Unsay Imong Pag-isip Kang Jesus?

Imo bang giisip si Jesus ingong bag-ong nahimugso, himalatyong tawo, o tinuboy nga Hari?

Gipakita sa Bibliya nga si Jesus maoy usa ka gamhanang Hari. Apan unsay kahulogan niini alang kanimo?

Daghan ang nagtuo nga si Jesus namatay alang kanila. Apan, sa unsang paagi ang kamatayon sa usa ka tawo duolag 2,000 ka tuig kanhi magkahulogag kinabuhi alang sa uban karon?

Kinasingkasing ka namong gidapit sa pagpatalinghog sa Kasulatanhong tubag niining mga pangutanaha. Hisgotan kini sa dihang handomon sa mga Saksi ni Jehova ang kamatayon ni Jesus. Niining tuiga, kini saulogon sa Huwebes, Abril 5, human sa pagsalop sa adlaw.

Palihog pangutan-a ang mga Saksi ni Jehova sa inyong lugar bahin sa oras ug dapit.

Sa hinapos sa semana human sa paghandom sa kamatayon ni Jesus, ang mga Saksi ni Jehova magpahigayon usab ug usa ka makapainteres nga pakigpulong pinasukad sa Bibliya nga nag-ulohang “Duol na ba Gayod ang Kataposan?” Kini nga pakigpulong maoy usa sa hinungdanong bahin sa tibuok-kalibotang paningkamot nga maabot ang tanang nahigugma sa kamatuoran ug gustong makakat-on ug dugang bahin kang Jesus. Gidapit ka namo sa pagtambong.