UNSAY NAKAPALAHI SA BIBLIYA? Ang karaang mga basahon sagad maghisgot ug dili-kasaligan ug peligrosong mga ideya nga napamatud-ang sayop sa modernong siyensiya. Bisan karon, kinahanglang rebisahon sa mga awtor ang ilang mga libro aron moharmonya sa bag-ong mga kaplag. Apan ang Bibliya nag-angkon nga ang awtor niini mao ang Maglalalang ug ang iyang Pulong “magpadayon hangtod sa kahangtoran.”​—1 Pedro 1:25.

PANANGLITAN: Ang Moisesnong Balaod nagsugo sa mga Israelitas nga ilubong ang ilang hugaw “sa gawas sa kampo.” (Deuteronomio 23:12, 13) Kon makahikap silag patayng mananap o tawo, kinahanglang hinloan nila ang ilang kaugalingon pinaagig tubig. (Levitico 11:27, 28; Numeros 19:14-16) Ang mga sanlahon ikuwarentinas hangtod mapamatud-an pinaagig pagsusi kanila nga dili na sila makatakod.​—Levitico 13:1-8.

ANG GIPADAYAG SA MODERNONG MEDISINA: Ang hustong paglabay sa hugaw, pagpanghunaw, ug pagkuwarentinas maoy epektibo gihapong mga paagi sa pagsanta sa sakit. Kon walay kasilyas o ubang sistema sa sanitasyon diha sa duol, ang U.S. Centers for Disease Control and Prevention (CDC) nagsugyot: “Malibang labing menos 30 metros gikan sa tuboran sa tubig ug dayon ilubong ang hugaw.” Kon buhaton kini, mamenosag 36 porsiyento ang sakit nga kalibanga, sumala sa World Health Organization. Mga 200 ka tuig kanhi, nadiskobrehan sa mga doktor nga daghang pasyente ang ilang napasahag sakit sa dihang wala sila manghunaw human mohikap ug patay. Ang CDC nag-ingon nga ang pagpanghunaw mao gihapon “ang labing epektibong paagi sa pagsanta sa pagpasa sa sakit.” Komosta ang pagkuwarentinas sa mga sanlahon o sa ubang masakiton? Di pa dugay, ang Saudi Medical Journal nag-ingon: “Sa pagsugod pa lang sa epidemya, ang pagkuwarentinas lagmit mao lamang ang paagi nga epektibong makontrolar ang mga sakit nga mananakod.”

UNSAY IMONG HUNAHUNA? May lain pa bang karaan nga balaang basahon nga moharmonya sa modernong siyensiya? O ang Bibliya ba talagsaon?