▪ Ang doktrina sa Trinidad gihubit sa daghang paagi, ug ania ang usa niini: “Dunay tulo ka balaang Persona (ang Amahan, ang Anak, ang Espiritu Santo), nga gikaingong ang kada usa walay kataposan, ang kada usa labing gamhanan, walay usa kanila nga mas taas o ubos, ang matag usa gitawag nga Diyos, apan kon kini sila usahon sila mahimong usa lang ka Diyos.” Pagtulon-an ba kini sa Bibliya?

Ang Mateo 28:19 sagad gamiton sa pagpamatuod niini nga doktrina. Ang maong teksto sa hubad nga Ang Biblia, PBS nagkutlo kang Jesus: “Busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan ug sa Anak ug sa Espiritu Santo.” Tinuod nga gihisgotan dinhi ang Amahan, ang Anak, ug ang espiritu santo. Apan, wala kini mag-ingong sila usa ra. Gisugo ni Jesus ang iyang Hudiyong mga sumusunod sa pagtudlo ug pagbawtismo sa mga tawo sa ngalan sa Amahan, sa Anak, ug sa balaang espiritu. Ingong usa ka nasod, unsay gituohan sa mga Hudiyo?

Sa dihang nadawat sa nasod sa Israel ang Balaod sa pakigsaad, nga nahimong bahin sa Bibliya, sila gisugo: “Dili ka magbaton ug laing mga diyos sa atubangan ko.” (Deuteronomio 5:7) Pila ka persona ang nagsulti dinhi? Ang Deuteronomio 6:4 klarong nag-ingon: “Pamati, Oh Israel: Si Jehova nga atong Diyos maoy usa lamang ka Jehova”—dili tulo sa usa ka Diyos. Ang Israel bag-o pang gipagawas sa Ehipto, diin gisimba si Osiris, Isis, ug Horus (gipakita sa wala)—usa sa daghang diyos nga tinagutlo. Busa, ang Israel gisugo sa pagsimbag usa lamang ka Diyos. Unsa ka hinungdanon nga masabtan nila kining sugoa? Ang usa ka rabbi nga si Dr. J. H. Hertz nag-ingon: “Kining dungganong pahibalo sa absolutong monoteyismo maoy pagpakiggubat batok sa tanang poleteyismo . . . Ang Shema wala maglakip sa trinidad sa Kristohanong doktrina isip kalapasan sa Pagkausa sa Diyos.” *

Sanglit si Jesus natawong Hudiyo, siya gisugo sa pagsunod niini. Human sa iyang bawtismo, sa dihang gitental sa Yawa, siya miingon: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” (Mateo 4:10; Deuteronomio 6:13) Labing menos duha ka butang ang atong makat-onan niini. Una, si Satanas naningkamot paghaylo kang Jesus sa pagsimbag laing diyos gawas kang Jehova, nga dili unta niya buhaton kon si Jesus bahin pa sa mao nga Diyos. Ikaduha, gitin-aw ni Jesus nga duna lamay usa ka Diyos nga kinahanglang simbahon sa dihang siya miingon nga “siya lamang,” dili “kami,” nga iya untang isulti kon bahin pa siya sa usa ka Trinidad.

Sa dihang ang mga tawo makabatog tukmang kahibalo bahin sa Diyos ug buot nang moalagad kaniya, sila pagabawtismohan “sa ngalan sa Amahan ug sa Anak ug sa balaang espiritu.” (Mateo 28:19) Sila nakasabot ug midawat sa awtoridad ni Jehova ug sa papel ni Jesu-Kristo sa pagpatuman sa katuyoan ni Jehova. (Salmo 83:18; Mateo 28:18) Nasabtan usab nila ang papel sa balaang espiritu sa Diyos, nga mao ang iyang aktibong puwersa.—Genesis 1:2; Galacia 5:22, 23; 2 Pedro 1:21.

Ang doktrina sa Trinidad dugay nang nakapalibog sa mga tawo. Sa laing bahin, gilamdagan ni Jesus ang iyang mga sumusunod ug giagak sila ngadto sa “bugtong matuod nga Diyos,” si Jehova.—Juan 17:3.

[Footnote]

[Picture Credit Line sa panid 23]

Musée du Louvre, Paris