Nahibalo Ka Ba?

Nganong interesado kaayo ang mga Hudiyo sa ilang kagikan?

▪ Ang mga talaan sa kagikan hinungdanon aron matino ang relasyon sa mga tribo ug pamilya. Hinungdanon usab kadto sa pagtino sa utlanan sa yuta ug sa mga panulondon. Ang labing hinungdanon mao ang kagikan sa sinaad nga Mesiyas. Ang mga Hudiyo nasayod kaayo nga kini nga Usa kinahanglang maggikan sa linya ni David sa tribo ni Juda.—Juan 7:42.

Dugang pa, “sanglit panulondon man ang pagkasaserdote ug ang katungdanan sa mga Levihanon . . . hinungdanon kaayo nga dili gayod masagolan ang kaliwat,” matod sa eskolar nga si Joachim Jeremias. Ang mga babayeng Israelitas nga maminyo sa pamilya sa mga saserdote kinahanglang magpakitag ebidensiya sa ilang kaliwat aron ang pagkasaserdote magpabiling “dalisay.” Sa adlaw ni Nehemias, ang tibuok nga mga pamilya sa mga Levihanon nadiskuwalipikar sa dihang sila “nangita sa talaan sa ilang rehistro, aron pamatud-an sa publiko ang ilang kagikan, ug kini wala hikaplagi.”—Nehemias 7:61-65.

Dugang pa, ang Moisesnong Balaod nag-ingon nga “walay anak sa gawas” ni “Ammonhanon o Moabihanon nga makasulod sa kongregasyon ni Jehova.” (Deuteronomio 23:2, 3) Tungod niini, dugang ni Jeremias, “kinahanglang pamatud-an sa usa nga wala masagoli ang iyang kagikan aron mahimo niya ang bisan unsang sibil nga mga katungod, ug kini nagpamatuod sa among konklusyon nga . . . bisan ang ordinaryong Israelitas nahibalo sa iyang kagikan ug kon asa sa 12 ka tribo siya nasakop.”

Giunsa pagtipon ug pagtipig sa mga Hudiyo ang talaan sa ilang kagikan?

▪ Ang mga magsusulat sa Ebanghelyo nga si Mateo ug Lucas naghatag ug detalyadong talaan sa katigulangan ni Jesus. (Mateo 1:1-16; Lucas 3:23-38) Natipigan usab ang ubang talaan sa kagikan. Pananglitan, ang usa ka Hudiyong midrash, o komentaryo, nag-ingon bahin kang Hillel, usa ka rabbi sa panahon ni Jesus: “Nakaplagan sa Jerusalem ang usa ka linukot sa talaan sa kagikan, diin nahisulat nga si Hillel naggikan sa kaliwat ni David.” Ang Hudiyong historyano sa unang-siglo nga si Flavius Josephus, diha sa iyang sinulat nga The Life, nag-ingon nga mga saserdote ang iyang katigulangan, ug sa pamilya sa iyang inahan, siya may “harianong kagikan.” Siya miingon nga nakita niya kining impormasyona diha “sa mga rehistrohanan sa publiko.”

Sa pagtipig sa talaan sa banay sa mga saserdote, si Josephus, diha sa iyang basahon nga Against Apion, nag-ingong ang iyang nasod naghatag niini nga responsabilidad ngadto sa “mga tawong kasaligan kaayo.” Ang The Jewish Encyclopedia nag-ingon: “Mopatim-awng may linaing opisyal nga gipiyalan niini nga mga talaan, ug dihay korte sa Jerusalem diin ang mga tawo mahimong magpakisayod bahin niini.” Ang mga Hudiyong dili kabanay sa mga saserdote didto magparehistro sa siyudad sa ilang amahan. (Lucas 2:1-5) Kini nga mga tipiganan dayag nga gikonsulta sa mga magsusulat sa Ebanghelyo. Mopatim-aw usab nga ang mga pamilya nagtipig ug pribadong mga talaan.