Pakigsuod sa Tigpatalinghog sa Pag-ampo

DAGHAN nga nag-angkong nagtuo sa Diyos ang dili makahatag ug lig-ong pasikaranan sa ilang pagtuo. Ni makapatin-aw sila kon nganong ang relihiyon sagad daotag impluwensiya o kon nganong gitugotan sa Diyos ang pag-antos. Ang ila rang mahimo mao ang pag-ampo sa usa ka Diyos nga wala nila masabti.

Apan, posibleng mas masuod ka pa sa Diyos. Mapalig-on nimo ang imong pagtuo base sa kahibalo bahin sa Diyos nga motukmod nimo sa paghigugma ug pagpabili kaniya. Ang tinuod nga pagtuo gipasukad sa ebidensiya. (Hebreohanon 11:1) Kon imong tun-an ang kamatuoran bahin sa Diyos, imo siyang mailhan ug makapakigsulti ka kaniya ingong higala. Tagda ang kasinatian sa pipila nga kaniadto nag-ampo bisag nagduhaduha sila sa paglungtad sa Diyos.

▪ Si Patricia, nga gihisgotan sa unang artikulo. “Dihay higayon nga nakauban nako ang mga napulo sa akong mga higala sa dihang nagsugod sila paghisgot ug relihiyon. Ako silang giingnan nga may miduawng Saksi ni Jehova sa among balay nga nakighisgot uban ni Papa, kinsa usa ka ateyista, ug milakaw ko kay di ko gustong maminaw. ‘Basig husto ang mga Saksi,’ matod sa usa nako ka higala.

“‘Unsa kaha kon motambong ta sa ilang tigom aron atong masuta?’ matod sa laing higala. Ug mao nay among gihimo. Bisag nagduhaduha, ang pipila kanamo nagpadayog tambong tungod lang kay ang mga Saksi mahigalaon kaayo.

“Apan, usa niana ka Dominggo, may nadunggan ko nga nakapausab sa akong tinamdan. Gipatin-aw sa mamumulong kon nganong nag-antos ang mga tawo. Karon pa gyod ko nahibalo nga ang tawo gilalang diay nga hingpit ug nga ang sala ug kamatayon nagsugod pinaagi sa usa ka tawo ug mikaylap sa tanang katawhan. Gipatin-aw sab niya kon nganong gikinahanglan ang kamatayon ni Jesus aron mapasig-uli ang katawhan sa kahimtang nga giwala sa unang tawo. * (Roma 5:12, 18, 19) Dihadiha, akong nasabtan ang tanan. ‘Duna gyod diay Diyos nga nagmahal nato,’ nakaingon ko. Nagpadayon ko pagtuon sa Bibliya ug sa wala madugay, sa unang higayon sa akong kinabuhi, akong naamgohan nga makaampo ko sa usa ka tinuod nga persona.”

▪ Si Allan, nga gihisgotan usab sa sinugdanan sa artikulo. “Usa ka adlaw niana, dihay mga Saksi  nga miadto sa among balay, ug gipadayon sila sa akong asawa kay interesado siya sa ilang giingon bahin sa pagkinabuhi sa yuta sa walay kataposan. Naglagot ko. Busa, mitalikod ko ug akong gipaapas ang akong asawa sa kosina ug giingnan siya, ‘Ayawg patonto. Dili katuohan nang mga butanga!’

“‘Di, adtoa sila ug pamatud-ing sayop sila,’ mitubag siya.

“Siyempre, dili ko makapamatuod ana. Apan maayo kaayo sila nako ug gibinlan ko nilag libro nga naghisgot kon ang kinabuhi mitungha ba pinaagig paglalang o ebolusyon. Ang lohika niini tin-aw kaayo ug dunay basehanan busa midesidir kong magtuon pag dugang bahin sa Diyos. Misugod ko pagtuon sa Bibliya uban sa mga Saksi, ug wala madugay akong naamgohan nga lahi kaayo ang giingon niini kay sa tanan nakong gituohan bahin sa relihiyon. Samtang nakakat-on ko bahin kang Jehova, nahimong mas espesipiko ang akong pag-ampo. Nangayo kog tabang niya kay diha koy dili maayong mga tinamdan. Seguradong gitubag ni Jehova ang akong mga pag-ampo.”

▪ Si Andrew, nga nagpuyo sa England. “Bisag dako kog pagtuo ug interes sa siyensiya, mituo ko sa teoriya sa ebolusyon tungod lang kay ang uban  nag-ingong tinuod kini. Wala ko motuog Diyos tungod sa tanang pagkadaotan nga nagkahitabo.

“Apan, usahay maghunahuna ko: ‘Kon dunay Diyos, nan gusto kong mahibalo kon unsay kahulogan sa kinabuhi. Nganong kaylap man kaayo ang krimen ug gubat?’ Sa dihang magkalisod ko, ako moampo usahay alang sa tabang, apan wala ko mahibalo kon kinsay akong gipakigsultian.

“Dayon, dihay naghatag sa akong asawa ug tract nga gipatik sa mga Saksi ni Jehova nga nag-ulohang Kini Bang Kalibotana Molungtad? Mao gyod nang pangutanaha ang sige nakong gihunahuna. Ang tract nakapahunahuna nako bahin sa Bibliya, ‘Angay ba kahang tagdon ang mga tubag niini?’ Sa ulahi, sa dihang nagbakasyon ko, dihay naghatag nakog libro nga Ang Bibliya—Pulong sa Diyos o sa Tawo? * Sa pagkaamgo nakong ang Bibliya kaharmonya diay sa tinuod nga siyensiya, gibati nako nga kinahanglan kong mokat-og dugang bahin sa Bibliya. Busa sa dihang may Saksi nga mitanyag nako nga tun-an kini, misugot ko. Sa dihang akong nasabtan ang katuyoan ni Jehova, akong gibati nga nakaila ko niya ingong tinuod nga persona, usa nga akong maestorya sa tanang panahon diha sa pag-ampo.”

▪ Si Jan, nga gimatuto ingong Protestante sa London. “Tungod sa pagkasalingkapaw sa relihiyon ug sa pagkaylap sa pag-antos, nawad-an kog pagtuo sa relihiyon. Miundang sab ko sa kolehiyo ug misugod kog kanta ug tugtog sa gitara aron makakuwarta. Nianang higayona, nakaila nako si Pat. Siya nagdako nga Katoliko ug nawad-an sab ug pagtuo sa relihiyon sama nako.

“Nagpuyo mi sa usa ka abandonadong balay uban sa pipila ka batan-ong nangundang pog eskuyla kinsa interesado sa mga relihiyon sa Sidlakan. Maabtan mig lawom na nga mga gabii sa paghisgot bahin sa kahulogan sa kinabuhi. Bisag kami ni Pat dili motuog Diyos, gibati namong duna gyoy puwersang naglalang sa kinabuhi.

“Human mi makabalhin sa amihanang England tungod sa pagpangitag trabaho ingong mga musikero, natawo ang among anak nga lalaki. Usa ka gabii niana, nasakit kini, ug nag-ampo ko sa Diyos nga wala nako tuohi. Sa wala madugay human niana, nadaot ang among relasyon ni Pat, ug mibiya ko dala ang among anak. Sa makausa pa, nag-ampo ko alang sa tabang, kay basin diayg may namati. Wala nako mahibal-i nga ingon sab diay niana ang gihimo ni Pat.

“Sa ulahi nianang adlawa, duha ka Saksi ni Jehova ang miduaw kang Pat ug gipakita kaniya ang pipila ka praktikal nga tambag sa Bibliya. Gitawgan ko ni Pat ug gipangutana ko kon mosugot ba kong magtuon ug Bibliya uban niya ug sa mga Saksi. Sa wa madugay, among nahibal-an nga aron mapahimut-an ang Diyos, kinahanglan ming magpakasal. Morag lisod ning himoon kay dili na maayo ang among relasyon.

“Gusto ming masayod pag dugang bahin sa katumanan sa mga tagna sa Bibliya, sa hinungdan sa pag-antos, ug sa kahulogan sa Gingharian sa Diyos. Sa hinayhinay, among naamgohan nga ang Diyos may pagtagad gayod, ug buot namong tumanon ang iyang mga sugo. Busa nagpakasal mi. Ang kaalam sa Pulong sa Diyos nakatabang namo sa pagmatuto sa among tulo ka anak. Seguradong gidungog ni Jehova ang among mga pag-ampo.”

Susiha Mismo ang Ebidensiya

Sama sa minilyong uban pa, kadtong gikutlo niining artikuloha nakalingkawas sa panglimbong sa bakak nga relihiyon ug ilang nasayran kon nganong gitugotan sa Diyos ang pag-antos. Nakita ba nimo nga sa matag kasinatian, ang tukmang pagsabot sa Bibliya ang nakakombinsir niini nga mga indibiduwal nga si Jehova mamati gayod sa mga pag-ampo?

Gusto ba nimong susihon ang mga ebidensiya nga ang Diyos naglungtad? Ang mga Saksi ni Jehova malipay sa pagtabang nimo nga makakat-on sa kamatuoran bahin kang Jehova ug kon unsaon nimo pagpakigsuod sa “Tigpatalinghog sa pag-ampo.”—Salmo 65:2.

[Mga footnote]

[Blurb sa panid 10]

“Sa dihang akong nasabtan ang katuyoan ni Jehova, akong gibati nga nakaila ko niya ingong tinuod nga persona, usa nga akong maestorya sa tanang panahon diha sa pag-ampo”

[Hulagway sa panid 9]

Ang tinuod nga pagtuo gipasukad sa ebidensiya ug sa tinguhang mahibaloan ang kamatuoran bahin sa Diyos