DIHA bay higayon nga nagmagahi ka ug wala mopatuo?— * Tingali nagtan-aw kag salida sa TV nga gidili kanimo sa imong ginikanan. Lagmit sa ulahi naghunahuna ka bahin niana ug nagbasol ka sa imong gihimo. Dihay tawo nga sa sinugdan wala mopatuo. Siya si Naaman. Atong tan-awon kon sa unsang paagi siya natabangan.

Hunahunaa nga nabuhi kita kapig 3,000 ka tuig kanhi. Si Naaman maoy komander sa kasundalohan sa Sirya. Naanad na siya sa pagmandar sa iyang mga sundalo, ug sila motuman niya. Apan gitakboyan si Naaman ug grabeng sakit sa panit nga gitawag ug sanla. Tungod niini, ngil-ad siyang tan-awon, ug lagmit gisakitan siya pag-ayo.

Ang asawa ni Naaman may dalagitang sulugoon nga gikan sa Israel. Usa ka adlaw niana gisuginlan sa dalagita ang iyang agalon bahin sa tawong ginganlag Eliseo didto sa ilang lugar. Siya miingon nga ang maong tawo makaayo kang Naaman. Sa dihang nasayran kini ni Naaman, gusto dayon niyang moadto kang Eliseo. Siya nagdalag daghang regalo ug mibiyahe uban sa iyang mga sundalo paingon sa Israel. Miadto siya sa hari sa Israel aron sultian kini sa iyang tuyo.

Nabalitaan kini ni Eliseo ug nagpasugo siya ngadto sa hari nga ipadala si Naaman ngadto kaniya. Pag-abot ni Naaman sa balay ni Eliseo, gisugo ni Eliseo ang iyang mensahero sa pag-ingon kang Naaman nga maligo kinig pito ka beses sa Suba sa Jordan. Matod ni Eliseo, mao  kini ang makapaayo kang Naaman. Unsa kahay gibati ni Naaman bahin niini?—

Siya nasuko. Busa siya nagmagahi ug wala mopatuo sa propeta sa Diyos. Giingnan niya ang iyang mga sundalo: ‘Daghang mas maayong suba sa ato.’ Si Naaman mobiya na unta. Apan nasayod ka ba kon unsay gisulti sa iyang mga sundalo?— ‘Bisag lisod pa ang ipabuhat sa propeta nimo, dili ba buhaton man nimo kana? Busa nganong dili man ka mosunod niining gamay ra nga butang?’

Si Naaman namati ug gibuhat ang giingon sa iyang mga sundalo. Kaunom siyang mituslob sa suba. Paghaw-as niya sa tubig sa ikapitong higayon, si Naaman nakurat—nawala ang iyang sanla! Siya naayo! Dihadiha siya mibalik sa balay ni Eliseo nga 48 kilometros ang gilay-on aron sa pagpasalamat kaniya. Gusto niyang hatagan si Eliseo ug mahalong mga regalo, apan wala kana dawata sa propeta.

Busa dihay gipangayo si Naaman kang Eliseo. Nahibalo ka ba kon unsa?— ‘Palihog hatagi kog yuta nga luwan sa usa ka paris nga mula nga akong dad-on.’ Nahibalo ka ba kon ngano?— Si Naaman miingon nga gusto niyang maghalad sa Diyos diha sa yuta nga gikan sa nasod sa katawhan sa Diyos, ang Israel. Unya misaad si Naaman nga dili na gayod siya mosimbag laing diyos gawas kang Jehova! Wala na siya magmagahi kondili andam nang motuman sa matuod nga Diyos.

Masundog kaha nimo si Naaman?— Kon gahian ka sama niya, mahimo kang magbag-o. Mahimo kang magpatabang ug dili na magmagahi.