GIINGNAN ka na ba sukad nga angay kang magpakitag pagkamaunongon?— * Atong hisgotan ang usa ka tawo nga giingon sa Bibliya nga “nagpadayon sa pag-unong kang Jehova,” ang matuod nga Diyos. Siya mao si Ezequias. Atong tan-awon kon unsay atong makat-onan sa iyang panig-ingnan.

Si Ezequias may masulob-ong kaagi. Ang iyang amahang si Ahaz nga hari sa Juda mibiya sa pagsimba kang Jehova. Gipangunahan ni Ahaz ang pagsimba sa bakak nga mga diyos sa bata pa si Ezequias. Gipapatay pa gani ni Ahaz ang usa sa iyang mga anak nga lalaki—nga igsoon mismo ni Ezequias—ug gihalad kini sa diyos nga gisimba ni Ahaz!

Bisag nagpadayon si Ahaz sa paghimog daotan, si Ezequias nagmasinugtanon kang Jehova. Sayon ra kaha kaniya ang pagbuhat niini?— Lagmit dili. Apan nagpadayon gayod si Ezequias! Atong tan-awon kon sa unsang paagi siya nagmaunongon kang Jehova, ug sa unsang paagi nato masundog kana.

Nasayran ni Ezequias nga dihay uban nga nagmaunongon kang Jehova. Usa niana si David. Bisag si David nabuhi gatosan ka tuig una kaniya, si Ezequias nakakat-on bahin kang David diha sa Kasulatan. “Kon ugaling biyaan ako sa akong amahan ug sa akong inahan,” si David misulat, “si Jehova mismo magsagop kanako.”

Nakita ba nimo kon unsay nakatabang kang David sa pagsugot kang Jehova?— Ang iyang pagtuo! Nahibalo si David nga kon siya magmasinugtanon, si Jehova motabang kaniya. Wala  gayod magduhaduha si David niana! Ang paghunahuna kang David seguradong mitabang kang Ezequias sa pag-unong kang Jehova pinaagi sa pagsugot Kaniya. Makaseguro ka usab nga si Jehova motabang nimo kon padayon kang magmaunongon kaniya pinaagi sa pagsugot kaniya.

Apan komosta kon ang imong amahan o inahan wala magsimba kang Jehova?— Ang Diyos nag-ingon nga ang mga anak kinahanglang magmasinugtanon sa ilang ginikanan. Busa, angayng magmasinugtanon ka usab sa imong ginikanan. Apan, kon sugoon ka nila sa pagbuhat ug usa ka butang nga gidili sa Diyos, imong ikapatin-aw kon nganong dili nimo kana mabuhat. Dili ka angayng mamakak, mangawat, o mohimog bisan unsa nga giingon sa Diyos nga daotan, bisag kinsa pay nagsugo nimo sa pagbuhat niana. Husto ka kon imong sugton ang Diyos!

Daghag maayong panig-ingnan nga atong masundog. Dili kay si David ra ang panig-ingnan ni Ezequias kondili usab ang iyang kaugalingong apohan nga si Jotam. Si Ezequias nakakat-on kaniya, sama nga kita makakat-on karon gikan sa atong Bibliya. May nahunahunaan ka bang ubang maayong panig-ingnan nga atong masundog?—

Oo, imong makat-onan sa Bibliya ang pipila ka sayop nga nahimo ni Ezequias, David, ug Jotam, ug sa ubang dili hingpit nga mga tawo. Apan sila nahigugma kang Jehova, midawat sa ilang sayop, ug naningkamot sa pagbuhat kon unsay husto. Hinumdoming ang Anak sa Diyos lamang, si Jesus, ang hingpit. Busa, maningkamot tang magtuon bahin niya ug sundon ang iyang panig-ingnan.