Kinsa ang Tigpatalinghog sa Pag-ampo?
Kinsa ang Tigpatalinghog sa Pag-ampo?
KON may Tigpatalinghog sa pag-ampo, makataronganon lang nga siya ang Maglalalang. Kinsa pa may laing makabasa sa imong hunahuna kondili ang Usa nga nagdisenyo sa utok sa tawo? Kinsa pa may laing motubag sa mga pag-ampo ug motabang sa mga tawo nga nanginahanglag tabang? Apan makapangutana ka tingali, ‘Makataronganon bang motuo sa usa ka Maglalalang?’
Daghan ang naghunahuna nga aron makatuo sa usa ka Maglalalang, kinahanglan nimong isalikway ang ebidensiya sa modernong siyensiya. Apan sayop ang ideya nga ang pagtuo sa Diyos dili kaharmonya sa siyensiya. Tagda ang mosunod.
▪ Sa usa ka bag-o pang pagtuon maylabot sa 1,646 ka propesor sa siyensiya gikan sa 21 ka kinamaayohang unibersidad sa United States, usa lang sa matag tulo ang mipili sa pamulong nga “Dili ko motuog Diyos” sa paghubit sa ilang panglantaw.
Ang tinuod, daghang siyentipiko ang motuo nga dunay Diyos.
Ebidensiya nga May Maglalalang
Motuo na lang ba ta nga dunay Tigpatalinghog sa pag-ampo bisag walay ebidensiya? Dili gayod. Sayop ang ideya nga ang pagtuo nagpasabot nga motuo na lang bisag walay ebidensiya. Ang Bibliya naghubit sa pagtuo ingong “dayag nga pagpasundayag sa mga katinuoran bisan tuod wala makita.” (Hebreohanon 11:1) Ang laing hubad nag-ingon nga ang pagtuo nagpasabot nga “may kasigurohan kita sa mga butang . . . nga dili makita.” (Ang Bag-ong Maayong Balita Biblia) Pananglitan, dili ka makakita sa mga radio wave, apan klaro sa imong cellphone nga dunay dili makitang mga wave kay may tingog kang madunggan; busa dawaton nimo nga naglungtad kana nga mga wave. Sa susama, bisag dili nato makita ang Tigpatalinghog sa pag-ampo, may makita tang mga ebidensiya nga makapakombinsir nato nga siya naglungtad gayod.
Asa man ta makakitag ebidensiya nga dunay Diyos? Aw, motan-aw lang ta sa palibot. Ang Bibliya nag-ingon: “Dayag, ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Mouyon ka ba niana? Tingali sa dihang mamalandong ka sa pagkahan-ay sa uniberso, sa sinugdanan sa kinabuhi, o sa disenyo sa komplikado kaayong utok sa tawo, makaingon kang duna gyoy naglungtad nga mas labaw pa kay sa tawo. *
Apan ang kinaiyahan limitado lag ikatudlo kanato bahin sa Diyos. Ang pag-obserbar sa mga ebidensiya diha sa kalalangan nga dunay Diyos sama rag may nadunggan kang tunob paingon sa siradong pultahan. Nahibalo kang dunay tawo, apan wala ka masayod kon kinsa. Aron mahibaloan, kinahanglang ablihan nimo ang pultahan. Angay natong buhaton ang susama niana aron mailhan ang Usa nga naglalang sa tanan.
Ang Bibliya samag pultahan sa kahibalo bahin sa Diyos. Kon imo kanang ablihan ug tun-an ang pipila sa detalyadong mga tagna ug katumanan niini, makita nimo ang ebidensiya nga ang Diyos naglungtad gayod. * Apan labaw pa niana, ang rekord sa mga pakiglabot sa Diyos ngadto sa mga tawo nagpadayag sa personalidad sa Tigpatalinghog sa pag-ampo.
Unsay Kinaiyahan sa Tigpatalinghog sa Pag-ampo?
Ang Bibliya nagbutyag nga ang Tigpatalinghog sa pag-ampo maoy persona—usa nga puwede nimong mailhan. Siyempre, persona lang ang makapamati nga may pagsabot. Makapadasig ang giingon sa Salmo 65:2: “Oh Tigpatalinghog sa pag-ampo, nganha kanimo moduol ang tanang matang sa katawhan.” Siya mamati niadtong mag-ampo kaniya nga may pagtuo. Ug duna siyay ngalan. Ang Bibliya nag-ingon: “Si Jehova halayo sa mga daotan, apan siya nagapamati sa pag-ampo sa mga matarong.”—Proverbio 15:29.
Si Jehova dunay pagbati. Siya “ang Diyos sa gugma” ug gitawag nga “malipayong Diyos.” (2 Corinto 13:11; 1 Timoteo 1:11) Bahin sa iyang reaksiyon sa panahon nga kaylap kaayo ang pagkadaotan, ang Bibliya nag-ingon: “Siya nasakitan diha sa iyang kasingkasing.” (Genesis 6:5, 6) Dili tinuod ang giingon nga ang Diyos nagpahinabo sa pag-antos aron sulayan ang mga tawo. Ang Bibliya nag-ingon: “Halayo ra sa matuod nga Diyos nga mobuhat sa pagkadaotan.” (Job 34:10) Bisan pa niana, makapangutana ka tingali, ‘Kon ang Diyos mao ang labing gamhanang Maglalalang, nganong gitugotan man niyang magpadayon ang pag-antos?’
Gihatagan ni Jehova ang katawhan ug kagawasan sa pagpili, ug nagpakita kana kon unsa siyang matanga sa pagka-Diyos. Dili ba gipabilhan man nato ang atong kagawasan sa pagpili kon unsaon pagkinabuhi? Apan ikasubo, daghan ang nag-abuso sa ilang kagawasan ug nagpahinabog pag-antos sa ilang kaugalingon ug sa uban. Karon niay pangutana nga takos gayong palandongon: Sa unsang paagi taposon sa Diyos ang pag-antos nga dili mawala ang kagawasan sa tawo? Ato kanang hisgotan sa sunod nga artikulo.
[Mga footnote]
^ par. 8 Alang sa mas detalyadong panaghisgot sa ebidensiya nga dunay Diyos, tan-awa ang brosyur nga The Origin of Life—Five Questions Worth Asking ug ang librong Is There a Creator Who Cares About You? nga gipatik sa mga Saksi ni Jehova.
^ par. 10 Ang brosyur nga Usa ka Basahon Alang sa Tanang Tawo ug ang librong Ang Bibliya—Pulong sa Diyos o sa Tawo? gipatik sa mga Saksi ni Jehova aron tabangan ka nga makita ang ebidensiya nga ang Bibliya inspirado sa Diyos.
[Kahon sa panid 5]
Nagduhaduha Ka ba Tungod sa Relihiyon?
Makapasubo nga ang relihiyon maoy hinungdan kon nganong daghan ang nagduhaduha nga dunay mabinationg Tigpatalinghog sa pag-ampo. Ang pagkalambigit sa relihiyon sa gubat, terorismo, ug pagkonsentir niini sa pag-abusog mga bata, maoy hinungdan nga bisan ang mainampoong mga tawo natukmod sa pag-ingong, “Dili ko motuo sa Diyos.”
Nganong ang relihiyon sagad daotag impluwensiya? Sa yanong pagkasulti: Ang daotang mga tawo nagbuhat ug daotan sa ngalan sa relihiyon. Ang Bibliya nagtagna nga may laing puwersang mokontrolar sa Kristiyanidad ug gamiton kini sa paagi nga supak sa kabubut-on sa Diyos. Si apostol Pablo miingon sa Kristohanong mga ansiyano: “Gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.”—Buhat 20:29, 30.
Gidumtan sa Diyos ang bakak nga relihiyon. Gani, ang Pulong sa Diyos, ang Bibliya, nag-ingon nga ang bakak nga relihiyon sad-an sa “dugo . . . sa tanang gipamatay ibabaw sa yuta.” (Pinadayag 18:24) Kay napakyas ang bakak nga relihiyon sa pagtudlo sa mga tawo bahin sa matuod nga Diyos, kansang kinaiyahan mao ang gugma, ang maong mga relihiyon sad-an sa panglantaw sa Diyos.—1 Juan 4:8.
Ang Tigpatalinghog sa pag-ampo mobati sa mga biktima sa madaogdaogong relihiyon. Sa dili madugay, ang gugma sa Diyos alang sa katawhan magtukmod kaniya sa paghukom sa tanang salingkapaw sa relihiyon pinaagi kang Jesus. Si Jesus miingon: “Daghan ang moingon kanako nianang adlawa, ‘Ginoo, Ginoo, wala ba kami managna sa imong ngalan?’ . . . Unya ako magaingon kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.”—Mateo 7:22, 23.
