Sulat Gikan sa Ireland

Ang Akong Kinanindotang Bakasyon!

“KINAHANGLAN nga duna kay buhatong makapainteres aron di ka magsigeg hunahuna sa imong eksam,” matod sa akong ginikanan. “Duawon nato ang imong mga ig-agaw sa Ireland ug mouban tag sangyaw ngadto sa mga tawong panagsa rang makadungog sa maayong balita sa Gingharian.”

Morag dili to maayong ideya. Gawas nga kinahanglan kong magtuon para sa eksam, mahadlok kong mobiyahe kay wala pa gyod ko makagawas sa England o makasakayg ayroplano. Unsaon kaha sa usa ka lagsik nga 17-anyos nga dalaga nga nagpuyo sa puliking siyudad sa London sa pagpasibo sa mingaw, gamay nga lungsod sa habagatan-kasadpang tumoy sa Ireland?

Wala diay koy angayng kabalak-an. Pagtugpa gyod sa ayroplano, giganahan dayon ko sa lugar. Apan, kay kaadlawon pa mi mibiyahe, wa madugay nakatulog ko sa sakyanan. Matag karon ug unya, makamata ko ug makita nako ang bukiron apan nindot nga kabanikanhan nga malantawan gikan sa sigpit nga dalan nga pinarilag bato.

Sa unang gabii, nakaabot mi sa lungsod sa Skibbereen ug migugol ug makapalipay, makapalig-on sa espirituwal nga pakig-ubanay sa usa ka pamilya nga mibalhin sa Ireland aron motabang sa buluhatong pagsangyaw. Nag-Bible games mi. Ang matag usa namo mokuhag ngalan sa usa ka karakter sa Bibliya gikan sa bag ug imostra ang usa ka panghitabo sa kinabuhi niini nga karakter. Tag-anon sa uban kon kinsa kini.

Pagkaugma, kami sa akong ginikanan, manghod nga lalaki, mga ig-agaw, ug lain pang pamilya, nanakay ug lantsa paingon sa gamay nga Heir Island, diin wala ray 30 ang namuyo. Nag-ingon man god si Jesus nga ang maayong balita kinahanglang isangyaw sa tibuok gipuy-ang yuta. Busa tibuok-adlaw ming nagpaambit ug makapadasig nga mga teksto sa Bibliya niining mahigalaon ug maabiabihong mga tawo, ug nakadayeg mi sa kanindot sa palibot.

Hayag ang adlaw diha sa asul nga kalangitan. Nangalimyon ang kahumot sa tanom nga gorse nga may mga bulak nga dalag ug kolor ug sama kahumot sa lubi. Ang kalamakan sa isla napunog mga bulak. Nag-umbaw sa baybayon ang batoon nga pangpang diin nagsalag ang mga cormorant ug gannet. Bisan asa ka motan-aw, dunay gagmayng isla, nga daghan niini walay nagpuyo. Kining tanan nahimutang sa Roaringwater Bay. Nakadayeg gyod mi sa hingpit nga pagkaharmonya sa kalalangan ni Jehova!

Sa Skibbereen, daghan kog nasuod sa kongregasyon sa mga Saksi ni Jehova ug misulay ko paghimo sa mga butang nga wala nako mahimo kaniadto. Ang giganahan gyod nako mao ang pag-kayak. Nindot kaayo ni nga paagi nga masuhid  ang kabaybayonan sa Ireland! Namasol mi para sa among panihapon, apan naunhan mi sa mga sea lion. Nag-imbento mig mga kalingawan sa baybayon, ug gisulayan pa gani nako ang Irish nga sayaw.

Nangutana sab mig diyutay bahin sa Skibbereen. Sa dihang wala molampos ang pagpananom ug Irish nga patatas niadtong mga 1840, ang lungsod ug ang palibot niini maoy usa sa naapektohan pag-ayo. Linibo ang nangamatay sa gutom, ug mga 9,000 sa mga biktima ang giusa na lag lubong. Makapahupay gayod nga sa dili madugay ilalom sa Gingharian sa Diyos, wala na unyay gutom, ug kadtong linibo nga nangamatay pagabanhawon sa paraisong yuta.

Mikuyog mi sa mga Saksi didto sa pagsangyaw sa mga tawong talagsa rang maadtoan tungod sa kadako sa teritoryo sa kongregasyon. Nagbiyahe mi agi sa sigpit, titip nga dalan paingon sa mga balay nga nahimutang sa ngilit sa pangpang diin malantawan ang Irish Sea. Ang mga tawo nga among nahibalag mahigalaon ug maabiabihon usab. Sama sa among gihimo sa Heir Island, gisugdan namo ang panaghisgot sa pag-ingon nga kami nagbakasyon ug ang pipila ka adlaw niana among gigugol sa pagpaambit sa makapalipayng mensahe sa Bibliya.

Si Mama nakig-estorya sa usa ka babaye nga midawat dayon sa among mga magasin, Ang Bantayanang Torre ug Pagmata! Sa dihang nakita namo siya pag-usab human sa pipila ka adlaw, siya miingon nga giganahan kaayo siya sa mga magasin.

“Balik unya ug pagdala pag mga magasin ug mag-estorya na pod ta,” miingon ang babaye. Amo siyang giingnan nga mouliay na mi, apan dunay laing moduaw niya.

“Aw,” siya mitubag, “kon makabalik ka, duawa unya ko. Kaming mga Irish dili gyod makalimot ug bisita!”

Among gigugol ang kataposang adlaw sa among bakasyon diha sa baybayon kauban sa mga igsoon sa kongregasyon. Naghimo mig sugbaanan gamit ang gapnod ug mga bato ug among gisugba ang nakuha namo nga mga amahong nga gibanlas sa tin-awng dagat ngadto sa kabatoan. Bisag usa ko ka dalagita nga nagdako sa siyudad, giganahan kaayo ko niini!

Busa, unsay ikaingon nako sa akong pagbakasyon sa Ireland? Kadto ang akong kinanindotang bakasyon! Makalingaw kaayo kadto, apan ilabinang makapalipay ang pagkahibalo nga duna koy nahimo nga nakapahimuot kang Jehova ug nakahatag ug kadayeganan kaniya. Malipay kong moalagad sa Diyos, ug sa dihang makauban nimo ang maayong mga higala ug ang imong pamilya nga ingon usab niana ang gibati, mas makapalipay pa kini. Pagpauli nako, nagpasalamat ko kang Jehova sa paghatag niya nako ug daghang mahigugmaon, hamtong-sa-espirituwal nga mga higala ug sa nindot nga mga kasinatian nga dili gyod nako makalimtan.

[Picture Credit Line sa panid 25]

An Post, Ireland