“Unsa Bay Kamatuoran?”

SI Poncio Pilato, nga usa ka Romanong Gobernador, matamayong nangutana niana kang Jesus. Dili siya interesado sa tubag, ug wala usab siya tubaga ni Jesus. Lagmit naghunahuna si Pilato nga dili gayod matugkad ang kamatuoran.—Juan 18:38.

Daghan usab ang nagtamay sa kamatuoran karon sama sa mga lider sa relihiyon, magtutudlo, ug mga politiko. Sila nagtuo nga walay bug-os nga kamatuoran. Para kanila, ang kamatuoran—ilabina ang bahin sa espirituwal nga mga butang ug sa moralidad—nagdepende lang kono sa tawo ug kini mausab-usab. Kini nagpasabot nga tawo ray magbuot kon unsay husto ug sayop. (Isaias 5:20, 21) Nagpasabot usab kini nga ang mga prinsipyo ug moral nga sukdanan sa mga tawo kaniadto mahimong isipon nga kinaraan na.

Buweno, angayng tagdon kon unsay nakaaghat kang Pilato sa pagpatungha nianang pangutanaha. Si Jesus miingon kaniya: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.” (Juan 18:37) Para kang Jesus, mahimong matugkad ang kamatuoran. Siya nagsaad sa iyang mga tinun-an: “Kamo mahibalo sa kamatuoran, ug ang kamatuoran magpagawas kaninyo.”—Juan 8:32.

Asa nato makita ang maong kamatuoran? Sa usa ka higayon, si Jesus miingon sa dihang nag-ampo siya sa Diyos: “Ang imong pulong maoy kamatuoran.” (Juan 17:17) Ang Bibliya, nga gisulat ubos sa pagtultol sa Diyos, nagbutyag sa kasaligang giya ug sa tinuod nga paglaom sa umaabot—ang kinabuhing walay kataposan.—2 Timoteo 3:15-17.

Kay dili interesado si Pilato, iyang gisalikway ang kahigayonan nga makakat-on sa kamatuoran. Sa imong bahin, gusto ka bang mahibalo sa kamatuoran? Nganong dili pangutan-on ang mga Saksi ni Jehova kon unsa ang “kamatuoran” nga gitudlo ni Jesus? Sila malipay gayod sa pagpaambit niana kanimo.