Kini nga artikulo may mga pangutana nga lagmit imong gikalibgan ug magpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong ang Diyos naghatag ug ngalan sa iyang kaugalingon?

Sa walay duhaduha, gusto kang tawgon sa imong ngalan inay kay tawgon lag “lalaki,” “mister,” “madam,” “babaye,” o uban pang titulo. Ang ngalan magpaila nimo ingong indibiduwal. Ang Diyos gitawag sa mga titulo sama sa ‘Soberanong Ginoo,’ “Diyos nga Labing Gamhanan,” ug “Dakong Maglalalang.” (Genesis 15:2; 17:1; Ecclesiastes 12:1) Apan naghatag sab siyag ngalan sa iyang kaugalingon aron matabangan ta sa pagbatog suod nga relasyon kaniya. Jehova ang ngalan sa Diyos.—Basaha ang Isaias 42:8.

Bisag ang ngalan sa Diyos gipulihan sa daghang maghuhubad sa Bibliya ug mga termino sama sa “Diyos” ug “Ginoo,” ang maong ngalan makita duolag 7,000 ka beses diha sa karaang Hebreohanong mga manuskrito sa Bibliya. Tin-awng gusto sa Diyos nga mailhan ang iyang ngalan.—Basaha ang Isaias 12:4.

2. Nganong hinungdanon nga mailhan ang ngalan sa Diyos?

Ang pagkaila sa ngalan sa Diyos nagpasabot ug labaw pa kay sa pagkahibalo kon unsaon kana paglitok. Nagpasabot kana ug pagbatog suod nga relasyon kaniya. Ang ngalang Jehova nagkahulogang “Siya Nagpahinabo nga Mamao.” Pasalig kini nga siya mahimong bisag unsa nga gikinahanglan aron matuman ang iyang katuyoan. Busa, ang pagkaila sa ngalan sa Diyos nagpasabot ug pagtuo nga tumanon niya ang iyang mga saad. (Salmo 9:10) Ang pagtuo sa mga tawong nakaila ug naggamit sa ngalan sa Diyos nagpalihok nila sa pagsalig kaniya ug pag-una kaniya sa ilang kinabuhi. Panalipdan ni Jehova ang maong mga tawo.—Basaha ang Salmo 91:14.

  3. Nganong gusto sa Diyos nga mailhan ang iyang ngalan?

Gusto sa Diyos nga mailhan sa mga tawo ang iyang ngalan tungod kay kana makaayo kanila. Pinaagi niana sila mahimong higala sa Diyos, nga may paglaom nga mabuhi sa walay kataposan. Kanay hinungdan nga buot ni Jehova nga ipaila nato ang iyang ngalan!—Basaha ang Juan 17:3; Roma 10:13, 14.

Gipaila ni Jesus ang ngalan sa Diyos pinaagi sa pagtudlo sa mga tawo bahin sa mga paagi sa Diyos, Iyang mga balaod, ug Iyang mga saad. Karon, ang mga sumusunod ni Jesus nagpadayon sa pagpaila sa ngalan sa Diyos sa tanang kanasoran. Gibuhat nila kana ingong nahiusang ‘katawhan alang sa ngalan sa Diyos.’—Basaha ang Buhat 15:14; Juan 17:26.

4. Sa unsang paagi himayaon sa Diyos ang iyang ngalan?

Buot ni Jehova nga himayaon ang iyang ngalan kay kini gipasipalahan. Pananglitan, ang pipila nag-ingon nga wala niya lalanga ang kinabuhi ug dili kita kinahanglang mosunod niya. Ang uban nag-ingon nga siya wala magtagad nato ug siyay hinungdan sa pag-antos. Ang maong mga tawo nagpasipala sa ngalan sa Diyos. Apan dili nila kana mahimo sa dayon. Laglagon sa Diyos ang nagpasipala sa iyang ngalan.—Basaha ang Salmo 83:17, 18.

Himayaon ni Jehova ang iyang ngalan sa dihang ang iyang Gingharian magtapos sa tanang pagmando sa tawo ug magpasig-uli sa kalinaw ug kasegurohan sa katawhan. (Daniel 2:44) Sa dili madugay, ang tanan mahibalo nga si Jehova ang matuod nga Diyos.—Basaha ang Ezequiel 36:23; Mateo 6:9.

Unsay angay nimong buhaton? Pakigsuod sa Diyos pinaagi sa pagtuon sa Bibliya ug pagpakig-uban sa mga tawong nahigugma niya. Sa dihang himayaon ni Jehova ang iyang ngalan, hinumdoman niya ang iyang matinumanong mga alagad.—Malaquias 3:16.

Alang sa dugang impormasyon, tan-awa ang kapitulo 1 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.

[Hulagway sa panid 16]

Ngalan sa Diyos diha sa karaang Hebreohanong manuskrito