‘Magbaton ug Gugma sa Inyong Taliwala’

“Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—JUAN 13:34, 35.

Ang Kahulogan Niini: Gisugo ni Kristo ang iyang mga sumusunod nga maghigugmaay sa usag usa ingon sa iyang paghigugma kanila. Sa unsang paagi sila gihigugma ni Jesus? Ang iyang gugma mipatigbabaw sa pagpihig sa rasa ug sekso nga kaylap sa iyang adlaw. (Juan 4:7-10) Gugma ang nagtukmod kang Jesus sa pagsakripisyo sa iyang panahon, kusog, ug kahayahay aron tabangan ang uban. (Marcos 6:30-34) Sa kataposan, gipakita ni Kristo ang gugma sa kinadak-ang paagi nga posible. “Ako ang maayong magbalantay,” siya miingon. “Ang maayong magbalantay magatugyan sa iyang kalag alang sa mga karnero.”—Juan 10:11.

Ang Gihimo sa Unang-Siglong Kristohanon: Sa unang siglo, ang mga Kristohanon nagtawag sa usag usa nga “igsoon.” (Filemon 1, 2) Ang katawhan sa tanang kanasoran giabiabi sa Kristohanong kongregasyon, kay sila nagtuo nga “walay kalainan tali sa Hudiyo ug sa Grego, kay adunay sama ra nga Ginoo ibabaw sa tanan.” (Roma 10:11, 12) Human sa Pentekostes 33 C.E., ang mga tinun-an sa Jerusalem ‘nagbaligya sa ilang mga kabtangan ug mga katigayonan ug nag-apod-apod sa halin ngadto sa tanan, sumala sa panginahanglan ni bisan kinsa.’ Ngano? Aron kadtong bag-ong nabawtismohan makapabilin sa Jerusalem ug makapadayon “sa pagdeboto sa ilang kaugalingon sa ginatudlo sa mga apostoles.” (Buhat 2:41-45) Unsay nagtukmod kanila sa pagbuhat niana? Mga 200 ka tuig human sa kamatayon sa mga apostoles, gikutlo ni Tertullian ang gisulti sa uban bahin sa mga Kristohanon: “Pagkadako sa ilang gugma sa usag usa . . . andam gani silang mamatay alang sa usag usa.”

Kinsa Karon ang Nagsunod sa Ilang Sumbanan? Ang librong The History of the Decline and Fall of the Roman Empire (1837) nag-ingon nga latas sa kasiglohan ang mga nag-angkong Kristohanon “nakapahamtag mas grabeng kabangisan sa usag usa kay sa ilang nasinati sa kamot sa mga dili magtutuo.” Nakaplagan sa usa ka pagtuon didto sa Amerika nga daghang relihiyosong tawo—kadaghanan kanila nag-angkong Kristohanon— ang mapihigon sa rasa. Ang mga maninimba sa usa ka nasod sagad dili mahunahunaon niadtong sama nilag relihiyon sa laing nasod ug busa dili makahimo o dili gustong motabang sa ilang isigkamagtutuo panahon sa panginahanglan.

Niadtong 2004, human makasinati ang Florida ug upat ka sunodsunod nga bagyo sulod sa duha ka bulan, ang tsirman sa Emergency Operations Committee nagsusi aron sa pagseguro nga ang ilang mga hinabang gigamit sa hustong paagi. Siya miingon nga walay laing grupo nga sama kaorganisado sa mga Saksi ni Jehova, ug siya mitanyag ug bisan unsang hinabang nga gikinahanglan sa mga Saksi. Sa sayosayo pa, niadtong 1997, usa ka grupo sa mga Saksi ni Jehova ang nagdalag mga tambal, pagkaon, ug sinina didto sa Democratic Republic of Congo aron sa pagtabang sa ilang Kristohanong mga igsoon ug sa uban pang nanginahanglan. Ang mga isigka-Saksi sa Europe nagdonar ug hinabang nga mikabat ug usa ka milyong dolyar (U.S.).