Pagpakigsulti sa Silingan—Si Jesus ba Mao ang Diyos?

ANG mga Saksi ni Jehova malipay nga ipaambit ang mensahe sa Bibliya sa ilang mga silingan. May gikalibgan ka ba diha sa Bibliya? Gusto ka bang mahibalo bahin sa pagtulon-an sa mga Saksi ni Jehova? Kon mao, ayaw pagpanuko sa pagpangutana sa mga Saksi sa sunod higayon nga sila makig-estorya kanimo. Malipay silang motubag sa imong mga pangutana.

Aniay usa ka pananglitan sa pagpakigsulti sa usa ka Saksi ni Jehova ngadto sa usa ka silingan. Ibutang ta nga Karen ang ngalan sa Saksi ug nagsangyaw siya kang Samantha.

Tinuod Bang Dili Mo Motuo Kang Jesus?

Samantha: Ang among pastor nag-ingon nga ang mga Saksi ni Jehova dili motuo kang Jesus. Tinuod ba na?

Karen: Paneguroon nako nimo nga nagtuo mi kang Jesus. Gani, nagtuo mi nga hinungdanon sa kaluwasan ang pagpasundayag ug pagtuo kang Jesus.

Samantha: Nagtuo sab ko ana.

Karen: Pareho diay ta! Tuod, ako si Karen. Ikaw?

Samantha: Ako diay si Samantha.

Karen: Nalipay kong nagkaila ta. Tingali nakapangutana ka, ‘Kon ang mga Saksi ni Jehova nagtuo gyod kang Jesus, nganong ang uban moingon man nga wala?’

Samantha: Bitaw, ngano man?

Karen: Aw, sa pagkatinuod, Samantha, lig-on kaayo ang among pagtuo kang Jesus, pero wala namo tuohi ang tanang gisulti sa uban bahin kaniya.

Samantha: Sama sa unsa?

Karen: Sama pananglitan sa giingon nila nga si Jesus usa lang kono ka maayong tawo. Dili mi mouyon niana.

Samantha: Aw, bisag ako.

Karen: Maayo kay nagkasinabot ta niana. Ikaduha, ang mga Saksi ni Jehova dili mouyon sa mga pagtulon-an nga supak sa giingon mismo ni Jesus bahin sa iyang relasyon sa Amahan.

Samantha: Unsay buot mong ipasabot?

Karen: Daghang relihiyon ang nagtudlo nga si Jesus mao ang Diyos. Tingali mao pod nay imong nahibaloan.

Samantha: Bitaw, ang among pastor nag-ingon nga ang Diyos ug si Jesus pareho ra.

Karen: Apan mouyon ka ba nga ang kinamaayohang paagi sa pagkat-on sa kamatuoran bahin kang Jesus mao ang pagsusi sa iyang giingon bahin sa iyang kaugalingon?

Samantha: Siyempre!

Unsay Giingon ni Jesus?

Karen: Atong tan-awon ang usa ka teksto sa Bibliya aron mas masabtan nato kini. Palihog matikdi ang giingon sa Juan 6:38. Si Jesus miingon: “Ako nanaog gikan sa langit aron buhaton, dili ang akong kabubut-on, kondili ang kabubut-on niya nga nagpadala kanako.” Karon kon si Jesus pa ang Diyos, kini nga teksto makapalibog gayod.

 Samantha: Unsay buot mong ipasabot?

Karen: Aw, matikdi nga si Jesus miingon nga wala siya manaog gikan sa langit aron buhaton ang iyang kabubut-on.

Samantha: Bitaw, siya miingon nga mianhi siya aron buhaton ang kabubut-on sa Usa nga nagpadala kaniya.

Karen: Apan kon si Jesus mao ang Diyos, kinsa may nagpadala kaniya gikan sa langit? Ug nganong misugot man si Jesus sa kabubut-on niana nga Usa?

Samantha: Ah, nakasabot na ko. Pero morag wala man magpamatuod kining tekstoha nga si Jesus dili mao ang Diyos.

Karen: Apan, tagda ang giingon ni Jesus sa laing higayon. Duna siyay gisulti nga susama niana sa sunod nga kapitulo sa Juan. Puwede ba nimong basahon ang Juan 7:16?

Samantha: Sige. “Si Jesus, sa baylo, mitubag kanila ug miingon: ‘Ang gitudlo ko dili akoa, kondili iya sa nagpadala kanako.’”

Karen: Salamat. Sumala dinhi, gitudlo ba ni Jesus ang iyang kaugalingong mga ideya?

Samantha: Wala, siya miingon nga ang iyang gitudlo maoy gikan sa Usa nga nagpadala niya.

Karen: Husto. Apan makapangutana na sab ta: ‘Kinsa may nagpadala kang Jesus? Ug kinsay naghatag kaniya sa mga kamatuoran nga iyang gitudlo?’ Dili ba kana nga Usa mas labaw gayod kang Jesus? Kon buot hunahunaon, ang nagpadala mas labaw kay sa usa nga gipadala.

Samantha: Makapainteres kana. Karon pa lang ko kabasa nianang tekstoha.

Karen: Matikdi usab ang giingon ni Jesus sa Juan 14:28: “Nadungog ninyo nga ako miingon kaninyo, ako molakaw ug ako mobalik kaninyo. Kon kamo nahigugma kanako, magmaya kamo nga ako moadto sa Amahan, tungod kay ang Amahan labaw pa kay kanako.” Base nianang tekstoha, giunsa paglantaw ni Jesus ang iyang kaugalingon kon itandi sa Amahan?

Samantha: Aw, siya miingon nga ang Amahan mas labaw kay kaniya. Busa makaingon ko nga iyang giisip ang Diyos nga mas taas kay kaniya.

Karen: Husto ka. Ang laing pananglitan mao kanang giingon ni Jesus sa iyang mga tinun-an. Matikdi ang giingon sa Mateo 28:18: “Ang tanang awtoridad gihatag na kanako sa langit ug sa yuta.” Nan giingon ba ni Jesus nga sukad pa sa sinugdan iya nang nabatonan ang tanang awtoridad?

Samantha: Wala, siya miingon nga gihatag kini kaniya.

Karen: Apan kon Diyos pa si Jesus, nganong hatagan man siyag dugang awtoridad? Ug kinsa may naghatag niini kaniya?

Samantha: Ako pa nang hunahunaon.

Kang Kinsa Man Siya Nakigsulti?

Karen: Duna pay laing butang nga makapalibog kon pananglit Diyos gayod si Jesus.

Samantha: Unsa man?

Karen: Bahin kana sa bawtismo ni Jesus. Matikdi ang giingon sa Lucas 3:21, 22. Puwede ba nimong basahon?

Samantha: “Karon sa dihang nabawtismohan na ang tanang tawo, gibawtismohan usab si Jesus ug, samtang nag-ampo siya, ang langit nabuksan ug ang balaang espiritu sa dagway nga lawasnon ingon sa usa ka salampati mikunsad diha kaniya, ug usa ka tingog migula gikan sa langit: ‘Ikaw mao ang akong Anak, ang hinigugma; giuyonan ko ikaw.’”

Karen: Namatikdan ba nimo kon unsay gihimo ni Jesus samtang siya gibawtismohan?

Samantha: Nag-ampo siya.

Karen: Husto. Siyempre makapangutana ta, ‘Kon si Jesus mao ang Diyos, kinsa may iyang giampoan?’

Samantha: Bitaw, no? Mangutana ko ana sa akong pastor.

Karen: Hunahunaa usab nga sa paghaw-as ni Jesus sa tubig, dunay misulti gikan sa langit. Imo bang namatikdan unsay giingon niana nga Usa?

Samantha: Siya miingon nga si Jesus Iyang Anak, nga Siya nahigugma niini, ug nga kini Iyang giuyonan.

Karen: Husto kana. Apan kon si Jesus pa ang Diyos, kinsa may misulti niana gikan sa langit?

Samantha: Wala gyod ko makahunahuna niana sukad.

 Nganong Gitawag Man nga “Amahan” ug “Anak”?

Karen: Nia pay laing punto nga angayng tagdon: Atong nabasa nga si Jesus naghisgot sa Diyos ingong iyang langitnong Amahan. Ug sa dihang nabawtismohan si Jesus, usa ka tingog gikan sa langit ang miingon nga si Jesus Iyang Anak. Gani, si Jesus mismo nagtawag sa iyang kaugalingon nga Anak sa Diyos. Karon, kon moingon ka nga ang duha ka tawo managsama, unsa nga matang sa relasyon sa pamilya ang imong ikailustrar?

Samantha: Aw, kanang managsoon.

Karen: Husto—tingali kanang kaluha pa gani. Apan gitawag ni Jesus ang Diyos ingong Amahan ug ang iyang kaugalingon ingong Anak. Busa, unsa kaha nga mensahe ang buot ipasabot ni Jesus niini?

Samantha: Ah, nakasabot na ko. Gihubit ni Jesus ang usa ingong mas magulang ug dunay mas dakong awtoridad kay sa usa.

Karen: Sakto. Hunahunaa kini: Nakahunahuna kag haom nga ilustrasyon bahin sa pagkamanagsama, nianang sa magsoon o sa kaluha. Kon si Jesus mao gayod ang Diyos, dili kaha si Jesus, ingong Dakong Magtutudlo, mogamit ug samang panagtandi—o mas tin-awng ilustrasyon bahin sa pagkamanagsama?

Samantha: Aw, siyempre.

Karen: Apan siya migamit ug mga terminong “Amahan” ug “Anak” sa paghubit sa iyang relasyon sa Diyos.

Samantha: Makapainteres nang puntoha dâ.

Unsay Giingon sa mga Sumusunod ni Jesus Kaniadto?

Karen: Sa dili pa ko mobiya, duna pa unta koy hisgotan nga laing punto bahin niini, kon okey ra nimo.

Samantha: Oo, okey ra kaayo.

Karen: Kon tinuod pa nga si Jesus mao ang Diyos, dili ba madahom nimo nga isulti gyod unta kana sa iyang mga tinun-an?

Samantha: Bitaw no.

Karen: Apan wala gyod tay mabasa sa Bibliya nga ila kanang gitudlo. Sa kasukwahi, matikdi ang gisulat ni apostol Pablo, nga usa sa mga sumusunod ni Jesus. Sa Filipos 2:9, iyang gihubit kon unsay gibuhat sa Diyos human sa kamatayon ug pagkabanhaw ni Jesus: “Ang Diyos nagbayaw kaniya [Jesus] ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan.” Sumala niining tekstoha, unsay gibuhat sa Diyos kang Jesus?

Samantha: Nag-ingon kini nga ang Diyos nagbayaw kaniya sa usa ka labaw nga katungdanan.

Karen: Oo. Apan kon si Jesus ug ang Diyos managsama ra sa wala pa mamatay si Jesus ug sa ulahi gibayaw siya sa Diyos sa usa ka labaw nga katungdanan, dili ba si Jesus nahimo na hinuong mas labaw kay sa Diyos? Duna pa ba goy molabaw sa Diyos?

Samantha: Wala. Imposible kana.

Karen: Uyon ko niana. Nan, base niining tanang ebidensiya, makaingon ka ba nga ang Bibliya nagtudlo nga si Jesus mao ang Diyos?

Samantha: Wala, daw lahi ra man. Ang Bibliya nag-ingon nga siya Anak sa Diyos.

Karen: Sakto. Apan paneguroon nako nimo Samantha, nga dako gyod ug pagtahod ang mga Saksi ni Jehova kang Jesus. Nagtuo mi nga ang iyang kamatayon ingong sinaad nga Mesiyas nagbukas sa dalan sa kaluwasan sa tanang matinumanong tawo.

Samantha: Nagtuo sab ko niana.

Karen: Nan, makapangutana ka tingali, ‘Sa unsang paagi nato ikapakita kang Jesus nga atong gipabilhan ang iyang paghatag sa iyang kinabuhi alang nato?’ *

Samantha: Nakapangutana bitaw ko ana.

Karen: Mobalik ra ko ug atong tan-awon ang tubag sa Bibliya niana. Nia ra ba ka dinhi sa samang oras sa sunod semana?

Samantha: Oo, nia ra ko.

Karen: Maayo, magkita ra ta.

[Footnote]