May Mamati ba sa mga Pag-ampo?

“Kaniadto nagduhaduha kong dunay Diyos. Apan, usahay moampo gihapon ko. Wala ko kaseguro kon may namati ba, apan angkonon ko nga nanghinaot kong may namati nako. Magul-anon ko ug way direksiyon ang akong kinabuhi. Nahadlok kong motuo nga dunay Diyos kay naghunahuna kong mga huyang lang ang motuo sa Diyos.”—PATRICIA, * IRELAND.

SUSAMA ka bag pagbati ni Patricia? Mag-ampo ka ba bisag nagduhaduha kang dunay Diyos? Kon mao, wala ka mag-inusara. Tagda ang mosunod.

▪ Sa 2,200 ka tawo sa Britain nga gisurbi, 22 porsiyento lang ang nagtuo nga dunay Diyos nga naglalang sa kalibotan ug mamati sa mga pag-ampo. Apan, 55 porsiyento kanila ang moampo panagsa.

▪ Sa 10,000 ka tawo nga gisurbi sa upat ka kontinente, halos 30 porsiyento niadtong miingong ateyista sila ang moampo.

Nganong Nagduhaduha Sila?

Si Allan nga taga-England miingon: “Kaniadto dili ko motuo sa Diyos kay abi nakog ang relihiyon gimugna aron kontrolahon ang mga tawo ug aron makasapi. Gawas pa, kon dunay Diyos, morason ko, nan wala untay inhustisya. Apan, usahay molingkod ko ug ‘makigsulti.’ Mangutana sab ko sa kaugalingon, ‘Nganong milungtad man ko?’”

Ang matag usa nga mibati niini may kaugalingong rason sa ilang pagduhaduha kon tubagon ba ang mga pag-ampo. Sa daghang kahimtang, ang hinungdan sa mga pagduhaduha mao ang mga pangutanang wala matubag, sama sa:

▪ Duna bay Maglalalang?

▪ Nganong ang relihiyon sagad daotag impluwensiya?

▪ Nganong gitugotan sa Diyos ang pag-antos?

Kon mahibaloan nimo ang mga tubag niini, dili ka na ba magpanuko sa pag-ampo?

[Footnote]