Giunsa Paglantaw ni Jesus ang Politika?

ANG mga magsusulat sa Ebanghelyo naghubit sa pipila ka panghitabo sa ministeryo ni Jesus diin nakaatubang siyag tentasyon nga moapil sa politika. Pananglitan, wala madugay human siya mabawtismohi sa edad nga 30, gitanyagan siya sa Yawa nga mahimong magmamando sa kalibotan. Sa ulahi sa iyang ministeryo, buot sa mga tawo nga himoon siyang hari. Sa ulahi pa gyod niana, gipit-os siya nga mahimong aktibista. Unsay reaksiyon ni Jesus? Atong hisgotan kini nga mga panghitabo.

Magmamando sa kalibotan. Ang mga Ebanghelyo nag-ingong ang Yawa nagtanyag kang Jesus ug pagmando ibabaw sa “tanang gingharian sa kalibotan.” Hunahunaa kon unsa unta kadako ang kaayohan nga mahimo ni Jesus alang sa katawhang nag-antos kon siya pa ang magmamando sa kalibotan! Kinsa gong politiko nga mabalak-on kaayo sa kaayohan sa katawhan ang makabalibad nianang tanyaga? Apan gibalibaran kana ni Jesus.—Mateo 4:8-11.

Hari. Daghan sa katalirongan ni Jesus ang nangandoy gayod ug magmamando nga makasulbad sa ilang mga problema sa ekonomiya ug politika. Kay nakadayeg sa katakos ni Jesus, buot sa mga tawo nga moapil siya sa politika. Unsa may iyang reaksiyon? Ang magsusulat sa Ebanghelyo nga si Juan miingon: “Si Jesus, kay nahibalo nga sila moduol na ug mosakmit kaniya aron himoon siyang hari, mipahawa na usab paingon sa bukid nga nag-inusara.” (Juan 6:10-15) Tin-aw nga dili gusto ni Jesus nga malangkit sa politika.

Aktibista. Matikdi kon unsay nahitabo pipila ka adlaw una patya si Jesus. Ang mga sumusunod sa mga Pariseo, nga gustog independensiya gikan sa Imperyo sa Roma, lakip na ang mga Herodian, nga membro sa partido politika nga dapig sa Roma, miduol kang Jesus. Gipugos nila siya sa paghatag ug opinyon bahin sa politika pinaagi sa pagpangutana kaniya kon ang mga Hudiyo angay bang mobayad ug buhis sa Roma.

Gisulat ni Marcos ang tubag ni Jesus: “‘Nganong ibutang ninyo ako sa pagsulay? Dad-i ako  ug denario aron tan-awon ko.’ Ilang gidad-an siya ug usa. Ug siya miingon kanila: ‘Kansang dagway ug sinulat kini?’ Sila miingon kaniya: ‘Kang Cesar.’ Unya si Jesus miingon: ‘Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.’” (Marcos 12:13-17) Sa pagkomento sa hinungdan sa tubag ni Jesus, ang librong Church and State—The Story of Two Kingdoms miingon: “Iyang gidumilian ang tanyag nga mahimong politikal nga lider ug gipakita ang utlanan tali ni Cesar [gobyerno] ug sa Diyos.”

Apan wala kana magpasabot nga si Kristo wala matandog sa mga problema sama sa kakabos, korapsiyon, ug inhustisya. Gani, gipakita sa Bibliya nga siya nahingawa pag-ayo sa makaluluoyng kahimtang sa mga tawo sa iyang palibot. (Marcos 6:33, 34) Bisan pa niana, si Jesus wala mohimog aksiyon aron wagtangon ang inhustisya, bisag gipaningkamotan sa pipila nga ilangkit siya sa kontrobersiyal nga mga isyu nianang panahona.

Dayag nga gipakita niini nga mga pananglitan nga si Jesus midumili sa pag-apil-apil sa politika. Apan komosta ang mga Kristohanon karon? Unsay angay nilang buhaton?