Pagkat-on Gikan sa Pulong sa Diyos

Unsa ang Maayong Balita Bahin sa Relihiyon?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Maayo ba ang tanang relihiyon?

Sa daghang relihiyon, may sinserong mga tawo nga gustong mopahimuot sa Diyos. Sila iyang nakita ug siya nahingawa kanila. Apan, ikasubo nga ang pipila naggamit sa relihiyon alang sa daotang katuyoan. Sa nangagi, ang mga lider sa relihiyon nagsakit pa gani sa ilang mga kaaway. (2 Corinto 4:3, 4; 11:13-15) Karon, sumala sa mga balita, ang pipila kanila nag-awhag sa ilang mga membro sa pagbuhat ug terorismo o nagpaluyo sa gubat, o nag-abusog mga bata.—Basaha ang Mateo 24:3-5, 11, 12.

Ang Bibliya nagtudlo nga dunay duha ka matang sa relihiyon—ang matuod ug ang bakak. Ang bakak nga relihiyon wala magtudlo sa kamatuoran bahin sa Diyos. Apan, buot ni Jehova nga Diyos nga ang mga tawo mahibalo sa kamatuoran bahin niya.—Basaha ang 1 Timoteo 2:3-5.

2. Unsa ang maayong balita bahin sa relihiyon?

Dili buot sa Diyos nga ang mga tawo malimbongan sa mga relihiyon nga nag-angkong nahigugma niya apan wala magtudlo sa kamatuoran bahin niya. Sa pagkatinuod, ang mga membro sa maong relihiyon gustong makighigala sa kalibotan nga gimandoan ni Satanas. (Santiago 4:4; 1 Juan 5:19) Ang mga relihiyong nagmaunongon sa mga kagamhanan sa tawo inay sa Diyos gihubit sa Bibliya nga bigaon. Ang Bibliya nagtawag niana ingong “Dakong Babilonya,” nga gikan sa ngalan sa karaang siyudad diin nagsugod ang bakak nga relihiyon human sa Lunop sa adlaw ni Noe. Sa dili madugay, kalit nga laglagon sa Diyos ang mga relihiyon nga naglimbong ug nagdaogdaog sa katawhan.—Basaha ang Pinadayag 17:1, 2, 5, 17; 18:8, 23, 24.

  3. Sa unsang paagi ang Diyos magpahinabog kalipay sa tibuok yuta?

Ang umaabot nga paghukom sa bakak nga relihiyon maoy maayong balita. Wagtangon niini ang pagdaogdaog sa tibuok yuta. Mawala na ang bakak nga mga relihiyon nga nagpahisalaag ug nagbahinbahin sa katawhan. Ang tanang buhi mahiusa sa pagsimba sa bugtong matuod nga Diyos.—Basaha ang Isaias 11:9; Pinadayag 18:20, 21; 21:3, 4.

4. Unsay angayng buhaton sa sinserong mga tawo?

Wala malimot si Jehova sa sinserong mga tawo nga anaa sa bakak nga mga relihiyon sa tibuok kalibotan. Gihiusa niya karon ang maong mga tawo pinaagi sa pagtudlo kanila sa kamatuoran.—Basaha ang Miqueas 4:2, 5.

Dawaton ni Jehova sa iyang pamilya ang buot moalagad kaniya. Bisag masuko ang atong mga higala ug paryente sa dihang moalagad ta kang Jehova, dako ang ganti nga atong madawat. Atong maangkon ang panaghigala sa Diyos, ang usa ka bag-o ug mahigugmaong “pamilya,” ug ang paglaom nga mabuhi sa walay kataposan.—Basaha ang Marcos 10:29, 30; 2 Corinto 6:17, 18.

Alang sa dugang impormasyon, tan-awa ang kapitulo 15 ug 16 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.

[Picture Credit Line sa panid 16]

The Complete Encyclopedia of Illustration/J. G. Heck