Diin ang mga Utlanan Walay Kapuslanan

Ang mga Saksi ni Jehova naningkamot pagbuntog sa mga babag tali sa mga tawo. Ilang gisunod ang prinsipyo sa giingon ni Jesus sa iyang mga tinun-an: “Kamong tanan mga igsoon.” (Mateo 23:8) Ang pananglitan niini makita diha sa duha ka dapit sa pagsimba—ang usa sa Portugal ug ang usa sa Spain.

ANG pinarilang siyudad sa Valença do Minho, sa amihanang Portugal, gitukod sa peligrosong panahon. Makita gikan sa mga kuta niini ang Minho River, ang utlanan sa Spain ug Portugal. Sa tabok sa suba nahimutang ang siyudad sa Tui nga sakop sa Spain, nga may katedral nga morag kuta tan-awon. Ang dagkong salipdanan sa Tui ug Valença gitukod niadto pang ika-17ng siglo, sa dihang naggubatay ang Spain ug Portugal.

Niadtong 1995, gikuha ang tsekpoint ug aduwana sa utlanan niining duha ka nasod sa European Union. Apan ang paghiusa sa mga tawo wala lamang maglangkit sa pagbungkag sa mga babag sa utlanan. Kini naglangkit sa hunahuna ug kasingkasing. Sa Valença dunay gamay, nindot nga tinukod nga nagpakita nga puwedeng mawagtang ang babag tali sa mga tawo. Kini maoy dapit sa pagsimba—usa ka Kingdom Hall sa mga Saksi ni Jehova—nga parehong gigamit sa Spanish ug Portuguese nga kongregasyon sa mga Saksi.

Kini nga panghitabo nagsugod niadtong 2001, sa dihang ang mga Saksi sa Tui nanginahanglag bag-ong Kingdom Hall. Kinahanglan silang mohawa sa ilang giabangang lugar, ug kulang ang ilang pondo sa pagtukod ug bag-ong tigomanan. Dili sab nila maarangan ang pag-abang ug lain kay ang kongregasyon gamay ra. Busa, kining Spanish nga mga Saksi mihangyo sa ilang mga igsoong Portuguese sa Valença kon makagamit ba sila sa tigomanan niini, nga pipila lang ka kilometros gikan sa sentro sa Tui.

“Amo ning gihisgotan sa usa ka miting sa Disyembre 2001,” nahinumdom si Eduardo Vila, usa ka membro sa Tui Congregation sa Spain. “Pagbiya nako sa maong miting, akong  nakita nga gitandog ni Jehova ang kasingkasing sa among mga igsoong Portuguese. Dako kaayo silag sakripisyo sa pagtukod ug nindot nga Kingdom Hall, ug makapalig-on sa pagtuo nga sila andam sa pagpaambit kon unsay naa nila.”

“Among giabiabi ang Spanish nga mga igsoon sa among Kingdom Hall,” miingon si Américo Almeida, usa ka Portuguese nga Saksi nga presente sa maong miting. “Kami misalig nga panalanginan ni Jehova kini nga kahikayan, ug nagkahiusa mi sa among desisyon.” Ang mga Saksi nianang duha ka nasod dunay pagsinabtanay. “Daw dili katuohan, apan wala gani namo mamatikdi nga gikan mi sa duha ka lainlaing nasod. Gibati namo nga managsoon ra mi,” miingon si Paolo nga taga-Valença.

Ang usa sa unang mamatikdan sa mga bisita sulod sa Kingdom Hall mao ang duha ka parehong orasan sa likod, nga lainlaig oras. Ang Spain abanteg usa ka oras sa Portugal, apan mao ra nay butang nga wala sila magkahiusa diha sa Kingdom Hall. Sa dihang kinahanglang ayohon ang tigomanan, ang Regional Building Committee nga nagbase sa Spain maoy nagdumala sa makugihong mga trabahador gikan sa duha ka kongregasyon. “Daghang hanas nga mga igsoon gikan sa Spain ang mitabang namo, ang uban mibiyahe pag kapin sa 160 kilometros,” matod ni Paolo. “Ang maong proyekto nakapalig-on sa gugma tali sa duha ka kongregasyon.”

 Tagdon nato ang ikaduhang pananglitan sa pagbuntog sa mga babag.

Panaghiusa Diha sa Nabahin nga Walog

Ang Puigcerdá maoy siyudad sa Spain nga duol sa utlanan sa France. Kini nahimutang sa sentro sa tabunok nga walog nga gilibotan sa habog nga kabukiran sa Pyrenees. Ang tibuok walog, nga gitawag ug Cerdaña, maoy sakop kanhi sa Spain. Apan pagka-1659, sa kasabotan sa kalinaw nga nailhang Treaty of the Pyrenees, gihatag sa Spain ngadto sa France ang katunga sa maong walog.

Karon, ang mga taga-France anha mamalit sa Puigcerdá, ang kinadak-ang siyudad sa maong walog. Ug sukad sa 1997, gipagamit usab sa mga Saksi ni Jehova sa Puigcerdá ang ilang Kingdom Hall sa French nga mga Saksi. Nianang tuiga, ang French nga mga Saksi kinahanglang mobiya sa ilang giabangang tigomanan. Ang kinadul-ang Kingdom Hall sa France maoy usa ka oras nga biyahe, ug panahon sa tingtugnaw ang mga dalan sa bukid nga maoy agian sa mga magbiyahe kasagarang mapuno sa yelo.

Sa dihang gipatin-aw sa French nga mga Saksi nga nagkinahanglan gayod silag tigomanan, ang Spanish nga mga Saksi mitanyag dayon sa ilang Kingdom Hall. “Ang tanang Spanish nga igsoon gusto gayong magpagamit sa tigomanan,” matod ni Prem, nga usa ka Saksi didto. “Siyempre, kini nga tinamdan maoy tungod sa pagbansay sa Kasulatan nga among nadawat latas sa katuigan. Duha ka semana sa ulahi, amo nang gipagamit ang among Kingdom Hall, ug karon 13 ka tuig na ming magkauban.”

“Alang namo, ang Kingdom Hall sa Puigcerdá maoy labing praktikal nga dapit nga tambongan,” miingon si Eric, usa ka ansiyano sa French nga kongregasyon. “Ug mahinumdom pa ko sa mainit nga pag-abiabi kanamo sa Spanish nga kongregasyon. Ilang giadornohan ang ilang tigomanan ug dagkong pungpong sa mga bulak ug dihay karatula nga nag-ingon: ‘Maayong pag-abot, minahal nga mga igsoon.’”

“Nagtuo ang mga tawo nga nawala na ang kongregasyon tungod sa pagsira sa among Kingdom Hall sa France,” midugang si Eric. “Apan ang among regular nga pagsangyaw sa maong dapit—nga naglakip sa pagpanagtag ug mga imbitasyon alang sa among mga tigom sa Spain—nagpakita nga sayop ang ilang pagtuo. Malipay ang mga interesado nga motambong sa tigomanan sa Spain. Dugang pa, kay usa ra man ka Kingdom Hall ang among gigamit, kami mas nasuod sa among mga igsoong Spanish. Sa una, nahibalo mi nga may Spanish nga kongregasyon sa pikas bahin sa utlanan, apan wala mi kaayoy kontak nila. Karon nga pirme na ming magkita, wala na mi mobating nag-inusara niining hilit nga walog.”

 Nakapatungha bag problema ang panaglahi sa kultura? “Sa dihang nahibaloan nako nga ang among tigom himoon na sa Spain, medyo nabalaka ko,” miingon ang usa ka 80-anyos nga French nga Saksi. “Apan tungod sa pagkamaabiabihon ug pagkamahigalaon sa mga igsoon sa Puigcerdá, walay mitunghang problema. Hinuon, kadto maoy kahigayonan sa pagpamatuod nga may internasyonal nga panaghiusa ang katawhan ni Jehova.”

Pundasyon sa Mas Suod nga Relasyon

Ang nagpundar sa European Union nag-ingon nga ang membrong mga nasod “determinadong ipatungha ang pundasyon sa mas suod nga relasyon sa mga tawo sa Europe.” Ang pagbungkag sa mga utlanan niadtong mga 1980 ug 1990 gihimo aron makab-ot dayon ang maong tumong. Apan gikinahanglan usab ang pagbuntog sa mga babag sa hunahuna.

Ang mga Saksi ni Jehova naningkamot gayod sa pagwagtang sa pagpihig ug kawalay-pagsalig. Ilang nasabtan nga may kaayohan nga ang mga igsoon naggikan sa lainlaing kultura ug nga “ang Diyos dili mapihigon.” (Buhat 10:34) Sa ilang internasyonal nga mga kombensiyon ug sa Kingdom Hall, ilang nasinati ‘kon unsa kamaayo ug kamakalilipay nga ang mga igsoon mag-uban pagpuyo diha sa panaghiusa.’ (Salmo 133:1) Ang panaghiusa nga naugmad sa mga Saksi sa Valença ug Puigcerdá uban sa ilang mga igsoon sa sikbit nga mga nasod maoy buhing pamatuod niana.

[Blurb sa panid 13]

“Daw dili katuohan, apan wala gani namo mamatikdi nga kami gikan sa duha ka lainlaing nasod. Gibati namo nga managsoon ra mi”

[Blurb sa panid 14]

“Ang maong proyekto nakapalig-on sa gugma tali sa duha ka kongregasyon”

[Blurb sa panid 15]

“Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!” SALMO 133:1

[Hulagway sa panid 12, 13]

Ang Tui ug Minho River nga makita gikan sa pinarilang siyudad sa Valença do Minho

[Hulagway sa panid 14]

Pag-ayo sa Kingdom Hall

[Hulagway sa panid 15]

Ang Pyrenees ug ang walog sa Cerdaña

[Hulagway sa panid 15]

Duha ka ansiyano gikan sa duha ka kongregasyon—ang usa Spanish ug ang usa French—nga magtigom sa Kingdom Hall sa Puigcerdá