Ang Bibliya Makabag-o sa Kinabuhi

UNSAY nakatabang sa usa ka babaye sa Pilipinas sa pag-undag huboghubog ug sa pagpauswag sa iyang pamilyahanong kinabuhi? Nganong ang usa ka karatista sa Australia nahimong makigdaitong ministro sa relihiyon? Basaha ang ilang asoy.

“Dili Dihadiha ang Kausaban.”—CARMEN ALEGRE

NATAWO: 1949

NASOD: PILIPINAS

ANIADTO: PALAHUBOG

KAAGI: Natawo ko sa San Fernando, usa ka lungsod sa probinsiya sa Camarines Sur. Apan, sa dihang dako na ko mipuyo ko sa Antipolo, probinsiya sa Rizal. Ang Antipolo, nga nahimutang sa bukiron ug kasagbotan nga lugar nga daghag kahoy, maoy gamay nga lungsod kaniadto. Halos wala koy makitang tawo nga maglakawlakaw sa gawas kon mongitngit na. Apan karon, ang Antipolo usa na ka dakong siyudad nga daghag tawo.

Human makabalhin sa Antipolo, nakaila nako si Benjamin, ug sa ngadtongadto nagminyo mi. Akong nakita nga ang kinabuhing minyo mas lisod pa kay sa akong gidahom. Aron makalimot sa akong mga problema, naghuboghubog ko. Nahimong ngil-ad ang akong batasan, nga makita sa pagtratar nako sa akong bana ug mga anak. Mubo kaayo kog pasensiya sa akong pagpakiglabot nila. Wa koy tahod sa akong bana. Dayag nga dili gyod malipayon ang among pamilya.

GIBAG-O SA BIBLIYA ANG AKONG KINABUHI: Ang igsoon sa akong bana, si Editha, maoy usa ka Saksi ni Jehova, ug iya ming giawhag ni Benjamin nga magtuon ug Bibliya uban sa mga Saksi. Misugot mi, sa panghinaot nga makatabang kini nga moarang-arang ang among pamilyahanong kinabuhi.

Samtang nagtuon mi sa Bibliya, daghan mig nakat-onang nindot nga mga kamatuoran. Natandog kaayo ko sa giingon sa Pinadayag 21:4. Mahitungod niadtong mabuhi sa umaabot nga paraisong yuta ilalom sa Gingharian sa Diyos, ang maong teksto nag-ingon nga “pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.” Gusto nakong mahilakip sa mga tawong makatagamtam niana nga mga panalangin.

Akong naamgohan nga kinahanglan kong mohimog dakong kausaban sa akong tinamdan ug batasan. Dili dihadiha ang kausaban, apan sa ngadtongadto nakaundang ra ko sa paghuboghubog. Nakakat-on sab ko nga mahimong maluloton ug mapailobon sa akong pamilya. Dugang pa, nakakat-on ko sa pagtahod  sa akong bana ug sa pagpakigkooperar kaniya samtang nanguna siya sa among pamilya.

Sa dihang mitambong mi ni Benjamin sa tigom sa mga Saksi ni Jehova, nakadayeg kaayo mi sa among nakita. Taliwala sa mga Saksi, walay manugal, walay maghuboghubog, ug walay magpihigpihig. Sila nagpakitag dignidad ug pagtahod sa tanan. Kombinsido mi nga among nakaplagan ang matuod nga relihiyon.—Juan 13:34, 35.

MGA KAAYOHAN NGA AKONG NABATONAN: Dako kaayog kausaban ang among pamilyahanong kinabuhi. Kami ni Benjamin nagmalipayon sa among kaminyoon, ug malipay mi sa pagtudlo sa uban bahin sa Bibliya. Ang among duha ka anak ug ang ilang mga asawa nagsugod na sab pagtuon sa Bibliya. Nanghinaot mi nga sa ngadtongadto magkahiusa mi sa pag-alagad kang Jehova. Mao gyod ni ang labing maayong paagi sa pagkinabuhi.

‘Gibati Nakong way Makapildi Nako.’—MICHAEL BLUNSDEN

NATAWO: 1967

NASOD: AUSTRALIA

KANIADTO: KARATISTA

KAAGI: Nagdako ko sa Albury, usa ka nindot ug mauswagong siyudad sa New South Wales. Sama sa kadaghanang siyudad, may mga krimen sab dinhi. Apan, sa katibuk-an, ang Albury ilado nga luwas puy-an.

Haruhay ang among pagkabutang. Bisag nagdiborsiyo ang akong ginikanan sa 7 anyos pa ko, ilang giseguro nga kami sa akong igsoong lalaki ug duha ka igsoong babaye matagan-an sa among panginahanglan. Gipaeskuyla ko sa kinamaayohan nga pribadong tunghaan sa among dapit. Gusto ni Papa nga mag-abli kog negosyo inigkahumag eskuyla. Apan, mas interesado ko sa esports, diin maayo kaayo ko sa cycling ug karate. Nakatrabaho ko sa usa ka talyer, busa nakagugol kog mas dakong panahon sa esports.

Mapasigarbohon ko sa kalig-on sa akong lawas. Usahay, bation nakong way makapildi nako. Magamit unta nako ang akong kusog aron makabentaha sa uban. Apan, ang akong master sa karate, kinsa nahibalo nga nakigbisog ko nga dili gamiton ang akong kusog sa sayop nga paagi, nagtudlo nakog disiplina sa kaugalingon ug maayong pamatasan. Kanunay niyang ipasiugda ang kahinungdanon sa pagkamasinugtanon ug pagkamaunongon.

GIBAG-O SA BIBLIYA ANG AKONG KINABUHI: Sa nagtuon na kog Bibliya, akong nasayran nga gidumtan ni Jehova ang kapintasan. (Salmo 11:5) Sa sinugdan, nangatarongan ko nga ang karate dili mapintason kondili maoy esport nga ginahimo sa luwas nga paagi. Gibati nako nga ang mga prinsipyo ug taas nga sukdanan niini nahiuyon sa gitudlo sa Bibliya. Ang magtiayong Saksi nga nagtuon nako mapailobon kaayo. Wala gyod ko nila ingna nga biyaan nako ang karate; basta padayon lang ko nilang gitun-an sa Bibliya.

 Sa nagkadako ang akong kahibalo sa Bibliya ug nagkalig-on ang akong relasyon kang Jehova, nausab ang akong panglantaw. Nakadayeg ko sa panig-ingnan nga gipakita sa anak ni Jehova, si Jesus. Bisag gamhanan kaayo siya, wala gayod siya mohimog kapintasan. Naigo kaayo ko sa iyang giingon sa Mateo 26:52 nga “ang tanang mogamit sa espada mamatay pinaagi sa espada.”

Sa nagkadaghan ang akong nakat-onan bahin kang Jehova, nagkadako ang akong gugma ug pagtahod kaniya. Makapatandog gayod ang paghunahuna nga ang atong Maglalalang, kinsa maalamon ug gamhanan kaayo, nagmahal kanako ingong indibiduwal. Natandog sab ko sa pagkahibalo nga bisag gipakyas nako si Jehova o gibati nakong kasurenderon na ko, dili gyod ko niya biyaan basta padayon kong maningkamot. Nahupayan kaayo ko sa iyang saad: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” (Isaias 41:13) Sa dihang akong naamgohan nga gipakitaan kog ingon niana nga gugma, nakadesisyon kong dili mosurender.

Nahibalo ko nga ang pagbiya sa karate mao ang kinalisdang desisyon nga akong himoon. Apan nahibalo sab kong makapahimuot kini kang Jehova, ug kombinsido ko nga ang pag-alagad kaniya takos sa bisan unsang sakripisyo. Ang nakapalihok gyod nako mao ang giingon ni Jesus sa Mateo 6:24: “Walay usa nga mahimong ulipon sa duha ka agalon.” Akong naamgohan nga imposibleng makaalagad sa bug-os kang Jehova ug sa samang higayon magpadayon sa karate, kay dili kalikayan nga mahimo nako kining prayoridad. Panahon na nga mopili kog usa ka agalon.

Lisod ang pagbiya sa karate. Nagsagol ang akong emosyon. Gibati nako ang kalipay sa pagkahibalo nga akong gipahimut-an si Jehova. Apan, gibati sab nako nga nagtraydor ko sa akong master sa karate. Kadtong nalangkit sa martial arts sagad mag-isip sa pagtraydor ingong sala nga dili mapasaylo. Maghikog pa gani ang uban inay atubangon ang kaulaw.

Maulaw kong mosulti sa akong master kon unsay rason sa akong pagbiya. Basta na lang kong mibiya ug wala na makigkomunikar niya ug sa mga kauban nako sa karate. Nasayod ko nga husto ang akong gibuhat sa pagbiya niana. Apan, nahasol pod ko nga wala nako ipatin-aw ang akong tinuohan, nga gipalabay nako ang kahigayonan nga ipaambit ang akong pagtuo sa uban. Gibati nako nga wala pa gani ko makasugod sa pag-alagad kang Jehova, gipakyas na nako siya. Nakapahasol gyod ni nako. Daghang higayon nga sa dihang moampo ko kang Jehova, makahilak ko sa kaguol.

Lagmit may nakitang maayo si Jehova nako, kay iyang gipalihok ang mga igsoon sa kongregasyon nga paluyohan ko. Talagsaon ang ilang gugma, paghupay, ug pagpakighigala. Nahupayan sab ko sa asoy sa Bibliya bahin kang David ug Batseba. Bisag nakahimo si David ug dagkong sala, gipasaylo siya ni Jehova sa dihang sinsero siyang naghinulsol. Sa gipalandong nako kana, gilantaw nako sa hustong paagi ang akong kahuyangan.

MGA KAAYOHAN NGA AKONG NABATONAN: Sa wala pa ko magtuon ug Bibliya, kaugalingon ray akong gihunahuna. Apan sa tabang ni Jehova ug sa akong matahom nga asawa sa 7 na ka tuig, mas nahimo kong mabination. Nalipay mi nga nakadumalag pagtuon sa Bibliya uban sa daghang indibiduwal, lakip na sa pipila nga makaluluoyg kahimtang. Ang pagkakita sa epekto sa gugma ni Jehova diha sa uban nakahatag nakog mas dakong kalipay kay sa pagkahimong maayong karatista.

[Blurb sa panid 14]

“Makapatandog gayod ang paghunahuna nga ang atong Maglalalang, kinsa maalamon ug gamhanan kaayo, nagmahal kanako ingong indibiduwal”

 [Kahon/Hulagway sa panid 15]

“Salamat Niining Nindot Kaayo nga Serye!”

Giganahan ka bag basa sa mga eksperyensiya? Duha lamang kana sa kapig 50 ka kasinatian nga gipatik sa Ang Bantayanang Torre sukad niadtong Agosto 2008. Ang serye nga “Ang Bibliya Makabag-o sa Kinabuhi” nahimong paborito sa among mga magbabasa. Nganong daghan ang giganahan niini?

Ang mga indibiduwal nga gihisgotan niini lainlaig kagikan. Sa wala pa sila makakat-on bahin kang Jehova nga Diyos, ang pipila daw nagmalamposon apan walay tinuod nga katuyoan ang ilang kinabuhi. Ang uban nag-atubag lisod nga mga hagit, sama sa pagkamasuk-anon o pag-abuso sa droga o alkohol. Ang pipila nagdako nga nakaila kang Jehova apan dihay panahon nga mihunong sila sa pag-alagad kaniya. Kanang tanan nagpakita nga posibleng magbag-o aron pahimut-an ang Diyos. Ug ang pagbuhat niana makahatag gayod ug kaayohan. Unsay epekto niini sa among mga magbabasa?

Ang usa misaysay kon sa unsang paagi ang artikulo sa Pebrero 1, 2009 nga gula nakatabang sa pipila ka babayeng piniriso.

▪ “Daghan sa mga piniriso ang makasabot sa pagbati sa mga indibiduwal nga gihisgotan sa artikulo,” siya miingon. “Ang ilang mga letrato ‘sa una’ ug ‘karon,’ lakip na ang kaagi sa matag usa kanila, epektibo kaayo. Daghang piniriso ang susamag kaagi. Human kini mabasa, duha ka piniriso ang nagsugod pagtuon sa Bibliya.”—C. W.

Ang mga eksperyensiya nga gihisgotan niini nga serye nakatandog sa pipila ka magbabasa. Pananglitan, ang Abril 1, 2011 nga gula nag-asoy sa kaagi ni Guadalupe Villarreal, kinsa mibiya sa iyang homoseksuwal nga pagkinabuhi aron moalagad kang Jehova. Tagda kining duha sa daghang sulat gikan sa among mga magbabasa nga mikomento bahin sa iyang kasinatian.

▪ “Natandog gyod ko sa kaagi ni Guadalupe. Makapahinganghang makita kon sa unsang paagi ang gugma kang Jehova ug sa iyang Pulong bug-os nga makausab sa usa ka tawo!”—L. F.

▪ “Kaniadto, ipaambit nako ang akong tinuohan sa tanan, lakip na sa mga homoseksuwal. Apan, ning bag-o pa, akong namatikdan nga labyan lang o likayan pa gani nako sila. Dako gyog tabang ning artikuloha. Nakatabang ni nako sa paglantaw sa maong mga indibiduwal sumala sa panglantaw ni Jehova—ingong iyang potensiyal nga mga magsisimba.”—M. K.

Ang laing kasinatian nga makahuloganon kaayo sa daghang magbabasa mao ang iya ni Victoria Tong, nga mabasa sa Agosto 1, 2011 nga gula. Gihubit ni Victoria ang miserableng pagpadako kaniya. Iyang giangkon nga nalisdan siya sa pagtuo nga gihigugma siya ni Jehova, bisag nag-alagad na siya kaniya sa daghang katuigan. Ug iyang giasoy kon unsay inanayng nakatabang niya sa pagdawat nga gihigugma siya ni Jehova. Matikdi ang giingon sa pipila ka magbabasa bahin sa iyang sugilanon.

▪ “Natandog gyod ko sa kaagi ni Victoria. Daghang trahedya ang akong nasinatian. Kanunay kong nakigbisog sa negatibong panghunahuna—bisag dugay na kong nabawtismohan ingong Saksi. Apan ang eksperyensiya ni Victoria nakadasig nakong maningkamot nga makita ang nakita ni Jehova nako.”—M. M.

▪ “Sa batan-on pa ko, nakigbisog ko sa akong pagkaadik sa pornograpiya. Ning bag-o pa, naligas na pod ko. Nagpatabang ko sa Kristohanong mga ansiyano, ug nabuntog nako ang akong kahuyangon. Gipasaligan ko nila sa gugma ug kaluoy sa Diyos. Apan, usahay mobati kong way pulos, nga daw imposibleng higugmaon ko ni Jehova. Ang pagbasa sa kasinatian ni Victoria nakatabang gayod. Karon nakaamgo ko nga kon maghunahuna kong imposibleng pasayloon ko sa Diyos, sama rag miingon ko nga ang halad sa iyang Anak dili igo sa pagbayad sa akong mga sala. Gitipigan nako ning artikuloha aron akong mabasa ug mapamalandong sa panahon nga mobati kong walay pulos. Salamat niining nindot kaayo nga serye!”—L. K.