mga silingan, bisag ang pipila dili mosanong niana. (Mateo 24:14) Kay naglantaw sumala sa panglantaw sa Bibliya, giisip sa mga Saksi ang matag tawo ingong potensiyal nga makadawat sa gugma ug kaluoy ni Jehova. Kon dili pabilhan ang ilang paningkamot sa pagtabang sa mga tawo o kon sila isalikway o lutoson pa gani, sundon sa mga Saksi ang tambag ni apostol Pablo: “Magpadayon sa pagpanalangin kanila nga nagalutos; himoa ang pagpanalangin ug ayaw pagpanunglo . . . Ayaw balosi si bisan kinsa ug daotan tungod sa daotan.” (Roma 12:14, 17) Ilang hinumdoman nga si Jehova ang magtino kon kinsay iyang higugmaon ug kon kinsay iyang dumtan. Siya ang kataposang mohukom labot sa kinabuhi ug kamatayon.—Hebreohanon 10:30.

Oo, “ang Diyos gugma.” Sa atong bahin, kinahanglan kitang magpabili sa iyang gugma ug maningkamot sa pagsusi kon unsay iyang kabubut-on ug buhaton kana. Ang mga Saksi ni Jehova sa inyong dapit malipay sa pagtabang nimo nga makakat-on gikan sa imong Bibliya kon unsay kabubut-on sa Diyos ug kon unsaon kana pagpadapat sa imong kinabuhi. Sa pagbuhat niana, dili ka dumtan sa Diyos ug imong matagamtam ang iyang gugma.

[Blurb sa panid 23]

“Adunay unom ka butang nga ginadumtan ni Jehova; oo, pito ka butang ang dulumtanan sa iyang kalag: mapahitas-ong mga mata, bakakon nga dila, ug mga kamot nga nagaula ug inosenteng dugo, usa ka kasingkasing nga nagamugnag madaotong mga laraw, mga tiil nga nagadali sa pagdalagan ngadto sa pagkadaotan, usa ka bakakong saksi nga nagasabwag ug kabakakan, ug ang nagapahinabog panaglalis sa taliwala sa mga kaigsoonan.”—PROVERBIO 6:16-19

[Blurb sa panid 24]

“Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala, apan may usa ka makahahadlok nga pagpaabot sa paghukom.”—HEBREOHANON 10:26, 27

[Blurb sa panid 25]

“Pabiyaa ang tawong daotan sa iyang dalan, ug ang tawong madaoton sa iyang mga hunahuna; ug pabalika siya kang Jehova, nga maluoy kaniya . . . Siya magpasaylo sa madagayaon gayod.”—ISAIAS 55:7

[Hulagway sa panid 24]

Ang mahigugmaong ginikanan magdisiplina sa iyang anak aron matabangan siya

[Hulagway sa panid 25]

Daghang piniriso ang nakabenepisyo sa gugma ug kaluoy sa Diyos