Pagpangita sa mga Tubag
Pagpangita sa mga Tubag
“Halos tanan may opinyon kon kinsa si [Jesus]. Kita man hugot ug pagtuo o nagduhaduha, makapangutana gihapon ta, ‘Kinsa man ning tawhana?’”—AWTOR NGA SI STAN GUTHRIE.
ANG mga tawo buot masayod kon kinsa si Jesus. Ang mga basahon bahin niya himalitan kaayo. Ang mga salida bahin niya mikitag dako sa takilya. Apan, daghan gihapon ang may mga pangutana bahin kang Jesus. Ang mga tawo lainlaig opinyon kon kinsa siya.
Pipila ka tuig kanhi, duha ka reporter ang nagdapit sa mga tawo sa pagtubag sa pangutana diha sa Internet nga “Kinsa si Jesus?” Kini ang pipila sa mga tubag:
● “Lagmit siya usa ka rabbi (magtutudlo) nga nagpakitag panig-ingnan sa pagkamaluluy-on.”
● “Siya usa ka ordinaryong tawo nga may talagsaong kinabuhi.”
● “Walay pamatuod nga naglungtad si Jesus.”
● “Si Jesus mao ang Anak sa Diyos kinsa natawo, namatay, ug nabanhaw aron luwason kita sa atong mga sala. Siya buhi karon, ug Siya mobalik sa yuta.”
● “Ako nagtuong si Jesu-Kristo mao ang bugtong anak sa Diyos, nga parehong tawo ug diyos.”
● “Tumotumo lang ang estorya bahin kang Jesus.”
Tin-aw nga imposibleng pulos tukma ang maong nagkalainlaing opinyon. May usa ba ka tuboran sa impormasyon nga makahatag ug kasaligang tubag sa mga pangutana bahin kang Jesus? Ang mga magpapatik niining magasina nagtuong ang Bibliya maoy Pulong sa Diyos ug nga kini lamang ang nagtug-an kanato sa kamatuoran bahin kang Jesus. *—2 Timoteo 3:16.
Sa sunod artikulo, atong tagdon ang tubag sa Bibliya sa pipila ka komon nga pangutana bahin kang Jesus. Siya mismo miingong ang kaluwasan mahimong mabatonan sa “tanan nga magpasundayag ug pagtuo kaniya.” (Juan 3:16) Gidapit ka namo sa pagsusi sa mga tubag, ug ikaw nay mag-igo kon gusto nimong mokat-on ug dugang bahin kang Jesus ug kon sa unsang paagi magpasundayag ug pagtuo kaniya.
[Footnote]
^ par. 11 Alang sa dugang impormasyon, tan-awa ang kapitulo 2, “Ang Bibliya—Usa ka Basahong Gikan sa Diyos,” sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
