Makapili Kag Malipayong Kaugmaon—Sa Unsang Paagi?

SA UNSANG paagi nimo makab-ot ang tinuod nga malamposong kinabuhi? Ang usa ka paagi mao ang paggamit sa talagsaon nimong katakos sa pagpamalandong sa layog-abot nga epekto sa imong mga desisyon karon.

Tinuod, malisdan ka tingali sa paghimog mga desisyon nga makahatag ug kaayohan sa tibuok nimong kinabuhi. Ngano? Tungod kay tinamdan sa daghan karon nga makuha dayon ang ilang gusto. Pananglitan, nahibalo ka nga ang pagpadapat sa tambag sa Bibliya makatabang nimo sa pagpalig-on sa relasyon sa pamilya. (Efeso 5:22–6:4) Apan aron mahimo kana, kinahanglan nga kanunay kang maggahig panahon sa imong pamilya ug makigbisog sa pagpit-os nga malinga pag-ayo sa trabaho o kalingawan. Sama sa ubang bahin sa kinabuhi, kinahanglan kang mopili tali sa temporaryong katagbawan ug sa malungtarong kalamposan. Sa unsang paagi nimo mabatonan ang kalig-on sa paghimog maalamong desisyon? Sunda kining upat ka sugyot.

1 Hunahunaa ang Resulta sa Imong mga Desisyon

Sa dihang mohimog desisyon, hunahunaa ang posibleng mga resulta. Ang Bibliya nagtambag: “Maalamon ang tawo nga nakakita sa katalagman ug nagtago sa iyang kaugalingon.” (Proverbio 22:3) Kon matinud-anon nimong susihon ang posibleng mga sangpotanan, lagmit imo gayong likayan ang dalang makadaot nimo. Sa laing bahin, kon imong hunahunaon ang malungtarong mga benepisyo sa usa ka maalamong desisyon, mas determinado kang mohimo niana.

Pangutan-a ang imong kaugalingon: ‘Unsay posibleng resulta sa akong desisyon human sa 1 ka tuig, o bisan 10 o 20 ka tuig gikan karon? Unsay epekto niini sa akong emosyon ug panglawas? Sa unsang paagi kini makaapektar sa akong pamilya ug sa uban nakong minahal?’ Labaw sa tanan, suknaa ang imong kaugalingon: ‘Mahimuot ba ang Diyos sa akong desisyon? Unsay epekto niini sa akong relasyon kaniya?’ Sanglit ang Bibliya inspirado sa Diyos, kini makatabang nimo sa pagkahibalo kon unsay makapahimuot kaniya ug magpasidaan kanimo sa mga lit-ag nga lagmit wala nimo mamatikdi.—Proverbio 14:12; 2 Timoteo 3:16.

2 Susiha ang Imong mga Kapilian

Imbes mohimog kaugalingong desisyon, daghan ang mosundog na lang sa desisyon sa uban. Ang pagkapopular sa usa ka paagi sa pagkinabuhi dili garantiya nga kini molampos. Susiha mismo ang mga kapilian. Tagda pananglitan si Natalie. * Siya miingon: “Nangandoy kog malipayong kaminyoon. Apan sa tan-aw nako dili nako kini makab-ot tungod sa akong paagi sa pagkinabuhi. Sa kolehiyo, ang tanan nakong higala mga intelihente kaayo. Apan, kanunay gihapon silang masayop sa ilang mga desisyon labot sa personal nga kinabuhi. Pirme silang mag-ilis ug trato. Sama nila, ubay-ubay sab kog natrato. Kini nakapaguol kaayo nako.”

Si Natalie misugod pagtuon sa Bibliya uban sa mga Saksi ni Jehova. “Sa mga Saksi,” siya miingon, “akong nakita ang malipayong mga batan-on ug lig-ong mga kaminyoon. Bisag nalisdan ko, inanay nakong nausab ang akong mga prinsipyo ug paagi sa pagkinabuhi.” Unsay resulta? “Nangandoy kong makabanag lalaki nga ako gayong gitahod,”  miingon si Natalie. “Sa ngadtongadto, nakabana kog parehas nakog relihiyon. Akong gibati nga gihatagan ko sa Diyos ug pamilyahanong kinabuhi nga labaw pa kay sa akong gipangandoy.”

3 Batoni ang Layog-Abot nga Panglantaw

Aron malikayan ang mubong panglantaw, kinahanglang tin-aw usab sa imong hunahuna ang kaugmaong gusto nimo ug ang plano kon unsaon kana pagkab-ot. (Proverbio 21:5) Ayawg limitahe ang imong panglantaw sa 70 o 80 ka tuig lang nga maoy kasagarang gitas-on sa kinabuhi sa tawo. Hinunoa, handurawa ang imong kaugalingon nga nagtagamtam sa walay-kataposang kaugmaon nga gihubit sa Bibliya.

Ang Bibliya nagpatin-aw nga pinaagi sa halad lukat ni Kristo Jesus, ang Diyos naghimog tagana aron ang mga tawo mabuhi sa walay kataposan. (Mateo 20:28; Roma 6:23) Ang Diyos nagsaad nga sa dili madugay tumanon niya ang iyang orihinal nga katuyoan sa katawhan ug sa yuta. Kadtong nahigugma sa Diyos makabatog kahigayonan nga mabuhi sa walay kataposan sa usa ka paraisong yuta. (Salmo 37:11; Pinadayag 21:3-5) Maangkon nimo kana kon imong batonan ang layog-abot nga panglantaw.

4 Paningkamoti Pagkab-ot ang Imong mga Tumong

Sa unsang paagi nimo mabatonan ang maong kaugmaon? Pagsugod pinaagi sa pagkuhag kahibalo bahin sa Diyos. (Juan 17:3) Ang tukmang kahibalo sa Bibliya magpalig-on sa imong pagsalig nga matuman gayod ang mga saad sa Diyos. Ang maong pagtuo magpalig-on nimo sa paghimog bisan unsang kausaban nga gikinahanglan aron uyonan sa Diyos.

Tagda ang eksperyensiya ni Michael. Siya miasoy: “Misugod ko paghuboghubog ug pagdroga sa edad nga 12. Membro ko sa usa ka gang ug nagtuo kong mamatay ko sa dili pa mag-30 anyos. Tungod sa akong kasuko ug kapakyasan, kadaghan ko misulay paghikog. Ako nagtuo nga duna gayoy kahulogan ang kinabuhi, apan wala nako kana makaplagi.” Samtang hayskul pa si Michael, usa niya ka kauban sa gang misugod pagtuon sa Bibliya uban sa mga Saksi. Gibuhat usab kana ni Michael.

Ang nakat-onan ni Michael sa Bibliya nakapausab sa iyang panglantaw sa umaabot. “Akong nakat-onan nga sa umaabot ang yuta mahimong paraiso ug ang mga tawo magpuyong malinawon, nga wala nay kabalaka. Mao nay akong gusto nga kaugmaon. Gihimo nakong tumong ang pag-ugmad ug suod nga relasyon kang Jehova. Apan, may mga higayon nga napakyas ko sa pagpahimuot niya. Bisag nagtuon na kog Bibliya, nahubog ko sa pipila ka higayon. Ug diha koy nahilabtang babaye.”

Sa unsang paagi nabuntog ni Michael ang maong mga kapakyasan ug malamposong nabag-o ang iyang kinabuhi? Siya miingon: “Gidasig ko sa nag-Bible study nako sa pagbasa sa Bibliya kada adlaw ug sa pagpakig-uban sa mga tawo nga gustong mopahimuot sa Diyos. Akong naamgohan nga ang akong mga kauban sa gang nag-impluwensiya gihapon nako. Bisag sama na silag akong pamilya, wala na ko makig-uban nila.”

Si Michael nagtakdag daling-makab-ot nga mga tumong ug prayoridad nga nakatabang niya sa pagkab-ot sa mas dagkong tumong, ang pagpahiuyon sa iyang kinabuhi sa mga sukdanan sa Diyos. Mahimo sab nimo kana. Isulat ang imong dagkong tumong ug ang mga tikang nga motabang nimo sa pagkab-ot niana. Isulti ang imong mga tumong niadtong mopaluyo nimo, ug hangyoa silang tabangan ka sa pagmonitor sa imong pag-uswag.

Ayaw paglangan sa pagkuhag kahibalo bahin sa Diyos ug sa pagpadapat sa iyang giya diha sa imong kinabuhi. Lihok na karon sa pagpalig-on sa imong gugma sa Diyos ug sa iyang Pulong, ang Bibliya. Kini ang giingon sa Bibliya bahin niadtong nagpadapat sa mga prinsipyo niini: “Ang tanan nga ginabuhat niya magmalamposon.”—Salmo 1:1-3.

[Footnote]